Meze neza nta kibazo mfite mu mubiri - Minisitiri Dr Ngamije wakingiwe Covid-19

Yanditswe na Mukahirwa Diane
Kuya 5 Werurwe 2021 saa 03:39
Yasuwe :
0 0

Minisitiri w’Ubuzima, Dr Ngamije Daniel, yabaye umwe mu bayobozi bakuru b’igihugu babimburiye abandi banyarwanda gukingirwa Covid-19, avuga ko yiyumva ameze neza mu mubiri ku buryo n’abanyarwanda bose bakwitabira kwakira uru rukingo nk’uko inzego nkuru z’igihugu zikomeje kubibashishikariza.

Mu gihugu hose kuri uyu wa Gatanu hatangiye ibikorwa byo gutanga icyiciro cya mbere cy’urukingo rwa Covid-19, rugiye guhabwa abanyarwanda bafite ibyago byo kwandura iki cyorezo kurusha abandi.

Minisitiri Dr Ngamije uri mu bahawe uru rukingo, yavuze ko nta kibazo na kimwe yigeze yumva mu mubiri we ari nayo mpamvu abaturage badakwiye kugira ubwoba ubwo aribwo bwose cyane ko izi nkingo zizewe.

Ati “Maze iminota 30 maze gukingirwa, ndumva meze neza nk’uko namwe mubibona, mvuye hariya hepfo ngera hano ngenda n’amaguru, ni ukuvuga ko nta kibazo na kimwe mfite mu mubiri.”

Mbere yo gukingirwa, uhabwa urukingo abanza gusobanurirwa imiterere yarwo, anahabwa inyandiko agomba kuzuza yemera ko ahawe urukingo, bakamusiga umuti ku rutugu [ahaterwa urushinge], yamara kuruterwa akajya ahantu habugenewe agomba gutegerereza iminota 15 ishira akabona kugenda.

Minisitiri Dr Ngamije ati “Numva rero nk’uko twabisobanuye, uru rukingo ruziye igihe kandi mwabonye ko abakozi bahuguwe uko bagomba kurutanga, bari gusobanurira umuntu ikigiye gukorwa, bakagusobanurira uko urukingo ruterwa n’igipapuro ushyiraho umukono kugira ngo wemere serivise ugiye guhabwa.”

Yakomeje agira ati “Uramutse ugize ikibazo icyo aricyo cyose hari abantu biteguye kugira icyo batumarira, ibikoresho byose birahari, abaganga barahari, nta kibazo kugeza ubu dufite ndetse no hirya no hino mu gihugu twatangiye gukingira kandi abantu barimo kubyitabira.”

Uretse Minisitiri w’Ubuzima wakingiwe kandi hari n’Uhagarariye Ishami ry’Umuryango w’Abibumbye ryita ku Buzima, OMS, mu Rwanda ndetse n’Uhagarariye Ishami ry’Umuryango w’Abibumbye ryita ku Bana, UNICEF, Umuyobozi Mukuru w’Ibitaro bya Masaka n’abandi biganjemo abaganga.

Minisitiri Dr Ngamije yakomeje agira ati “Ndashishikariza abanyarwanda bose kugira ngo buri wese watumiwe kugira ngo abone uru rukingo, aya mahirwe atayitesha, abantu bere kugendera ku bihuha, uru ni urukingo rwemewe, rwujuje ibyangombwa rumaze gukoreshwa mu bihugu byinshi."

Minisitiri w'Ubuzima, Dr Ngamije Daniel, ubwo yakingirwaga
Uhabwa urukingo abanza gusobanurirwa akuzuza n'inyandiko igaragaza ko aruhawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .