Miliyari 2 Frw zashowe mu bikorwa byo gukumira isambanywa ry’abangavu mu turere tune

Yanditswe na Prudence Kwizera
Kuya 14 Kanama 2020 saa 10:00
Yasuwe :
0 0

Hagamijwe kwigisha abakobwa b’abangavu ibijyanye n’ubuzima bw’imyororokere no gukumira ihohoterwa rishingiye ku gitsina bakorerwa ndetse no kubarinda guterwa inda z’imburagihe, hatangijwe umushinga ugamije gukumira kubasambanya.

Ni umushinga urimo gukorerwa mu Turere tune twa Gisagara, Nyaruguru Nyanza na Karongi. Washowemo amafaranga agera kuri miliyari ebyiri, ukorana n’abangavu b’abanyeshuri 5600 barimo abagera kuri 224 bafite ubumuga, abakobwa babyariye iwabo 480 n’abafashamyumvire 280.

Biteganyijwe ko uzagera no ku ngimbi z’abanyeshuri 2600 no ku bagabo n’abagore ibihumbi 46 bo muri utwo turere.

Ni gahunda iri gukorwa mu mushinga witwa Speak Out bishatse kuvuga ngo ‘ihohoterwa turivuge, ntituriceceke’ w’Umuryango Mpuzamahanga ukorera mu Rwanda witwa Action Aid Rwanda, ukora ufatanyije n’abandi bafatanyabikorwa n’inzego zitandukanye za Leta.

Umukozi wa Action Aid muri uwo mushinga, Najjingo Robinah, yavuze ko bafite intego yo gufasha abangavu kwimenya kuko ari kimwe mu bizakumira ihohoterwa bakorerwa.

Ati “Ni umushinga uzamara imyaka ine, watangiye gukorera mu Turere twa Karongi, Gisagara, Nyanza na Nyaruguru. Washomemo amayero 1,770,088.77 (agera kuri miliyari 2 Frw). Tuzakorana by’ako kanya n’abantu 5600 ariko umushinga uzagera ku baturage barenga ibihumbi 46.”

Ubwo bagiranaga ibiganiro n’abangavu 60 bo mu Murenge wa Ruheru mu Karere ka Nyaruguru, bagaragaje ko bungutse byinshi ku buzima bw’imyororokere, bityo bizabarinda kugwa mu bishuko by’abashobora kubasambanya.

Yankurije Léoncia ati “Namenye uko nzajya mbara igihe cy’ukwezi kwanjye. Bizandinda ibishuko by’abagabo kuko hari abajyaga bambwira ko iyo ngiye mu mihango nkababara mu nda bikizwa no kuryamana n’umuhungu ariko baduhuguye batubwira ko atari byo.”

Mukeshimana Jeannette we yavuze ko inyigisho yahawe ziyongereye ku nama yagiriwe n’ababyeyi be, bityo bimwongereye imbaraga zo kwirinda kugwa mu bishuko.

Ati “Njyewe nakuze ababyeyi banjye banganiriza bakangira inama yo kwirinda abanjyana mu ngeso mbi z’ubusambanyi. Ibyo twize hano bimfashije kumenya imiterere y’umubiri wanjye kandi batwigishije ko tugomba kujya twirinda abasore n’abagabo badusaba kujya kubasura.”

Umuyobozi ushinzwe Uburinganire n’Iterambere ry’Umuryango mu Karere ka Nyaruguru, Murebwayire Maureen, yabwiye IGIHE ko ibikorwa byo kwigisha abangavu ibijyanye n’ubuzima bw’imyororokere babyitezeho umusaruro mwiza.

Ati “Kuva muri Nyakanga umwaka ushize kugeza ubu dufite abangavu 310 batewe inda imburagihe bari hagati y’imyaka 15 na 20. Muri iki gihe cya COVID-19 ni ukuvuga kuva mu kwezi kwa gatatu kugeza uyu munsi, dufite abangavu 92 bamaze kubyara. Ibi bikorwa by’abafatanyabikorwa rero tubitezeho kugabanya iyo mibare y’abana baterwa inda imburagihe.”

Umwe mu batanze ikiganiro ku bangavu, Ndayisaba Eric, usanzwe ari Umuhuzabikorwa wungirije muri Association Modeste et Innocent (AMI) yavuze ko kimwe mu bibazo bikomeye bafite ari uko batiyizi.

Ati “Icyo twabonye ni uko batiyizi, ntabwo bazi imibiri yabo kuriya igenda ihindagurika no kuba batazi cyane cyane ukwezi kwabo uko bakubara n’uburyo bakwiriye kwirinda. Twabafashije rero kubimenya no kumenya imyitwarire ishobora kubashyira mu kaga bakaba batwara inda z’imburagihe.”

Abangavu bagiriwe inama yo kujya batinyuka kubaza ababyeyi babo ibyo badasobanukiwe kandi igihe bahuye n’ihohoterwa bakihutira kubimenyesha ababarera n’ubuyobozi n’Urwego rw’Ubugenzacyaha, RIB, ako kanya bikiba kugira ngo barindwe gutwara inda cyangwa kwanduzwa indwara.

Abangavu bo mu Murenge wa Ruheru bahawe inyigisho ku buzima bw'imyororokere basabwa kwirinda ibishuko bibashora mu busambanyi
Gahunda yo kwigisha abangavu kwirinda ibishuko izamara imyaka ine
Ndayisaba Eric yavuze ko kimwe mu bibazo bikomeye abangavu bafite ari uko batiyizi
Nyuma yo kwigishwa bavuze ko hari byinshi bungutse batari basanzwe bazi
Abangavu bagaragaje ko aho batuye n'aho banyura bakunze guhura n'ibishuko by'abashaka kubasambanya
Bamwe mu bangavu bashyizwe mu matsinda basubiza ibibazo bijyanye n'ibyo bigishijwe ku buzima bw'imyororokere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .