Kutagira ibyemezo by’ubuziranenge ku bavuzi gakondo biracyagabanya icyizere ku babagana

Yanditswe na N.Kubwimana Janvière
Kuya 21 Ukwakira 2019 saa 03:22
Yasuwe :
0 0

Abibumbiye mu rugaga rw’abavuzi gakondo bo mu Ntara y’amajyaruguru bavuga ko kuba batagira icyemezo cy’ubuziranenge kizwi nka S-Mark, bikiri imbogamizi ikomeye ituma bagabanyirizwa icyizere ku babagana.

Mu Ntara y’Amajyaruguru habarurwa abavuzi gakondo barenga 300 ariko muri bo 71 nibo bonyine bibaruje mu rugaga rw’abavuzi gakondo bakora ku buryo bwemewe n’amategeko, mu gihe mu gihugu habarurwa abasaga 1400.

Bamwe mu bakora uyu mwuga wo kuvura ku buryo bwa gakondo bavuga ko kuba batagira ibyemezo by’ubuziranenge ku miti yabo bituma ababagana babagabanyiriza icyizere ndetse n’imiti yabo ntigurishwe ku ruhando mpuzamahanga.

Mwungeri Christian ni umwe muri bo yagize ati “Ducuruza imiti ya gakondo ivura indwara zitandukanye, gusa turacyafite ikibazo cyo kutagira S-Mark, usanga abakugurira neza ari abo muziranye, ariko abandi bisaba kubigisha cyane, kubera impungengenge baba bafite ko itemewe, ikindi bituma tutayicuruza ku ruhando mpuzamahanga dusaba ko RSB yadufasha kubona ibyo byangombwa tugakora nta rwikekwe ku batugana”.

Uhagarariye urugaga rw’abavuzi gakondo mu Rwanda Nyirahabineza Gerturde, avuga ko gutinda kw’ibi byangombwa biterwa n’akajagari kakigaragara mu mwuga wabo.

Yagize ati “Iki kibazo cyo kuduha ibyemezo by’ubuziranenge twakigejeje kuri RSB, gutinda kwabyo byatewe n’uko mu mwuga wacu hakirimo akajagari ka ba rusahurira mu nduru bagikorera mu bwihisho badashaka kwibaruza ngo bakore mu buryo bwemewe, nibyo turimo gukosora nibimara kujya mu murongo nta kabuza tuzabihabwa”.

Umuyobozi w’ishuri rikuru ry’ubumenyi ngiro rya INES-Ruhengeri Padiri Hagenimana Fabien, avuga ko icyo bafasha abavuzi gakondo ari ugukora ubushakashatsi.

Yagize “Mu byo tubafasha kugira ngo ibyo byangombwa by’ubuziranenge babibone mu buryo bukwiye ni ugukora ubushakashatsi muri Laboratwari ku byo bakora, ikindi twashyizeho ubusitani bwa hegitari ebyiri buhinzemo ubwoko bw’imiti irenga 300, byose bibafasha gukora mu buryo bwa kinyamwuga babungabunga amagara y’ababagana”.

Ibi byifuzo by’abavuzi gakondo byagarutsweho ubwo hasozwaga amahugurwa yamaze iminsi itatu yaberaga mu ishuri rikuru ry’ubumenyi ngiro rya Ines-Ruhengeri yahuje abavuzi gakondo bagera kuri 50.

Aya mahugura yari agamije kongerera ubumenyi abavuzi gakondo no gukora kinyamwuga

Abavuzi gakondo bahawe amahugurwa ku buryo bwo kongera ubumenyi mu mwuga wabo
Abavuzi gakondo bafashijwe gukora ubushakashatsi ku miti bifashishije Laboratwari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza