Meya wa Nyamagabe yagaragaje ibikwiye kuzibandwaho muri manda itaha ku bazayobora aka karere

Yanditswe na Prudence Kwizera
Kuya 7 Ukuboza 2020 saa 01:30
Yasuwe :
0 0

Mu myaka igera kuri itanu ishize Akarere ka Nyamagabe kakunze kuza mu myanya ya nyuma mu kwesa neza imihigo no muri gahunda zitandukanye zigamije iterambere n’imibereho myiza y’abaturage.

Hasigaye amezi arindwi ngo hatorwe abayobozi bashya kuko manda y’abayobozi b’uturere yatangiye mu 2016 iri kugera ku musozo.

Ibipimo byerekana ko mu mwaka w’imihigo wa 2016/2017 akarere ka Nyamgabe kasubiye inyuma imyanya 22, kaje ku wa 27 n’amanota 75,55% mu gihe mu mwaka wawubanjirije wa 2015/2016 kari ku wa gatanu n’amanota 77,25%.

Aka karere kandi mu myaka yabanje kakunze kuza mu myanya ya mbere mu mihigo ndetse kigeze no kuba aka mbere.

Icyo ni kimwe mu byatumye ubuyobozi buhindurwa hashyirwaho komite nyobozi nshya ihabwa n’umukoro wo kuzamura ako karere kakava mu myanya ya nyuma.

Uwamahoro Bonaventure yatorewe kuba Umuyobozi w’Akarere ka Nyamagabe muri Gashyantare 2018, asimbuye Mugisha Philbert wahagaritswe kuri uwo mwanya mu Ugushyingo 2017 kubera amakosa yashinjwaga.

Icyo gihe uwari Guverineri w’Intara y’Amajyepfo, Mureshyankwano Marie Rose, yamubwiye ko bamwitezeho guteza imbere abaturage, akarere kakongera kuba aka mbere mu mihigo, akanita ku gukemura byihuse ibibazo by’abaturage.

Umuyobozi w’Akarere ka Nyamagabe, Uwamahoro Bonaventure, yavuze ko mu myaka ibiri amaze akayobora hari byinshi byakozwe. Muri byo harimo isoko rya kijyambere rya Gasaka ryari ryarandindiye rikaba ryaruzuye mu 2020 ritwaye miliyari 1,5 Frw no kubakira imiryango 40 y’abarokotse Jenoside batishoboye umudugudu wa miliyoni 800 Frw wari waradindiye.

Hari kandi Kubaka imiyoboro y’amashanyarazi mu Mirenge itatu itarayagiraga ariyo Musange, Mugano na Nkomane n’umuhanda wa kaburimbo mushya ujya ku rwibutso rwa Jenoside rwa Murambi wubatswe ndetse n’umuhanda wa kaburimbo Huye-Kitabi wasanwe.

Hishyuwe abaturage bari bamaze igihe basiragira bishyuza mafaranga bakoreye bubaka Ibiro by’Akarere; abasaba ingurane z’ubutaka bwabo, abatwariwe inka ndetse n’abasabaga guhabwa ingurane z’ibyabo byangijwe ubwo hubakwaga ibikorwa remezo.

Mu mwaka w’imihigo wa 2019/2020 Akarere ka Nyamagabe kaje ku mwanya wa 20.

Mu Kiganiro n’Abanyamakuru, Umuyobozi w’Akarere ka Nyamagabe, Uwamahoro Bonaventure, yavuze ko baherutse gukora umwiherero w’Inama Njyanama basanga basanga muri manda itaha ubuyobozi bukwiye kwibanda ku bikorwa remezo; gushishikariza abaturage kugira uruhare mu iterambere no gusigasira ibyagezweho no kwita ku bibazo bibangamiye abaturage birimo umwanda.

Yavuze ko basanze muri manda itaha ibyo bikwiye gushyirwamo ingufu n’abayobozi bazatorwa ku buryo bizafasha mu rugendo rwo kubaka amateka mashya y’Akarere ka Nyamagabe ntihahore havugwa ko inzara n’ubukene gusa.

Ati “Nizera ko mu kiganiro nk’iki kizaba muri manda y’umwaka utaha nta munyamakuru wakongera kubaza ngo amateka y’Akarere ka Nyamagabe y’ubukene cyangwa y’inzara kubera ko hari amateka mashya turi kubaka, akaba ariyo atangira kuvugwa kurusha ko twagumya buri gihe kujya twisobanura duhereye ku mateka mabi y’igihe cyashize.”

Mu mirenge itandukanye y’Akarere ka Nyamagabe hari henshi hataragera imihanda, amashanyarazi n’amazi meza. Mu Karere hose amazi meza ari ku kigero cya 84% naho abafite amashanyarazi ni 42% harimo aturuka ku miyoboro migari angana na 26% n’aturuka ku ngufu z’izuba angana na 16%.

Mu Karere ka Nyamagabe hakunze kugaragara abantu benshi barwara indwara zituruka ku mwanda kuko imibare iheruka yerekana ko mezi 10 ya 2020 mu mirenge icyenda yivuriza mu ku Bitaro bya Kaduha abasaga ibihumbi 46 bari barwaye indwara zirituka ku isuku nke.

Muri Gashyantare 2019 mu mirenge imwe n’imwe y’ako karere hagaragaye indwara y’ibiheri ku ruhu yibasiye abaturage, nyuma haza kuvumburwa ko iterwa n’umwanda.

Kuri ubu abayoboye Nyamagabe bari gusoza manda yabo ni Meya Uwamahoro Bonaventure wungirijwe na Kabayiza Lambert ushinzwe iterambere ry’ubukungu ndetse na Mujawayezu Prisca ushinzwe imibereho myiza y’abaturage.

Inyubako y'Ibiro by'Akarere ka Nyamagabe
Umuyobozi w’Akarere ka Nyamagabe, Uwamahoro Bonaventure, yavuze ko mu myaka ibiri amaze akayobora hari byinshi byakozwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .