Mu Rwanda hatangijwe amasomo y’ikirenga ajyanye n’ubwenge bw’ubukorano

Yanditswe na Mukaneza M.Ange
Kuya 15 Ukwakira 2018 saa 01:10
Yasuwe :
0 0

Ikigo Nyafurika gitanga ubumenyi bushingiye ku mibare, AIMS, cyatangiye gutanga amasomo y’ikirenga ajyanye n’ubwenge bw’ubukorano(Artificial Intelligence).

Artificial Intelligence ni uburyo bwo gukora porogaramu zishyirwa muri mudasobwa, ku buryo igira ubushobozi bwo gutekereza no kwishakamo ibisubizo hadakenewe uruhare rwa muntu.

Aya masomo yiswe ‘African Masters in Machine Intelligence, AMMI’ yatangijwe kuri uyu wa 15 Ukwakira 2018, ku bufatanye bwa AIMS, Google na Facebook.

Igitekerezo cyo gutangiza aya masomo cyazanywe na Prof. Moustapha Cissé usanzwe ari Umuyobozi w’Ikigo cya Google gikora ubushakashatsi ku bwenge bw’ubukorano (Artificial Intelligence, AI) muri Ghana.

Minisitiri w’Uburezi, Dr Eugene Mutimura, yavuze ko ubu bwenge bw’ubukorano buje gushyigikira gahunda za leta y’u Rwanda, zirebana no kwifashisha ikoranabuhanga mu kurushaho kuzamura imibereho y’Abanyarwanda.

Ati “Aya masomo y’ubwenge bw’ubukorano n’ingenzi cyane kuko by’umwihariko azatanga umusanzu mu birebana n’ubuvuzi n’ imikorere ivuguruye y’inganda.”

Yakomeje agaragaza ko kandi ubwenge bw’ubukorano buzagira uruhare mu birebana no gukusanya no gusesengura amakuru atandukanye, akoreshwa n’inzego zitandukanye zifata ibyemezo, kandi abayize bazatanga umusanzu mu bushakashatsi butandukanye.

Perezida wa AIMS akaba n’Umuyobozi mukuru w’Ihuriro Next Einstein Forum, Thierry Zomahoun we yahamije ko aya ari andi amahirwe abahanga muri siyansi babonye ngo barusheho kuzana ibisubizo byatuma Afurika irushaho gutera imbere.

Ati “ Murabizi ko abantu basaga miliyari 2 batabasha kugera ku buvuzi burimo no kubagwa, twakoresha AI mu kurushaho kunoza ubuvuzi, tukagabanya ikiguzi cy’ubuvuzi muri Afurika. Mu gihe tuvuga ubwenge karemano ariko ntibisobanuye ko ikoranabuhanga rizakora akazi kose ka muntu.”

Prof. Moustapha Cissé yagaragaje ko kubera uburyo aya masomo usanga yigishwa mu Burayi na Amerika cyane, byatumaga abajya kuyiga bahendwa n’ibisubizo bazanye ntibikemura uko bikwiye ibibazo byihariye Abanyafurika bafite.

Birimahire Ines wiga aya masomo avuga ko ubwo yarangizaga kaminuza yakoze bushakashatsi ku mibare ikoreshwa mu bwishigizi (Insurance Mathematics), kandi yabonye mu Rwanda hari amakuru menshi ariko atabyazwa umusaruro, akaba yiteze kuzahakura ubumenyi butuma yifashisha ubwenge bw’ubukorano mu guteza imbere uru rwego.

Abanyeshuri 31 baturutse mu bihugu 11 nibo bazahabwa aya masomo ya ‘African Masters in Machine Intelligence’, mu gihe cy’umwaka wose.

Biteganyijwe ko nyuma y’u Rwanda, aya masomo ahabwa abarangije kaminuza mu birebana n’imibare, ubugenge n’ikoranabuhanga azagezwa no mu bindi bihugu.

Ku ikubitiro abanyeshuri 31 baturutse mu bihugu 11 nibo bazahabwa aya masomo
Bamwe mu banyeshuri batangiye kwiga amasomo arebana n'ubuhanga bw'ubukorano (abahagaze)
AIMS Kigali niyo yaba iya mbere muri Afurika mu gutanga amasomo arebana na Artificial Intelligence
Perezida wa AIMS, Thierry Zomahoun asanga iri koranabuhanga rizarushaho guteza imbere imibereho y
Minisitiri w’Uburezi, Dr Eugene Mutimura, avuga ko bizateza imbere ubuvuzi, inganda, n'ibindi


[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza