00:00:00 IGIHE NETWORK KN KINYARWANDA EN ENGLISH FR FRANCAIS

INES igiye kwakira inama mpuzamahanga ku ikoranabuhanga rikoresha amakuru ashingiye ku byogajuru

Yanditswe na Ntabareshya Jean de Dieu
Kuya 7 July 2022 saa 09:07
Yasuwe :

Ishuri Rikuru ry’Ubumenyingiro rya INES Ruhengeri riri kwitegura kwakira Inama Mpuzamahanga yiga ku ikoranabuhanga rikoresha amakuru ashingiye ku byogajuru; ihuza inzobere n’abashakashatsi baturuka mu bihugu bitandukanye ku mugabane w’ Afurika.

Biteganyijwe ko iyi nama izabera i Kigali ahanzwi nka “Kigali Conference and Exhibition Village” (KECV), guhera tariki 24 kugera kuri 28 Ukwakira 2022.

Iyi nama iterana buri myaka ibiri, yatangiye kuba mu 1996, ibera i Harare mu gihugu cya Zimbabwe. Kuri iyi nshuro izabera i Kigali kuko Ishuri Rikuru rya INES - Ruhengeri ryahigitse andi Mashuri Makuru na za Kaminuza zari zihanganye naryo arimo ayo muri Cameroun, Zambia, Togo na Repubulika Iharanira Demokarasi ya Congo.

Inama iheruka ni iyo mu 2018 kuko iyo mu 2020 yasubitswe kubera uburyo Covid-19 yavuzaga ubuhuha ku isi hose, mu bihugu bitandukanye by’ Afurika utibagiwe n’u Rwanda.
Kugeza ubu, Ishuri Rikuru rya INESRuhengeri ryemeza ko abasaga 300 bamaze kwiyandikisha kuzitabira iyo nama mu gihe bateganya ko nibura izitabirwa n’abarenga 400.

Ni inama izamara iminsi itanu ikaba ifite insanganyamatsiko igira iti “Space and geospatial technology for Africa we want” cyangwa se “Ikoranabuhanga mu bumenyi bw’ikirere mu kubaka Afurika twifuza”.

Abazayitabira bazungurana ibitekerezo ku ngingo zitandukanye zirimo guteza imbere ubushakashatsi mu birebana n’isanzure, ubumenyi bukoresha amakuru ashingiye ku byogajuru, imiturire n’imikoreshereze y’ubutaka ndetse n’ibindi.

Kugira ngo Ishuri Rikuru rya INES - Ruhengeri ribashe guhabwa kwakira iyi nama igiye kuba ku nshuro yayo ya 13 si ibintu byizanye kuko kugira ngo wemererwe kwakira iyi nama bisaba ko ubanza kubipiganira, hanyuma hagashingirwa ku bushobozi Ishuri Rikuru cyangwa Kaminuza bifite.

Ibindi bishingirwaho ni ubumenyi n’uburambe bya Kaminuza, umutekano w’igihugu kigiye kuyakira, uburyo icyo gihugu cyorohereza abantu kucyinjiramo ndetse n’uburyo bwo kwakira abakigana.

Umwarimu mu Ishuri Rikuru rya INES - Ruhengeri uri gukurikirana itegurwa ry’iyi nama, Potel Jossam, yavuze ko iyi nama iri gutegurwa ku bufatanye n’ibigo bitandukanye, harimo ibya leta, iby’abikorera utibagiwe n’iby’abanyamahanga, bizaza kumurika ibikorwa byabo bitandukanye.

Iyi nama ni imwe mu zikomeye ku Isi no muri Afurika by’umwihariko ku birebana no guteza imbere ubumenyi bukoresha amakuru ashingiye ku byogajuru, isanzure no kubyaza umusaruro amakuru atangwa n’ikoranabuhanga ryifashishwa muri uru rwego nk’ibyogajuru n’ibindi.

Ubusanzwe iyi nama itegurwa n’Ihuriro Nyafurika rishinzwe kubungabunga ibidukikije hifashishijwe ubumenyi ku isanzure (African Association of Remote Sensing of the Environment - AARSE). Kuri iyi nshuro ikaba iyitegura ku bufatanye na INES - Ruhengeri.

AARSE ni ihuriro ry’Abahanga rifite intego yo kumenyekanisha ku bihugu by’ Afurika n’ibigo bishamikiye kuri za guverinoma, inzego z’abikorera n’imiryango itegamiye kuri Leta impamvu n’inyungu zo gukoresha ubumenyi bukoresha amakuru ashingiye ku byogajuru mu kubungabunga ibidukikije.

Aha kandi hazavugirwamo uburyo bwo gufata ingamba ku bo mu nzego z’ubuyobozi, abashakashatsi n’inzira zakoreshwa binyanye n’ibyavuye mu bushakashatsi, ibyaganiriweho ku ngingo zitandukanye ziteganyijwe kuzigwaho.

Abikorera bo mu Rwanda na bo barasabwa kwiyandikisha kuzitabira iyi nama kuko hazabaho umwanya wo kumurika ibikorwa byabo ku buryo yaba amahirwe akomeye yatuma ibyo bakora bimenyekana ku isi hose.

Ubusanzwe Ishuri Rikuru rya INES - Ruhengeri rifite amasomo arebana n’imicungire n’imikoreshereze y’ubutaka (Land administration and Management), imipimire y’ubutaka (Land survey) n’ibirebana n’ubwubatsi (Civil Engineering) n’andi anyuranye umuntu yasanga aha.

Ukeneye andi makuru ajyanye n’iyi nama wasura uru rubuga wanyura hano.

INES igiye kwakira inama mpuzamahanga ku ikoranabuhanga rikoresha amakuru ashingiye ku byogajuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .