Imibereho ya Bizirema uherutse kuba umwarimu w’indashyikirwa mu Rwanda

Yanditswe na Prudence Kwizera
Kuya 1 Ukwakira 2020 saa 08:38
Yasuwe :
0 0

Bizirema Sylvain wo mu Murenge wa Busasamana mu Karere ka Nyanza ni umwarimu kuva mu 2008, mu mwaka ushize wa 2019 yabaye umwarimu w’indashyikirwa mu Rwanda hose mu rwego rw’amashuri yisumbuye, ahabwa ibihembo bitandukanye n’Ikigo cy’igihugu gishinzwe Uburezi mu Rwanda, REB.

Uwo mugabo w’imyaka 35 y’amavuko, IGIHE yamusuye aho atuye mu Mudugudu wa Mukoni mu Kagari ka Kavumu. Yigisha isomo ry’ubutabire mu mwaka wa Gatandatu kuri Ecole des Sciences St Louis de Monfort i Nyanza. Ni umugabo wubatse ufite umugore n’abana babiri.

Yemeza ko umwuga w’ubwarimu ari mwiza ku muntu uwukoze awukunze kandi abishaka kuko umuha umusaruro mwiza.

Ati “Icya mbere ni uko umwuga w’ubwarimu ugira umutekano, iyo umuntu awurimo aba atuje nta bindi bimuvangira biwubamo.”

Bimwe mu bikorwa bifatika akesha umwuga wo kwigisha harimo inzu yiyubakiye yo kubamo ifite n’izindi ziyishamikiyeho (annexes) arimo kubaka azajya akodeshamo imiryango igera kuri ine. Byose yabikuye mu nguzanyo yasabye muri Koperative Umwarimu Sacco.

Avuga kandi ko amafaranga yagiye ahembwa mu kazi ko kwigisha yamufashije kurihira umugore we amashuri mu ishuri ryigenga, akaba asoje icyiciro cya kabiri cya Kaminuza mu bijyanye n’icungamutungo.

Ati “Kandi si ibyo gusa kuko haba hari n’imiryango yacu dufasha kwiga no gushakisha ubundi buzima; ibyo byose rero ni amafaranga y’ubwarimu. Wabonye ko mfite abana bakuru kandi nabo bariga, amafaranga y’ishuri nta handi ava uretse mu bwarimu.”

Bizirema avuga ko kuba umwarimu abifata nk’umuhamagaro kuko atari umwuga usanzwe nk’indi.

Yemeza ko kujya kwigisha abana bisaba kuba ubikunda, bityo atari umwuga wo kujya gushakiramo inyungu z’amafaranga menshi.

Ati “Kugira ngo ube mwarimu mwiza ni ukuba mu mutima wawe no mu bushake bwawe ukunda kwigisha.”

Guhembwa nk’indashyikirwa byamuteye umurava

Bizirema avuga ko kuba mu 2019 yaratoranyijwe nk’umwarimu w’indashyikirwa agahabwa ibihembo, byamuteye umurava wo gukomeza kwigisha neza no kwita ku banyeshuri, gukorana neza n’abandi barimu ndetse no guharanira kutazatsikira ngo asubire inyuma.

Yahawe ibihembo birimo moto, Televiziyo n’urupapuro rw’ishimwe (certificate). Avuga ko atita cyane ku kiguzi cy’ibihembo yahawe ahubwo azirikana agaciro kabyo n’icyo bivuza mu kazi akora.

Ati “Iyo umuntu ahembwe ni nk’ikamba aba yambitswe aba agomba no kuririnda rero, niba ubaye indashyikirwa ugomba guharanira guhora uri indashyikirwa mu mirimo yawe yose ukora ku buryo abantu bose bifuza kukureberaho mu byo ukora bifuza kugufatiraho urugero.”

Agihabwa moto yahise atangira kujya ayigendaho agiye ku kazi ariko nyuma ayiha umumotari uyikodesha agera ku bihumbi 80 Frw ku kwezi.

Amafaranga ava muri iyo moto asigaye ayifashisha mu gutunganya neza inzu zishamikiye ku yo abamo ku buryo ateganya ko nizimara kuzura nazo zizajya zimwinjira agera ku bihumbi 80 Frw y’ubukode buri kwezi.

Televiziyo yahawe nayo imufasha gukurikira amakuru yo mu Rwanda n’ahandi ku Isi, ariko by’umwihariko muri ibi bihe bya Coronavirus, abana bayikurikiraho amasomo bari mu rugo.

Umushahara wa mwarimu uracyari imbogamizi

Bizirema avuga ko kugeza ubu hakiri imbogamizi bahura nayo y’umushahara wa mwarimu ukiri muto kuko utajyanye n’isoko bahahiraho. By’umwihariko avuga ko abarimu bigisha mu mashuri abanza bahembwa ibihumbi 40 Frw kandi muri iki gihe atabasha kubakemurira ibibazo, bikaba byaba intandaro yo kutuzuza inshingano zabo zo kurera neza.

Kimwe na bagenzi be baganiriye na IGIHE bifuza ko Leta yareba uko ibashyiriraho isoko rya mwarimu nk’uko bimeze ku ngabo z’igihugu. Ibyo ngo byabafasha guhaha badahenzwe mu mafaranga make babona bakabasha no kwizigamira.

Umwarimu Sacco yaramufashije cyane

Bizirema avuga ko koperative Umwarimu Sacco bashyiriweho na Leta yabafashije cyane, by’umwihariko we ku giti cye yasabye inguzanyo ashyira mu bikorwa imishinga ye imufasha mu iterambere n’imibereho myiza.

Ati “Mu Mwarimu Sacco nasabyemo inguzanyo ya miliyoni 8 Frw ntangira kubaka inzu yo kubamo n’izindi ziyishamikiyeho nzajya nkodesha. Iyo ni inyungu ya mbere kuko kugira ngo ugane izindi banki ziguhe amafaranga angana gutyo kandi uzi umushahara duhembwa ntabwo byapfa gushoboka.”

Avuga kandi ko muri Koperative Umwarimu Sacco batanga inguzanyo zitandukanye ku buryo adashobora guhura n’ikibazo ngo abure amafaranga yo kugikemuza.

Agira inama abakiri bato bifuza kujya mu mwuga w’ubwarimu, kuwujyamo bawukunze atari uko babuze ahandi bajya kandi bamara kuwugeramo bakumvira amabwiriza.

Yibukije ko umwarimu ari umuntu w’icyitegererezo ufatirwaho urugero na benshi biganjemo abana yigisha, bityo ko akwiye kugendera kure ingeso mbi zose aho ziva zikagera.

Ku bijyanye n’ibihembo REB itanga asanga hakwiye kongerwamo n’ibikoresho bifasha umwarimu mu kazi ako kanya nka mudasobwa, tablet n’ibindi kuko bimufasha gutegura neza amasomo no gukora ubushakashatsi.

Yifuza kandi ko abayobozi b’ibigo by’amashuri bashaka ukuntu buri mwaka no kuri buri shuri hajya hahembwa umwarimu wakoze neza kurusha abandi kugira ngo bakorere ku mihigo.

Bizirema Sylvain avuga ko kuba umwarimu abifata nk’umuhamagaro kuko atari umwuga usanzwe nk’indi
Bimwe mu bikorwa bifatika akesha umwuga wo kwigisha harimo inzu yiyubakiye yo kubamo ifite n’izindi ziyishamikiyeho
Umwaka ushize ubwo yabaga umwarimu w'indashyikirwa, yahembwe moto

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .