Isura ya Nyamagabe nyuma y’uko Coronavirus ihageze hagafatwa ingamba zikomeye

Yanditswe na Prudence Kwizera
Kuya 10 Nzeri 2020 saa 09:48
Yasuwe :
0 0

Hagati mu kwezi kwa Nyakanga 2020 mu Karere ka Nyamagabe hagaragaye abantu banduye icyorezo cya COVID-19 bituma hafatwa ingamba zitandukanye zigamije gukumira ikwirakwira ryacyo zirimo no gushyira tumwe mu tugari muri gahunda ya Guma mu Rugo.

Icyo gihe Minisiteri y’Ubutegetsi bw’Igihugu yatangaje Akagari ka Kigeme mu Murenge wa Gasaka n’aka Ruhunga mu Murenge wa Kibilizi dushyirwa muri gahunda ya Guma mu Rugo.

Nyuma y’iminsi ibiri tariki ya 16 Nyakanga 2020 Ibitaro bya Kigeme bikorera muri ako Karere byahise bigarika serivise ku baza kubyivurizamo bataha kuko hari hagaragaye umuforomo n’umuganga banduye COVID-19. Abaganga n’abakozi bose babikoramo bahise bashyirwa mu kato mu macumbi y’Ikigo cy’Amashuri cya G.S Kigeme A kugira ngo babanze basuzumwe.

Nyuma yaho ku wa 21 Nyakanga 2020 Ubuyobozi bw’Akarere ka Nyamagabe bwamenyesheje abaturage ko bubaye buhagaritse igikorwa cyo kwakira ibibazo by’abo ku rwego rw’Akarere kugira ngo hirindwe ikwirakwira ry’icyorezo cya COVID-19.

Umuyobozi w’Akarere ka Nyamagabe, Uwamahoro Bonaventure, yabwiye IGIHE ko ingamba zitandukanye zafashwe zirimo kwigisha abaturage kwirinda, gushyira mu kato abakekwa ko banduye no guhana abarenga ku mabwiriza, zatanze umusaruro kuko nta bwandu buheruka kugaragara.

Ati “Ingamba zagiye zifatwa ziri mu byadufashije gukumira ubwandu. Duheruka ubwandu bwa nyuma ku itariki 17 z’ukwa Karindwi, hashize igihe kirekire rero.”

Yasobanuye ko utugari twa Kigeme na Ruhunga twari twashyizwe mu kato twavanywemo hasigara umudugudu wa Gakoma wo mu Kagari ka Kigeme, uwo mudugudu ni wo ubamo impunzi z’Abaturage bo muri Repubulika Iharanira Demokarasi ya Congo. Gusa yavuze ko uwo mudugudu na wo uri gukorerwa isesengura kugira ngo uvanywe mu kato kuko nta bwandu bushya buhaheruka.

Abaganga, abaforomo n’abakozi b’Ibitaro bya Kigeme bari bashyizwe mu kato nabo bavanywemo nyuma y’ibyumweru bibiri bamaze gufatwa ibizamini bibiri bagasanga ari bazima. Abakenera serivise muri ibyo bitaro bongeye gukomorerwa nk’uko byari bisanzwe.

Uwamahoro yavuze ko uduce twagaragayemo abantu banduye ari mu Bitaro bya Kigeme habonetse abantu babiri barimo umuganga n’umuforomo ndetse n’abarwayi batatu bari baharwariye; mu Nkambi ya Kigeme no mu Kigo Ngororamuco kiri mu murenge wa Gatare.

Umwihariko mu Kigo Ngororamuco cya Nyamagabe

Umuyobozi w’Akarere ka Nyamagabe, Uwamahoro Bonaventure, yavuze ko mu Kigo Ngororamuco bafite mu Murenge wa Gatare hafite umwihariko kuko hagaragaye abana benshi banduye COVID-19.

Ati “Nta bwandu bushya buheruka ariko ubwo twabonye busa n’aho buzamutse ni ubwandu bwari buri mu gice cya Gatare muri kiriya kigo kigororerwamo abana n’abakozi bahakoraga cyangwa se Abapolisi babarindaga.”

Yavuze ko imibare y’abana bagaragayeho ubwandu atayibuka neza ariko abakozi banduye bagera kuri 16.

Ati “Mu kigo cya Gatare twari dufitemo abakozi banduye 16 n’abana barimo imbere bo bari na benshi ariko nabo ubu bamaze gukira ku buryo ubu hasigaye abagifite ubwandu nka 19.”

Nta kwirara

Umuyobozi w’Akarere ka Nyamagabe, Uwamahoro Bonaventure, yavuze ko kugeza ubu hari abantu 23 bagaragayeho ubwandu bwa COVID-19 bari kwitabwaho ariko abenshi ari ababa baturutse mu tundi turere tutaragira uburyo bwo kubakira.

Yavuze ko kuba nta bwandu bushya buheruka bitavuze ko bagomba kwirara, ahubwo ari umwanya mwiza wo gukaza ingamba kugira ngo icyorezo kitazongera kubinjirana mu Karere.

Yavuze ko isomo bamaze kubona ari uko kwirinda Coronavirus bishoboka kandi abantu bashyize hamwe bakabyubahiriza babigeraho.

Uwamahoro yavuze ko uburyo bwashyizweho bwo kwirinda bwakurikiwe no gufata ibipimo byinshi bigera ku 8000 harebwa uko abantu bahagaze kugira ngo niba hari abanduye bakurikiranywe hakiri kare.

Abafungura utubari barahagurikiwe

Umuyobozi w’Akarere ka Nyamagabe, Uwamahoro Bonaventure, yavuze ko bashyize ingufu mu gukangurira abaturage kubahiriza ambwiriza yashyizweho agamije gukumira COVID-19 ariko hari abayarengaho nkana by’umwihariko bagafungura utubari.

Ati “Tumaze guhana abantu benshi barenga ibihumbi bitatu, ubwo abo ni abo twagiye duca amafaranga, ariko urebye abo twagiye duha ibindi bihano birimo nko kubamarana umwanya bakareka ibyo bari bagiye gukora bagera nko mu bihumbi 10; ariko ikigamijwe ntabwo ari uguhana kuko niyo tubikoze ntabwo biba bidushimishije gusa hari aho biba bikwiriye.”

“Kugeza ubu igihano gikomeye twagezeho ni abo twagiye duca amafaranga agera ku bihumbi 300 bafunguye utubari kuko tuba tuvuga ngo reka wenda tumuce amafaranga menshi turebe ko yarekera aho cyangwa yabera isomo abandi batekerezaga kubikora.”

Yavuze ko amafaranga yose amaze gucibwa abarenze ku mabwiriza yo kwirinda COVID-19 arenga Miliyoni 16 Frw.

Yashimye uruhare rw’abafatanyabikorwa mu gukumira icyo cyorezo abasaba gukomeza ubufatanye kuko buri gutaga umusaruro mwiza.

Yagaragaje ko hari ibikorwa byadindiye birimo ubucuruzi buciriritse ndetse n’ibijyanye n’ubukerarugendo kuko abaherekazaga ba mukerarugendo imirimo yabo yahagaze, asaba ko abafatanyabikorwa bagira uruhare mu gufasha abo bantu no kubagoboka mu buryo bushoboka.

Bamwe mu baturage bo mu Karere ka Nyamagabe baherutse kubwira IGIHE ko bamaze gusobanukirwa icyorezo cya COVID-19 icyo ari cyo kandi basigaye bubahiriza amabwiriza yashyizweho yo kugikumira. Bemeza ko ibyo bituruka ku bukangurambaga bwakoze bagahabwa ibisobanuro.

Abaturage bo mu Karere ka Nyamagabe bamaze kugira umuco wo gukaraba mbere yo kwinjira aho basaba serivise
Abaturage bo muri Nyamagabe bavuga ko basigaye bubahiriza amabwiriza yashyizweho yo gukumira COVID 19
Gusukura intoki kenshi ni imwe mu ngamba zo gukumira ikwirakwira rya COVID 19
Inyubako y'ibiro by'Akarere ka Nyamagabe mu Ntara y'Amajyepfo
Kuri iki kibuga kiri mu Nkambi ya Kigeme icumbikiye impunzi zo muri Repubulika iharanira Demokarasi ya Congo hahoraga abana benshi bahakinira ariko ubu siko bimeze kuko bari muri Guma mu Rugo
Umudugudu wa Gakoma wo mu Kagari ka Kigeme mu Murenge wa Gasaka ni wo usigaye muri Guma mu rugo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .