00:00:00 IGIHE NETWORK KN KINYARWANDA EN ENGLISH FR FRANCAIS

Imvano y’uruzinduko rwa Perezida wa Ethiopia mu Rwanda

Yanditswe na Philbert Girinema
Kuya 19 March 2020 saa 11:31
Yasuwe :

Ibiganiro ku mahari amaze igihe mu mushinga wa Ethiopia w’iyubakwa ry’urugomero rwa mbere runini muri Afurika, nibyo byari ku meza ya Perezida Kagame na mugenzi Sahle-Work Zewde wa Ethiopia ku wa Mbere w’iki cyumweru.

Perezida wa Ethiopia, Sahle-Work Zewde, yari mu Rwanda ku wa Mbere tariki ya 16 Werurwe aho yageze akubutse muri Uganda. Yagiranye ibiganiro na mugenzi we w’u Rwanda byibanze ku rugomero rw’amashanyarazi ruri kubakwa muri Ethiopia rumaze igihe rushyamiranyije iki gihugu na Misiri.

Uru rugomero rwiswe Grand Rennaissance mu gihe ruzaba rwuzuye, ruzaba arirwo runini muri Afurika yose. Ethiopia yatangiye ibikorwa byo kurwubaka mu 2011 mu gice cyitwa Nile Bleu ahasanzwe hisuka 85% by’amazi yose ya Nil.

Gusa iyubakwa ryarwo ryatumye havuka ukutumvikana hagati ya Misiri na Ethiopia ndetse hari umwuka utari mwiza ku buryo bivugwa ko bishobora no kugera ku mirwano hagati y’impande zombi.

Umugaba Mukuru w’Ingabo za Ethiopia, Lt Gen Adam Mohamed, aherutse gutangaza ko igisirikare cyiteguye kurwanya uwo ariwe wese washaka kugaba igitero kuri uru rugomero, ndetse kikanamuhindukirana agasubira iyo aturutse.

Misiri ifite impungenge ko uru rugomero ruzagabanya amazi yisuka y’uru ruzi, ku buryo atagera ku butaka bwayo nk’uko bisanzwe mu gihe ariyo icungiyeho. Abahanga bavuga ko Misiri idafite Nil yahinduka ubutayu.

Ubusanzwe bene izi ngomero ntabwo zitwara amazi menshi, gusa uko yisuka bihita bitandukana n’uko yari asanzwe agenda mbere y’urugomero. Ethiopia yubatse ibisa nk’ibigega amazi abanza kunyuramo mbere y’uko akomeza gutambuka, kugira ngo byuzure bisaba ko hajyamo amazi angana na metero cube miliyari 74.

Ethiopia ifite gahunda y’uko uru rugomero rwaba rwamaze kuzura mu myaka itandatu, mu gihe cy’imvura kiri imbere akaba aribwo amazi yatangiye gushyirwamo hanyuma nibura umuriro ukaba watangiye kuboneka mu Ukuboza uyu mwaka hifashishijwe ingomero nto ebyiri.

Misiri yo yatanze igitekerezo ko icyo gihe cyaba kirekire kugira ngo amazi ari muri uru ruzi atagabanuka cyane cyane mu mizo ya mbere yo kuzuza ibisa n’ibigega twavuze haruguru amazi aba agomba kunyuramo.

Muri make Misiri icyo idashaka ni uko ibikorwa byo kuzuza ibyo bigega bikorwa inshuro imwe, ahubwo yo ishaka ko bitwara igihe kirekire, ni ukuvuga ko amazi yaba ajyamo yaba ari make.

Amasezerano asanzwe hagati y’ibihugu byose bikoresha uru rugomero yasinywe mu 1929 mu gihe cy’ubukoloni, aha amahirwe menshi Misiri na Sudani ku gukoresha umugezi wa Nil kurusha ibindi bihugu.

Misiri, Ethiopia na Sudani bimaze igihe kigera ku myaka ine mu biganiro byiga ku mikorere y’uru rugomero, byageze n’aho Leta Zunze Ubumwe za Amerika zizamo hagati nk’umuhuza.

Ubu aho bigeze ni uko Ethiopia ishinja Misiri ko nta bushake ifite bwo kugera ku mwanzuro uhuriweho n’impande zose.

Impamvu Misiri ibigendamo biguru ntege ni uko ishingira ku mazi ya Nil mu bikorwa byayo byose ku kigero cya 90%, ikibazo cyose cyava kuri uru ruzi kigira ingaruka kuri iki gihugu.

Misiri yubatse urugomero rwa Aswan rukoresha amazi aturutse muri Nil, ku buryo ivuga ko uru rwa Ethiopia rushobora guteza ikibazo ku rwayo.

Bigendanye n’amasezerano yo mu 1929, Misiri ntishaka kurekura gutyo gusa, niyo mpamvu yanze kuva ku izima kuko mu nyandiko kugeza ubu ni yo ifite uburenganzira kuri uru ruzi kurusha ibindi bihugu.

Ethiopia yo ntibona impamvu ibangamirwa mu mushinga wayo wo kubaka urugomero hagendewe ku masezerano yo mu gihe cy’ubukoloni, aho ivuga ko atanagaragaza ingano y’amazi ibindi bihugu bikora kuri uru ruzi byemerewe gukoresha.

Ethiopia iteganya kuzakoresha miliyari enye z’amadolari ya Amerika mu kubaka uru rugomero. Mu gihe rwakuzura, byitezwe ko rwazaba rutanga megawatt 6.000 z’amashanyarazi.

Zahita zifashishwa mu gukemura ikibazo cy’amashanyarazi muri Ethiopia kuko 65% by’abaturage bayo batagerwaho n’umuyoboro wayo. Zanatuma Ethiopia isagura igatangira kugurisha mu bihugu by’ibituranyi.

Ibindi bihugu birimo nka Sudani, Sudani y’Epfo, Kenya, Djibouti na Eritrea nabyo byiteze kuba byakungukira kuri uru rugomero.

Perezida Kagame asanga hakwiye gushingirwa ku bigaragazwa n’impuguke

Itangazo ryashyizwe ahagaragara na Minisiteri y’Ububanyi n’Amahanga muri Ethiopia, rivuga ko Perezida Kagame yabwiye mugenzi we ko ubufatanye hagati y’ibihugu bikora ku ruzi rwa Nil bukwiye kwita ku isesengura ryakozwe n’abahanga.

Perezida Kagame yavuze ko mu gihe Misiri ifata uruzi rwa Nil nk’amakiriro, ikwiye kwemera ko ari n’umutungo kamere ku bindi bihugu ku buryo bishobora kuba byawubyaza umusaruro.

Yabwiye mugenzi we ko iki kibazo gikwiye gukemurwa binyuze mu biganiro, ashimangira ko u Rwanda rwiteguye gutanga umusanzu warwo kugira ngo bigende neza.

Perezida Sahle-work we yavuze ko Ethiopia yiteguye gushyiraho amahame yumvikana kandi aciye mu mucyo ku bijyanye n’imikoreshereze y’amazi mu bihugu bihuriye ku ruzi rwa Nil.

Iki kibazo cyari ku murongo w’ibyigwa kandi mu biganiro Perezida wa Ethiopia yagiranye Museveni ubwo yagiriraga uruzinduko muri Uganda mbere y’uko aza mu Rwanda.

Minisitiri w’Intebe wa Ethiopia, Abiy Ahmed, aherutse gusaba Perezida wa Afurika y’Epfo, Cyril Ramaphosa ko nawe yatanga ubufasha akaba umuhuza muri iki kibazo.

Ibihugu bihuriye ku ruzi rwa Nil birimo u Burundi, Repubulika Iharanira Demokarasi ya Congo, Misiri, Ethiopia, Kenya, u Rwanda, Sudani y’Epfo, Sudani, Tanzania, Eritrea na Uganda.

Isoko y’uruzi rwa Nil ikomoka mu Rwanda, aho amazi yayo nk’aya Nyabarongo agera muri Sudani nyuma agakomeza yinjira mu Misiri.

Perezida Sahle-Work Zewde aganira na Perezida Kagame
Ibiganiro byabereye muri Village Urugwiro
Bamwe mu bayobozi ku mpande zombi bitabiriye ibi biganiro
Perezida wa Ethiopia yageze mu Rwanda aturutse muri Uganda
U Rwanda na Ethiopia bisanzwe bifitanye umubano udadiye

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .