00:00:00 IGIHE NETWORK KN KINYARWANDA EN ENGLISH FR FRANCAIS

Mu Rwanda hagiye kugeragerezwa imbuto y’ibirayi itazakenera guterwa umuti

Yanditswe na Nsanzimana Erneste
Kuya 26 July 2022 saa 08:59
Yasuwe :

’Imvura’ ni indwara y’ibirayi ihangayikisha abahinzi kuko iyo batagenzuye neza ngo batere umuti ku gihe ntacyo baramura. Iyi ndwara imaze imyaka myinshi kuko yigeze no guteza inzara y’ibirayi mu 1840.

Ibirayi ni igihingwa kitamaze imyaka myinshi mu Rwanda kuko cyazanywe n’abasirikare b’Abadage mu kinyejana cya 20. Ninaho izina ibirayi rikomoka kuko Abanyarwanda babyise ibirayi bashaka kugaragaza ko byavuye i Burayi.

Uko imyaka yagiye ishira indi igataha, abatuye urw’imisozi 1000 bahindutse inshuti z’iki gihingwa gikunda imisozi miremire, ni uko bitabira ku gihinga ari benshi bituma umusaruro wacyo wiyongera.

Mu 1961, u Rwanda rwezaga toni zitageze ku bihumbi 100 z’ibirayi ku mwaka ariko mu2005 u Rwanda rwejeje toni miliyoni 1,3 z’ibirayi.

Imibare ya Minisiteri y’ubuhinzi n’ubworozi mu Rwanda igaragaza ko umusaruro w’ibirayi wiyongereye uva kuri toni 2 240 000 mu2013, ugera kuri toni miliyoni 6 mu 2019. Ubuso buhingwaho ibirayi bwavuye kuri hegitari ibihumbi 130 mu 2010 bugera kuri hegitari ibihumbi 200.

Ibirayi ni cyo gihingwa cya kabiri mu bitera imbaraga Abanyarwanda barya ku bwinshi, inyuma y’imyumbati. Ku mwaka Umunyarwanda arya ibilo 125 by’ibirayi.

Mu Rwanda habarurwa abahinzi b’ibirayi barenga ibihumbi 70. Mu mbuto bahinga harimo Kinigi, Kirundo, Mabondo, Cruza na Sangema, gusa muri izi zose nta n’imwe ishobora kwihanganira indwara y’imvura ngo itange umusaruro idatewe umuti.

Hodari Philpe uhinga ibirayi mu Karere ka Nyaruguru, yabwiye IGIHE ko indwara y’imvura ari mbi cyane ku burayi kuko ibabura amababi wacukura mu butaka ugasanga ibirayi byazanye uduheri.

Kuri hegitari 1,5 y’ibirayi atera umuti wa DDT w’ibihumbi 100Frw atabariyemo igihembo cy’umukozi.

Mu mwaka wa 2013, nibwo abashakashatsi bo mu Bwongereza bashoboye gukora imbuto y’ibirayi ifite ubushobozi bwo guhangana n’indwara y’imvura.

Ubu bushakashatsi bari bamaze imyaka itatu babukora kuko babutabgiye mu 2010. Mu 1840 indwara y’imvura y’ibirayi yibasiye cyane iki gihingwa bituma hatera inzara y’ibirayi.

Mu rwego rwo guhangana n’indwara y’imvura yibasira ibirayi, abashakashatsi bo mu Kigo cy’Igihugu cy’Ubuhinzi n’ubworozi RAB, mu ishami ry’ibinyabijumba, bagiye gukora imbuto y’ibirayi ikoranye ubudahangarwa ku ndwara y’imvura ku buryo itasaba abahinzi gutera umuti.

Umuyobozi wa porogaramu ry’ibinyabijumba muri RAB, Dr Nduwumuremyi Athanase, yabwiye IGIHE ko icyiciro bagezeho ari icyo kubaka ahazakorerwa iyi mbuto y’ibirayi itazakenera umuti, kuko nta kwezi kurashira Ikigo cy’Igihugu gishinzwe kurengera ibidukikije REMA kibahaye uburenganzira bwo gukorera iyi mbuto ku butaka bw’u Rwanda.

Nyuma yo kubaka bazazana iyi mbuto bayigeragereze ku butaka bw’u Rwanda barebe uko yitwara. Kugeza ubu ibihugu birimo Kenya na Uganda byamaze kugeragereza iyi mbuto ku butaka bwabyo n’ubwo bitarayiha abahinzi ngo batangire kuyihinga.

Indwara y’imvura mu birayi mu cyongereza yitwa Mildou. Mu guhangana n’iyi ndwara abahinzi bo mu Rwanda bakoreshaga detane na redomyl bagatera umuti buri cyumweru.

Ikigo mpuzamahanga gikora ubushakashatsi ku birayi, Potato International Center cyakoze iyi mbuto gikoresheje uburyo bwo kongera ubudahangarwa bw’iyi ndwara mu turemangingo fatizo (genetic engineering).

Nduwumuremyi ati "Iyo mbuto yakozwe bashyizemo ubudahangarwa bw’iyi ndwara, nituyigerageza hano iwacu tukabona itanga umusaruro tuzayiha abahinzi.”

Bumwe mu buryo abashakashatsi bifashisha mu gukora imbuto nshya, ni ugufata imbuto abaturage basanzwe bahinga bakayibangurira ku mbuto ifite ubudahangarwa kugira ngo ubwo budahangarwa bwinjire mu mbuto basanzwe bahinga.

Iyi mbuto ya ’Victoria potato’ yamaze kugeragezwa muri Kenya no muri Uganda ntabwo izakuraho imbuto Abanyarwanda basanzwe bahinga zirimo Kinigi, Mabondo, na Cruza, ahubwo izi mbuto nizo RAB izongeramo ubudahangarwa byera bidatewe umuti.

Mbere yo kuyiha abahinzi ngo batangire kuyihinga RAB, izafatanya n’Ikigo cy’igihugu gikora ubugenzuzi bw’ibiribwa n’imiti RFDA na RISA barebe niba nta ngaruka ibyo birayi byagira ku baturage.

U Rwanda ruri gutegura itegeko rigenga umutekano w’ibinyabuzima (bio safety law), iri tegeko niryo rizagena imikorere y’ibigo by’ubushakashatsi bihindura uturemangingo tw’ibinyabuzima, rinatange umurongo ku bigenderwaho ngo ibyavuye muri ubwo bushakashatsi bigezwe mu baturage.

Mu gihe iri tegeko ryakwihutishwa iyi mbuto y’ibirayi itazakera guterwa umuti yagezwa ku bahinzi bo mu Rwanda mu gihe kitageze ku myaka itatu.

Mu Rwanda hagiye kugeragerezwa imbuto y’ibirayi itazakenera guterwa umuti nk'uko bimeze ku zisanzwe zihingwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .