Mu Rwanda hatangiye ikigo gifasha abacuruzi kurangura mu Bushinwa batiriwe bajyayo

Yanditswe na Ndahayo Emmanuel
Kuya 18 Nzeri 2020 saa 01:49
Yasuwe :
0 0

Mu gihe Isi yugarijwe n’icyorezo cya Coronavirus, ingendo zo mu kirere ni kimwe mu byahungabanye cyane, ku buryo abacuruzi hirya no hino bakoraga ingendo bajya kurangura bagize ibibazo bikomeye, birimo kubura uko barangura ibicuruzwa byabo ariko by’umwihariko, bakibwa umutungo wabo igihe bagerageje kwifashisha ikoranabuhanga kugira ngo bakomeze ubucuruzi bwabo.

Ni ikibazo gikomeye kandi kimaze kwera, cyane cyane mu bihugu nk’u Bushinwa, bumaze kuba uruganda rw’Isi mu gukora ibikoresho hafi ya byose nkenerwa.

Mu minsi ishize, abacuruzi b’abanyarwanda bagiye bahura n’ibi bibazo, aho bahombejwe n’ibikorwa birimo ubujura n’ubutekamutwe, bikadindiza ubucuruzi bwabo ndetse bamwe bakagorwa no kwishyura banki.

Mu rwego rwo gufasha abanyarwanda barangura mu Bushinwa kutazongera guhura n’iri sanganya, Placide Uwonkunda, afatanyije na bagenzi be bize mu Bushinwa kandi bahamenyereye, bahisemo gushinga ikigo cyitwa Sourcing International Co. Ltd. gifasha abacuruzi gukomeza kurangura ibicuruzwa biturutse mu Bushinwa kandi bikabageraho uko byateguwe, kabone yewe no muri ibi bihe bya Coronavirus, ubwo benshi batakibasha kwigerera mu Bushinwa.

Iki kigo gifite intego yo gufasha abarangura mu Bushinwa kubona ibicuruzwa byabo mu buryo bwihuse, buhendutse kandi butabagoye. Ni ikigo kandi kizafasha abarangura mu Bushinwa guhangana n’ibibazo by’ubutekamutwe bakunze guhura na byo, cyane cyane iyo baguze ibicuruzwa bivuye kuri murandasi, ndetse n’iyo bakoranye n’abakomisiyoneri ba baringa.

Iki kigo kizafasha abantu bifuza kubona ibigo bifite ibyangombwa byemewe byo gukorera mu Bushinwa, abashaka kurangura ku nganda zikora ibintu bifite ubuziranenge, abakeneye abasemuzi babafasha mu gukoresha Igishinwa ndetse n’Icyongereza ndetse n’abifuza inzobere zabafasha mu bijyanye no kugenzura ubuziranenge bw’ibicuruzwa bashaka kugura.

Iki kigo kandi kizafasha abantu n’ibigo byifuza abatekinisiye babafasha gutangira gukoresha imashini n’ibindi bikoresho byaguzwe mu Bushinwa, ndetse n’abashaka kurangirwa abafatanyabikorwa bizewe bo gukorana na bo mu Bushinwa.

Ku bafite amasoko n’abashaka kuyapiganira, Sourcing International Co. Ltd. izabafasha kubona ibigo byizewe byo mu Bushinwa bakorana, ndetse bafashe n’abakeneye inganda zizewe zikora ibicuruzwa byose bifuza, ku buryo bazajya babihabwa batavuye mu Rwanda.

Sourcing International Co. Ltd kandi izajya ifasha abacuruzi mu guhitamo inganda zizewe bakorana na zo, zifite ibyangombwa kandi zishobora no kubagabanyiriza ibiciro bigizwemo uruhare na Sourcing International Co. Ltd.

Iki kigo kandi gifite abahanga bagenzura ubuziranenge bw’ibicuruzwa bitumizwa mu Bushinwa mbere y’uko bipakirwa, ku buryo umuntu aba yizeye ko ibyo yatumije ari byo ari bwakire.

Ku bakeneye abatekinisiye n’abahanga mu bucuruzi, Sourcing International Co. Ltd ibafasha kubabona kandi ku giciro cyiza, ndetse ku bamaze kugura ibicuruzwa byabo, Sourcing International Co. Ltd ibafasha kubona ibigo bihendutse kandi byizewe, byabafasha kujyana ibicuruzwa byabo mu Rwanda n’ahandi bashaka ko bigana ku giciro cyiza.

Umuyobozi Mukuru wa Sourcing International Co. Ltd, Uwonkunda Placide, yavuze ko bagize igitekerezo cyo gushinga ikigo nk’iki bamaze kwitegereza ibibazo abacuruzi bo mu Rwanda bahura na byo mu gihe bari kurangura ibicuruzwa byabo mu Bushinwa, birimo igihombo gitewe no kubeshywa ndetse no kwibwa.

Yagize ati ‘’Aha dufite ingero za benshi bibaho bakadusaba kubafasha ariko byarangiye. Natanga urugero rw’umucuruzi waguze ifumbire ya 250 000$, (arenga miliyoni 230Frw) bakamupakirira kontineri, ariko zagera i Kigali, agasanga harimo itaka. Urundi rugero ni uwaguze ibikoresho mu kwezi gushize (Kanama), amaze kwishyura, uwo baguze yahise asiba nimero ye kuri telefone. Yaratwiyambaje tugiye kureba aho yamubwiye akorera dusanga hatabaho’’.

Uwonkunda, yongeyeho ko ikigo cye kizabasha gufasha abacuruzi bahuraga n’ibyo bibazo, kandi bagakomeza ubucuruzi bwabo no muri ibi bihe bitoroshye bya Coronavirus.

Sourcing International Co. Ltd igaragaza ko muri rusange, abacuruzi bavana ibicuruzwa mu Bushinwa bari mu byiciro bitatu ; birimo abakunze gukorerayo ingendo zihoraho bagiye kurangura, abakorana n’abakomisiyoneri b’Abashinwa babazanira ibicuruzwa, ndetse n’abagura ibicuruzwa byabo kuri murandasi, bakishyura byose ariko bitabaye ngombwa ko bajyayo ndetse batanaziranye n’uwo bagura nawe.

Ibi byiciro byose by’abacuruzi byagizweho ingaruka muri ibi bihe bya Coronavirus, kandi mu buryo bujya gusa.

Nko ku bacuruzi bakundaga gukorera ingendo mu Bushinwa, bahuye n’ibibazo cyane bijyanye no kutabasha kwigererayo kubera ihagarikwa cyangwa igabanywa ry’ingendo zo mu kirere. Ibi byatumye bahindura uburyo bwo kugura, aho kuri ubu abenshi bagura bifashishije amafoto cyangwa se inyemezabwishyu (bills) baguriyeho ubushize.

Ibi babyoherereza abakomisiyoneri bo mu Bushinwa bakorana, ubundi bakishyura amafaranga bayanyujije kuri konti zabo cyangwa bakayanyuza mu bigo by’ubwikorezi basanzwe bakorana nabyo.

Gusa ariko kuko aba bacuruzi baba batabonye uko bigirayo, kandi n’ubunyangamugayo bw’abo bakomisiyoneri bukaba butizewe kuko usanga atari n’ibigo bifite ibyangombwa, usanga akenshi hari ubwo ibyo umucuruzi yaranguye bimugeraho bitandukanye cyane n’ibyo yashakaga, cyane mu bijyanye n’ubuziranenge bwabyo.

Si ibyo gusa ariko kuko aba bacuruzi bakorana n’ibyo bigo bya baringa byo mu Bushinwa banibwa cyane, bagahomba akayabo ndetse bamwe bagahera aho basubira inyuma, bikazarangira bavuye mu bucuruzi cyangwa se bananiwe kwishyura banki.

Ku rundi ruhande, ku bacuruzi basanzwe bakorana n’Abakomisiyoneri, akenshi usanga ari abacuruzi babimazemo igihe, aho bakorana n’inganda, cyangwa se abakomisiyoneri bakorana nazo, bakabashakira ibyo bakeneye.

Bimwe mu bibazo bahura nabyo ni uko bamwe muri aba bacuruzi bakorana n’inganda bakunze gushukwa, bakishyura amafaranga kuri konti zitari iz’inganda bumvikanye, bitewe ahanini n’uko mu Bushinwa hari ibigo byinshi kandi bikora ibintu bijya gusa, bikagira amazina ajya gusa ndetse na konti zabyo bikaba uko.

Byiyongeraho ko akenshi usanga ibisinywaho biri mu rurimi rw’Igishinwa, kitaramenywa na benshi mu Rwanda ku buryo kwibeshya, cyangwa kubeshywa biba byoroshye.

Gukorana n’abakomisiyoneri batizewe kandi bigira ingaruka zirimo kubeshywa, umuntu akohererezwa ibintu bihabanye n’ibyo atigeze asaba, ndetse rimwe na rimwe, hari ubwo abakomisiyoneri bamara gukacira ifaranga bagahindura nimero za telefoni bavuganiragaho n’abacuruzi b’i Kigali ndetse n’aho yakoreraga, bikarangira neza neza umuntu ahombye mu buryo bw’amaherere.

Urugero ruherutse muri aya manyanga akorerwa abacuruzi bo mu Rwanda ni urw’umucuruzi wibwe 200 000$ (arenga miliyoni 192 Frw). Uyu mucuruzi yaganiraga n’uzamugurisha imari kuri Email na Whatsapp, ndetse anasaba kugabanyirizwa igiciro barabyemera, ni ko kumuha inyemezabwishyu arishyura.

Nyuma yo kwishyura wa wundi wari bumuhe imari yaje kumwigarama, avuga ko nta mafaranga yabonye, ati ‘’niba wishyuye, ubwo wishyuye kuri konti itari yo’’, undi ahomba atyo kuko nta n’uburyo bwizewe buhari bwo kubikurikirana.

Abenshi muri aba batekamutwe bahimba ibigo bitabaho, bakabeshya abarimo abanyarwanda ko bashobora kubagezaho ibicuruzwa mu bihugu byabo kandi ku giciro kiri hasi cyane. Nk’umucuruzi rero iyo utekereje gusiga akazi ukajya mu Bushinwa kandi hari uwakuzanira ibicuruzwa mu buryo buhendutse, abenshi bahita bemera gukorana n’ibyo bigo bya baringa.

Ibi bigo biba bifite amayeri akakaye, ku buryo ubaka urugero rw’ibyo bakoze bakabikwereka, byaba na ngombwa babonye ko ibyo ukeneye harimo agatubutse, bakishyura indege izanye ingero z’ibyo bakoze bikagusanga mu gihugu cyawe, ariko wamara kwishyura ukababura.

Ku bacuruzi bose rero batifuza guhombya n’aba batekamutwe, bashobora gukorana na Sourcing International Co. Ltd, ikabafasha kuvana ibicuruzwa mu Bushinwa mu buryo bworoshye kandi bwizewe.

Bashobora kubasanga ku cyicaro cyabo giherereye Kicukiro mu mujyi wa Kigali, mu nyubako ya Kicukiro Center Plaza. Bashobora kandi kubahamagara kuri +250 784 984 148, cyangwa bakabandikira ku gasanduku k’iposita, nimero Po. BOX. 292. Kigali Rwanda.

Ku bari mu Bushinwa, na bo bashobora kubasanga mu mujyi wa Guangzhou, ku muhanda wa Guanghong Tiangqi Huali uri mu karere ka Tianhe. Bashobora kandi kubahamagara kuri +86 135 8050 9050.

Ku bakoresha ikoranabuhanga, bashobora gusanga ibindi bisobanuro byabo kuri https://isourcingservices.com, cyangwa bakabandikira kuri email ari zo: [email protected] na [email protected]sourcingservices.com

Sourcing International Co. Ltd. ifasha abanyarwanda kuvana ibicuruzwa mu Bushinwa mu buryo bwizewe, bworoshye kandi buhendutse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .