Muhanga: Umugore afunzwe akekwaho kwica umugabo we w’imyaka 76

Yanditswe na Prudence Kwizera
Kuya 22 Nyakanga 2019 saa 09:38
Yasuwe :
0 0

Umugore wo mu Murenge wa Kabacuzi mu Karere ka Muhanga yatawe muri yombi na Urwego rw’Igihugu rushinzwe Ubugenzacyaha (RIB) akekwaho icyaha cyo kwica umugabo we.

Icyo cyaha akekwaho cyabaye ahagana saa mbiri z’umugoroba kuri iki cyumweru tariki ya 21 Nyakanga 2019.

Uwo mugore afite imyaka 47 y’amavuko naho umugabo we yari afite 76. Bari bamaze kubyarana abana barindwi. Batuye mu Mudugudu wa Gasave mu Kagari ka Kavumu.

Umunyamabanga Nshingwabikorwa w’Umurenge wa Kabacuzi, Rwigemera Pilote, yabwiye IGIHE ko urwo rugo rutari rusanzwe rugaragaramo amakimbirane ariko uwo mugabo yari azwiho gufuhira umugore we cyane amukekaho kumuca inyuma.

Ati “Nta makimbirane yari asanzwe aba muri urwo rugo ariko biravugwa ko umugabo yafuhaga; umugabo wese yababonanaga yavugaga ngo ‘ese uwo mugabo muravugana iki?’ kubera ko yabonaga ari mukuru undi ari muto cyane; gusa ntabwo barwanaga.”

Rwigemera yavuze ko amakuru y’ibanze bafite ari uko uwo mugore n’umugabo we bari basinze bituma bakimbirana noneho umugabo yirukanse ku mugore we yikubita hasi arapfa.

Ati “Ikigaragara cyo ni uko ashobora kuba yazize kwikubita hasi kuko twasanze bigaragara ko yakubise impanga hasi; ni ahantu hasa n’ahacuramye; yari yakobotse ku gahanda ku buryo bishoboka ko yakubise umutwe ku itaka. Nta wahita ahamya ko umugore we ari we wamwishe.”

Rwigemera akomeza avuga ko abana babo babana mu rugo nabo bahamirije ubuyobozi n’inzego z’umutekano ko se yazize kwikubita hasi ari kwirukankana nyina.

Kuri ubu uwo mugore afungiye kuri Sitasiyo ya Polisi Kiyumba mu gihe inzego zibishinzwe zikomeje iperereza ku cyaba cyateye urwo rupfu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza