Inshuti uyibonera mu byago: I Nyamagabe banyuzwe n’uburyo ‘Radiant Yacu’ yagobotse uwayishinganishijemo

Yanditswe na Prudence Kwizera
Kuya 22 Kamena 2020 saa 09:06
Yasuwe :
0 0

Inshuti nyayo uyibonera mu byago! Ni yo ntero ya bamwe mu baturage bo mu Murenge wa Buruhukiro mu Karere ka Nyamagabe, nyuma yo kubona uburyo Ikigo cy’Ubwishingizi ‘Radiant Yacu Ltd’ cyagobotse umuturanyi wabo wagifashemo ubwishingizi.

Uwo muturage witwa Ngiriyambere Jean Baptiste wo mu Mudugudu wa Gifurwe mu Kagari ka Gifurwe yafashe ubwishingizi muri ‘Radiant Yacu Ltd’ mu Ugushyingo 2019 akajya atanga 1000 Frw buri kwezi akoresheje telefoni ngendanwa akayohereza kuri Mobile Money.

Yaje gukora impanuka y’igare muri Kamena 2020 ajya kuvurirwa mu Bitaro bya Kaminuza bya Butare, CHUB, amaramo iminsi 10. Ibyo byatumye Radiant Yacu Ltd imwishyura insimburamubyizi kuko yayifashemo ubwishingizi yiteganyiriza.

Uyu mugabo w’imyaka 26 y’amavuko asanzwe akora akazi ko kogosha muri Salon de Coiffure ye bwite iri mu Murenge wa Buruhukiro aho atuye; umugabo amwogoshera 100 Frw naho umugore 150 Frw. Avuga ko yatekereje gufata ubwishingizi ashaka kwiteganyiriza.

Ati “Nabonye ubutumwa bugufi kuri telefoni bwa Radiant Turi Kumwe, kubera ko nari nsanzwe nzi ubundi bwishingizi bw’ingoboka, ubwo nayo nahise nyijyamo kuko nayo ikorana na Radiant. Ubwo nahise nyijyamo nandika *531#, nasomye amabwiriza yose mpitamo ubwishingizi bw’igihumbi.”

“Natekereje kujya mu bwishingizi kuko navugaga nti ‘niba bavuze ngo ubwishingizi ‘Turi Kumwe’ ubundi muri telefoni uko bigaragara ningira ikibazo nzababwira uko bimeze nanjye nsubizwe amafaranga nshobora kuba narakoresheje y’insimburamubyizi cyangwa nagira n’ikibazo nkitaba Imana umuryango wanjye ukagira icyo uhabwa.”

Avuga ko nyuma yo gukora impanuka ari bwo yabonye neza ibyiza byo gufata ubwishingizi, ashishikariza abandi baturage kwishinganisha.

Ati “Ibyiza byabwo ni uko iminsi utari uri gukora bagusubiza ay’umubyizi wagakoreye. Abaturage nabashishikariza gufata ubwishingizi bwa Radiant Turi Kumwe kuko ibyago biza bidateguje umuntu.”

Uko Radiant Yacu yanzuye gusura Ngiriyambere

Umuyobozi Mukuru wa Radiant Yacu Ltd, Amb. Joseph Habineza, yabwiye IGIHE ko bamaze kubona uburyo umuturage wo mu cyaro kure y’Umujyi wa Kigali yatekereje gufata ubwishingizi, biyemeje kumusura no kumushimira ngo bamutere akanyabugabo.

Yagize ati “Numvise umuntu w’Umunyarwanda wa mbere utubwiye ati ‘nagize ikibazo’ naravuze ngo aho ari hose ndahamusanga. Ubwo rero ni byo byatumye mfata uru rugendo, naje ntazi aho ariho ngenda mbaririza tunavugana kuri telefoni, nari nzi ko ari hariya mu Gasarenda arambwira ati nuhava uragenda nk’isaha nanone ku muhanda w’ibitaka.”

Akomeza avuga ko indi mpamvu yatumye bamusura ari ukugira ngo abe intangarugero mu Banyarwanda bose.

Ati “Jean Baptiste ni we Munyarwanda wa mbere Radiant Yacu yishyuye kuva twatangira.”

Abaturage bakozwe ku mutima n’ibyabaye

Bamwe mu baturanyi ba Ngiriyambere banyuzwe n’uburyo Radiant Yacu yasuye umuturage mu cyaro, bemeza ko ari inshuti nziza iboneka mu byago.

Ntakirutimana Aphrodice ati “Ajya kwa muganga byari bikabije arwaye cyane none tubonye abo yari yisunze bamugiriye neza baje kumusura. Natwe tutazi gusoma no kwandika tuzamubaza inzira yagiye anyura, natwe abidukoreshereze. Ni bwo tubonye abishingizi beza baza kureba umuntu uri mu muryango wabo.”

Nyiranjyinshuti Espérance yavuze ko atari asanzwe azi ibijyanye n’ubwishingizi ariko yabimenye kandi yabyishimiye bityo akaba agiye gutangira kwishinganisha.

Ati “Ntabyo nzi ariko nababonye ndabyishimira numva ko nanjye ndibuhite mbyinjiramo.”

Abo mu muryango wa Ngiriyambere Jean Baptiste barimo se, Ahingereje Martin n’umugore we, Nyirahagenimana Jeannette, nabo bavuga ko bakozwe ku mutima n’uburyo Radiant Yacu Ltd, yamugobotse bityo nabo bagiye kuyishinganishamo biteganyiriza.

Amb. Joseph Habineza yasobanuye ubusanzwe batanga ubwishingizi ku Banyarwanda bose bijyanye n’ubushobozi bwa buri wese n’icyiciro arimo.

Yavuze ko umuntu ashobora kwishinganisha atanga buri kwezi amafaranga 500; 1000; 2000; 5000 cyangwa ibihumbi 10 Frw. Iyo uwayatanze agize ikibazo akajya mu bitaro akamaramo iminsi irenze itatu, atangira guhabwa amafaranga yatanze buri munsi.

Ati “Uramutse ugiye mu bitaro turakwishyura, ayo amafaranga watangaga buri kwezi twe tuyaguha buri munsi.”

Amb. Joseph Habineza, yavuze ko mu myaka yashize Abanyarwanda bari bazi ko ubwishingizi bufatwa n’abantu bakomeye bateye imbere ariko Radiant Yacu yaje gufasha buri wese kwishinganisha uko yifite.

Ikigo cy’ubwishingizi ‘Radiant Yacu’ cyakomotse kuri Sosiyete y’Ubwishingizi ya Radiant yavutse mu 2013, kiza kigamije kwegera ba Banyarwanda badafite ubushobozi buremereye, ni ukuvuga nka wa wundi wavuga ati ‘simfite amafaranga arenga 1000 ku kwezi ariko ndashaka kubona ubwishingizi’.

Akanyamuneza kari kose kuri Ngiriyambere n'umugore we Nyirahagenimana
Bamwe mu baturanyi ba Ngiriyambere Jean Baptiste bakozwe ku mutima n’uburyo Radiant Yacu yaje gusura umuturage mu cyaro, bemeza ko inshuti nyayo uyibonera mu byago
Ngiriyambere Jean Baptiste asanzwe afite ubumuga mu kaguru yatewe n'impanuka yigeze gukora mu myaka yashize
Ngiriyambere avuga ko nyuma yo gukora impanuka ari bwo yabonye neza ibyiza byo gufata ubwishingizi ashishikariza abandi baturage kwishinganisha
Nyirahagenimana Jeannette umugore wa Ngiriyambere yavuze ko yishimiye ibyo Ikigo Radiant Yacu cyabakoreye
Umubyeyi we, Ahingereje Martin, yavuze ko yakozwe ku mutima n’uburyo Ikigo Radiant Yacu Ltd, cyagobotse umuhungu we bityo nawe agiye kuyishinganishamo yiteganyiriza
Umuyobozi Mukuru wa Radiant Yacu Ltd, Amb. Joseph Habineza akigera mu Mudugudu wa Gifurwe aho Ngiriyambere Jean Baptiste atuye
Umuyobozi Mukuru wa Radiant Yacu Ltd, Amb. Joseph Habineza, yitegereza uko Ngiriyambere yogosha abakiliya be

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .