Minisitiri Shyaka yasabye Akarere ka Gisagara kwihutira kubakira abasembera mbere yo kubaka ibiro

Yanditswe na Prudence Kwizera
Kuya 24 Kanama 2020 saa 12:49
Yasuwe :
0 0

Minisitiri w’Ubutegetsi bw’Igihugu, Prof Shyaka Anastase, yasabye ubuyobozi bw’Akarere ka Gisagara kwihutisha ibikorwa byo kubakira imiryango itagira aho kuba mbere yo gutekereza kubaka inyubako y’Ibiro by’Akarere.

Yabivuze kuri iki Cyumweru tariki ya 23 Kanama 2020 ubwo yari mu Murenge wa Muganza aho yahuye n’abaturage bahagarariye abandi ndetse n’abayobozi b’inzego z’ibanze mu mirenge ya Muganza, Mugombwa, Mukindo, Gishubi, Kigembe, Nyanza na Mamba, baganira uko bafatanye mu kwiteza imbere no kugera ku mibereho myiza.

Abaturage bo muri ako Karere bashimye byinshi Leta imaze kubagezaho ndetse n’ibyo nabo bigejejeho bashingiye ku mutekano uri mu gihugu ndetse n’inama bagirwa n’ubuyobozi.

Mu bibazo byagaragajwe hari icy’imiryango 426 igisembera kugeza ubu kuko idafite aho kuba. Hagaragajwe kandi ko mu turere twose tugize Intara y’Amajyepfo, aka Gisagara ari ko katagira inyubako igezweho yo gukoreramo.

Umuyobozi w’Akarere ka Gisagara, Rutaburingoga Jérôme, yavuze ko kavuye kure kuko mu 2012 bari bafite inzu za nyakatsi 11 600 bingana na 15% b’ingo zose.

Yavuze ko bagitangira gukemura ikibazo cy’abatagira aho kuba bari bafite ingo zigera ku 2332 zisembera, muri zo 1906 zingana na 81% zarubakiwe, hasigaye imiryango 426.

Ati “Uyu mwaka wonyine twubakiye ingo zisaga 500; izigera kuri 426 zisigaye ntabwo zatunanira dufatanyije.”

Yavuze kandi ko imiryango igera ku 2088 yari idafite ubwiherero yafashijwe kububona, kuri ubu hasigaye irenga 1000 kandi nayo iri gufashwa.

Minisitiri Shyaka yavuze ko mbere na mbere hihutishwa ibikorwa byo kubakira abaturage, naho iby’inyubako y’akarere bikaza nyuma.

Ati “Murashaka ko Akarere kabona ibiro bisobanutse? Nimubanze mwese uwo muhigo rero (kubakira abatagira aho kuba). Nimumara kwesa uwo muhigo rwose meya azatubaze, […] ariko tureke kuvuga ngo tugiye kubakira akarere kandi abaturage bo bamerewe nabi.”

Yasabye kandi ko hihutishwa no gukemura ikibazo cy’imiryango irenga 1000 itagira ubwoherero kugira ngo nayo ibubone, isuku yimakazwe muri byose.

Minisitiri Shyaka yasabye abayobora inzego zitandukanye mu Karere ka Gisagara kwita by’umwihariko ku iterambere n’imibereho myiza y’abaturage, gucunga umutekano no kuwubungabunga cyane cyane ku mupaka kuko u Rwanda rutavogerwa.

Minisitiri Shyaka yasabye ko hihutishwa no gukemura ikibazo cy’imiryango irenga 1000 itagira ubwoherero
Minisitiri Shyaka hamwe n'abandi bayobozi bagiranye ibiganiro n'abaturage bahagarariye abandi mu Karere ka Gisagara
Minisitiri Shyaka yasabye abayobora inzego zitandukanye mu Karere ka Gisagara kwita ku iterambere n’imibereho myiza y’abaturage

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .