00:00:00 IGIHE NETWORK KN KINYARWANDA EN ENGLISH FR FRANCAIS

Miss Shanel yabengutse inzu ya Kinyarwanda yahanzwe n’uwitabiriye ArtRwanda-Ubuhanzi

Yanditswe na Israel Ishimwe
Kuya 11 September 2022 saa 05:58
Yasuwe :

Ndatimana Damascène ni umwe mu banyempano bitabiriye Irushanwa rya ArtRwanda-Ubuhanzi mu Karere ka Rusizi, aho yahatanye mu Cyiciro cy’Abanyabugeni.

Uyu musore yaserutse afite ibihangano bitandukanye yakoze birimo ibyerekana ibishushanyo mbonera by’inzu za cadastre, imitako y’ubwoko butandukanye ishobora gushyirwa mu nzu n’ibindi birimo inzu ya Kinyarwanda.

Iyi nzu ya Kinyarwanda yayihanze yifashishije ibikoresho bitandukanye birimo ishinge n’imigano.

Imbere y’akanama nkemurampaka, Ndatimana yerekanye ibyo yakoze birimo n’inzu ya Kinyarwanda, yabengutswe na Miss Shanel uri mu bakagize.

Nyuma yo guha uyu musore amanota, Miss Shanel, inzobere irambye mu muziki na sinema yakibengutse arakigura.

Yabwiye IGIHE ko yayikunze akifuza kuyigura. Yagize ati “Nakunze inzu ya Kinyarwanda kuko nabonye ko nayigishirizaho abana. Bayigiraho umuco Nyarwanda.’’

Inzu ya Kinyarwanda Miss Shanel yaguze, yagitanzeho ibihumbi 10 Frw. Yakomeje ati “Igiciro cy’igihangano sinakirebera ku ngano y’amafaranga. Nibakomereze aho bakora ibikoresho abantu bakigiraho umuco wabo kuko ni byiza. Iyo utazi aho uva ntumenya aho ugana. Ni byiza cyane.’’

Yavuze ko uwahanze igihangano bamushishikarije gukomeza gukora izindi nzu cyangwa inka ku buryo agira ibintu gakondo abana bajya babikinisha.

Ati “Nk’uko abana bakinisha inzu zo muri filime nka Disney Walt bakwiye no kugura ibikinisho birimo umuco gakondo. Twamuhaye imbaraga ko ibintu akora ari byiza kandi bigatuma akomeza gushaka ibindi.

Ndatimana Damascène ni umunyabugeni, ufite impano yo gushushanya ibihangano bitandukanye. Yakoze inzu ya Kinyarwanda, yubakishije ubwatsi, ifite n’uruzitiro.

Yavuze ko ari yabitekereje nk’uburyo bwo gutanga umusanzu we mu “gusigasira umuco Nyarwanda”.

Ubusanzwe inzu ya Kinyarwanda yubakishwaga imiganda igizwe ahanini n’umusave, umubirizi n’umuvumu. Hakoreshwaga imbariro zigizwe n’imisekere, imbingo, imbabaza, imisororo, iminaba, imitiritiri, imicundura, imikindo, cyangwa imishurushuru.

Yari ifite umwihariko kuko yubakwaga ku buryo ishobora gushyuha mu gihe cy’ubukonje, cyangwa igakonja mu gihe cy’ubushyuhe nta kindi gikoresho cyifashishijwe.

Ibice by’imbere muri iyo nzu bigizwe n’inkomanizo z’umuryango, imfuruka ebyiri, umugendo, uruhimbi, ikirambi, urubumbiro, ku rwuririro, uburiri, igisasiro, ivure, akagege, mu mirambizo, mu mbere.

Amwe mu mazina y’inkingi harimo nk’inkingi ya kanagazi, iya mbonabihita, iy’akagege, iy’amacumu, iy’imbere, iy’indamurano, iy’isoni n’inkingi y’iziko.

Mu gice cy’inyuma cy’inzu cyabaga kigizwe n’irebe ry’umuryango, igitabo cy’inkomane, igitabo cya nyirantarengwa, uruhamo rw’umuryango, ibibero by’inzu, agasongero n’amashyoro.

Mu Ntara y’Iburengerazuba, ahagaragaye igihangano cy’inzu ya Kinyarwanda, hahatanye abanyempano 131, muri bo 46 ni bo bakomeje mu kindi cyiciro.

Nyuma y’amarushanwa yo ku rwego rw’intara yabereye mu Burasirazuba, Iburengerazuba, Amajyepfo n’Amajyaruguru, agiye gukomereza mu Mujyi wa Kigali ku wa 13-15 Nzeri 2022.

ArtRwanda-Ubuhanzi iri kuba ku nshuro ya kabiri ni irushanwa rigamije gushakisha no gushyigikira urubyiruko rufite impano. Izenguruka igihugu hashakishwa abanyempano mu Bugeni, Indirimbo n’Imbyino, Imideli, Ikinamico n’Urwenya, Filimi no Gufata Amafoto, Ubusizi n’Ubuvanganzo.

Kanda hano urebe andi mafoto menshi y’amarushanwa yabereye mu Karere ka Rusizi.

Ndatimana Damascène yakoze inzu ya Kinyarwanda ndetse iri mu bihangano yamuritse imbere y'abagize akanama nkemurampaka
Miss Shanel ni umwe mu bagize Akanama Nkemurampaka ka ArtRwanda-Ubuhanzi
Ndatimana yari yanitwaje ibindi bihangano birimo n'imitako itandukanye ishobora gushyirwa mu nzu

Amafoto: ArtRwanda-Ubuhanzi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .