Kirehe: Ishyamba rya Ibanda-Makera rigiye kugirwa icyanya cy’ubukerarugendo

Yanditswe na Niyitanga Jean Paul
Kuya 17 Ugushyingo 2020 saa 02:37
Yasuwe :
0 0

Ishyamba kimeza rya Ibanda-Makera riherereye mu Kagari ka Nasho, Umurenge wa Mpanga mu Karere ka Kirehe ringana na hegitari 169 ririmo gutegurirwa kugirwa ahantu nyaburanga hakurura abakerarugendo.

Iri shyamba ririmo inyamaswa zitandukanye, n’ubwoko 124 bw’ibiti, ibishanga bikomoka k’umugezi w’Akagera n’akagezi ka Makera.

Muri iri shyamba kandi harimo inyamaswa z’ubwoko butandukanye nk’inkende, inkima, inzoka, isatura, ingwe, isha n’inyoni. Ibigaragaza ko aha hantu haramutse hagizwe nyaburanga hakurura abakerarugendo binjiriza igihugu amadevize.

Umuturage uturiye isi shyamba witwa Mbabariye François ahamya ko ajya abonamo inyamaswa nyinshi. Ati “Iri shyamba ndarizi kuko ndarituriye, ribamo inyamaswa nyinshi.”

Umuyobozi ushinzwe kwita ku bidukikije mu Karere ka Kirehe, Octavien Ngirabakunzi yabwiye The NewTimes ko kuri ubu bari gusigasira iri shyamba no kurisubiza umwimerere waryo dore ko hari aho ryari ryarangijwe n’ibikorwa by’abaturage.

Ati "Ni hamwe mu hantu habereye ubukerarugendo dufite muri Kirehe. Icyo turi gukora ni ugusubiza iri shyamba ku mwimerere waryo tubuza abantu kuryangiza, turizitira, twongeramo n’ibindi biti."

Yakomeje agira ati “Iri shyamba nubwo atari rinini nka Nyungwe cyangwa Gishwati, ntibyaribuza kuba ahantu nyaburanga hakurura abakerarugendo. Kandi rigomba gusigasirwa kubera inyamaswa zirimo.

Umukozi ushinzwe kumenyekanisha ibikorwa by’imishinga ikorera mu Kigo cy’Igihugu cyo kubungabunga ibidukikije (REMA) Cyprien Ngendahimana yabwiye IGIHE ko REMA yakoze akazi gakomeye mu gusubiza iri shyamba umwimerere.

Yagize ati: “Hari ibikorwa byakozwe byo kurisubiza umwimerere kuva muri 2017 binyuze mu bufatanye hagati y’Akarere ka Kirehe n’Ikigo cy’Igihugu Gishinzwe kwita ku Bidukikire (REMA), mu bikorwa byakozwe harimo ibiti bivangwa n’imyaka byahinzwe muri Mushongi kuri hegitari 250, mu ishyamba uko ari hegitali 68 hahinzwemo ibiti by’ishyamba ndetse n’inyamaswa zagarutsemo kubera ko hari hamaze gukorwa ibikorwa byo kurisanasana.”

Uretse ibyo kandi, ngo hari na hegitari 20 zateweho ibiti by’imbuto ziribwa byahawe abaturage binyuze mu mishinga REMA yafatanyijemo n’Akarere ka Kirehe.

Kuri ubu nyuma y’uko ishyamba risubijwe umwimerere, ngo hari gahunda y’uko abavumvu bishyize hamwe bagiye guterwa inkunga na REMA.

Nyuma y’ibi byose, ngo hari undi mushinga ugiye gutangira uzaba ugamije guhangana n’imihindagurikire y’ikirere nawo uzaza gutanga undi musanzu mu gukomeza kongerera umwimerere ishyamba rya Ibanda-Makera.

Nubwo bimeze bitya ariko iri shyamba ngo riracyatemwa n’abantu baba bashaka gutwikamo amakara yo gucana no kugurisha, ubu hakaba harimo gukorwa ubukangurambaga bugamije gufasha abaturage gukoresha ubundi buryo bwo gucana badakoresheje ibiti.

Ishyamba rya Ibanda-Makera riri mu Karere ka Kirehe rigiye kugirwa ahantu nyaburanga hakurura abakerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .