Imibereho y’abo mu mudugudu wa Kaburanjwiri utarangwamo icyaha, imirire mibi n’ibindi bituma uba intangarugero

Yanditswe na Prudence Kwizera
Kuya 9 Ukuboza 2019 saa 09:14
Yasuwe :
0 0

Umudugudu wa Kaburanjwiri wo mu Karere ka Gisagara uherutse kutoranywa nk’icyitegererezo mu Ntara y’Amajyepfo ugabirwa inka na Perezida Paul Kagame kubera ibikorwa by’indashyikirwa byakozwe n’abawutuye.

Ni umudugudu uherereye mu Kagari k’Umunini mu Murenge wa Kansi; ugizwe n’ingo 114 zituwe n’abaturage 506.

Umaze kuba ikimenyabose kuko indi midugudu yo mu turere dutandukanye tw’igihugu ijya kuwigiraho no kuwufatiraho urugero rwiza.

IGIHE yasuye uwo mudugudu wahoze utuwe n’abaturage bakennye cyane ariko baza kwishakamo ibisubizo bivana mu bukene bakemura n’ibindi bibazo bari bafite.

Uwo mudugudu wavuye kure kuko wahoze mu bukene bukabije abaturage benshi baba mu nzu za nyakatsi ndetse batunzwe no guca inshuro.

Umuyobozi w’Umudugudu wa Kaburanjwiri, Nteziryayo Samuel, yabwiye IGIHE ko ibyo bagezeho byose babikesha gukorera hamwe no kwishakamo ibusubizo.

Ati “Twari dufite nyakatsi 43, dufite ingo 66 zituye nabi ariko tubasha gushaka igisubizo cy’ubuzima bw’abaturage; turicara turaganira tureka uko abaturage bava muri ntuye nabi bakaza ku mudugudu kugira ngo bagire umutekano.”

Avuga ko mu kubyishoboza bakoresheje amasibo bahuza imbaraga bagera ku cyo biyemeje.

Ati “Uburyo twabyishobojemo twakoze amasibo dufata ingo turazegeranya tureba igishoboka; abaturage badafite ubushobozi tubasha kubaha imiganda dufatanyije n’abaturage; tureba abafite ubushobozi tubashishikariza kuza gutura ku mudugudu.”

Bimwe mu byo bigejejeho bafatanyije

Mu Mudugudu wa Kaburanjwiri nta rugo na rumwe rudafite amashanyarazi akomoka ku mirasire y’izuba. Ni umudugudu utarangwamo ibyaha, kuko imiryango yose yigishijwe imenya ingaruka z’amakimbirane haba ayo mu miryango n’andi ateza ibyaha.

Buri muryango ufite akarima k’igikoni gahinzemo imboga n’ibiti by’imbuto byibuze bitatu; bose bafite amashyiga ya rondereza; abaturage bose bawutuye bafite ubwisungane mu kwivuza. Nta mwana waho ufite ikibazo cy’imirire mibi.

Mu gihe mu bindi bice bugarijwe n’ikibazo cy’abangavu baterwa inda z’imburagihe, icyo Kaburanjwiri yagikemuye kare yifashisha amasibo n’abakuze mu kugira inama abangavu n’ingimbi.

Mu bijyanye n’imibereho myiza, Kaburanjwiri iza ku mwanya wa mbere kuko buri rugo rufite inka n’itungo rigufi byibuze rimwe.

Mu gushyigikira uburezi, nta mwana n’umwe wo muri Kaburanjwiri ugejeje igihe cyo kwiga utari mu ishuri kandi nta mwana n’umwe wataye ishuri.

Buri rugo rufite igipande cy’umuganda kandi buri muryango ukorana n’ikigo cy’imari.

Imihanda yo muri uwo mudugudu yose yaciwe ku bufatanye n’abaturage, buri rugo rufite ubwiherero busukuye kandi inzu zaho zose zirakurungiye.

Bamwe mu baturage batuye muri uwo mudugudu bavuga ko mbere bakiba mu nzu za nyakatsi ubuzima bwabo bwari bumeze nabi kubera ubukene bukabije.

Mbonigaba Johnston ati “Mbere y’uko ntura muri uyu mudugudu twari dutuye hasi muri ntuye nabi ahantu hatagera n’iterambere; tuza gufata umwanzuro wo kuza ku mudugudu. Inzu mbamo ni iyanjye sinkodesha; nkaba ndi umuhinzi mworozi mpinga ibigori, ibishyimbo, urutoki byose birahari.”

Mukamwiza Immaculée we avuga ko ibyiza bagezeho babikesha ubuyobozi bwabatoje gukorera hamwe.

Ati “Tugeze ku mudugudu ubuzima bwarahindutse n’imyumvire yarahindutse; abayobozi baratwegera bakatubwira kandi natwe twarasobanutse twumva ibyo tubwiwe.”

Amatsinda yo kwizigama yaje nk’igusubizo

Abaturage bo mu Mudugudu wa Kaburanjwiri bavuga ko gukorera hamwe mu matsinda yo kuzigama no kugurizanya byabafashije cyane kuko byababereye umusingi wo kuva ku ngoyi yo guca inshuro.

Mukarusine Espérance ati “Ntabwo ngica inshuro, njya mu matsinda nkizigama. Dufite amatsinda muri uyu mudugudu ndetse no kugeza ku mwana w’imyaka ibiri na we aba afite itsinda; nk’ubu mfite itsinda ku ruhare rwanjye mfite n’abana babiri nzigamira.”

Inshuti z’umuryango mu guhosha amakimbirane

Mu myaka yashize mu Mudugudu wa Kaburajwiri harangwaga amakimbirane yo mu ngo agatuma abagize umuryango badatera imbere.

Bemeza ko icyabafashije gukemura ayo makimbirane no kuyavamo burundu ari ‘inshuti z’umuryango’ zashyizweho hamwe n’inama bagiriwe n’ubuyobozi.

Ati “Iyo havutse ikibazo inshuti z’umurango ziba zahageza zikabaza impamvu ayo makimbirane arimo kuza. Ubu mu mudugudu iwacu nta makimbirane ahaba nk’uko mbere yahabaga.”

Gutwita kw’abangavu byavugutiwe umuti

Nyuma yo kubona ko ikibazo cy’abangavu baterwa inda imburagihe gikomeje gufata indi ntera; abatuye mu Mudugudu wa Kaburanjwiri bafashe ingamba zo kugikemura hakiri kare.

Umuyobozi w’uwo mudugudu, Nteziryayo Samuel, avuga ko bashyizeho gahunda yo kuganiriza abakobwa no kubashakira aho bahurira mu matsinda.

Ati “Turavuga ngo reka twicare tuganirize abakobwa bacu binyuze mu mugoroba w’ababyeyi no mu rubohero; ngo babashe kwirinda no kumva ko bagomba gusabana na basaza babo ariko badakoze ibibi.”

Akomeza agira ati “Nk’ubu dufite amatsinda y’abana, abana bagahura bakizigama haba abakobwa n’abahungu. Ikindi tukaganiriza abana bacu ku buzima bw’imyororokere kugira ngo batabasha kugwa mu bishuko.”

Imirire mibi yabaye amateka

Mu mudugudu wa Kaburanjwiri hahoze abana benshi bafite ikibazo cy’imirire mibi ariko abaturage baragikemuye.

Nteziryayo Samuel ati “Mbere byari bibi cyane wasangaga abana bo muri uno mudugudu bafite imirire mibi barangwingiye; hari abari mu muhondo n’abari mu mutuku; ariko tukimara gushyiraho igikoni cy’umudugudu n’imirima y’igikoni ubu nta mwana n’umwe ufite imirire mibi.”

Ababyeyi bo muri Kaburanjwiri bigishijwe gutegura indyo yuzuye no konsa umwana neza ndetse na buri cyumweru habaho igenzura hakarebwa ko babikora neza.

Buri wa mbere abana bo muri uwo mudugudu bahabwa amata muri rusange ndetse n’ababyeyi bakibutswa kujya bayabaha mu ngo zabo.

Bashyizeho n’igikorwa cyiswe ‘igi ry’umwana’ aho buri rugo rushishikarizwa korora inkoko zitera kugira ngo amagi abashe kuboneka.

Kuva mu ishuri ntibikibaho

Ubuyobozi bw’Umudugudu wa Kaburanjwiri bwafatiye umwanzuro ikibazo cy’abana bava mu ishuri aho bukorana n’ibigo by’amashuri mu kumenya abaza kwiga n’abasibye.

Iyo umwana yasibye ishuri rijya kumusura bakamenya ikibazo afite bakagishakira umuti kigakemuka. Iyo basanze umubyeyi yabigizemo uruhare bamugira inama agasubiza umwana ku ishuri.

Kuba aba mbere byabateye umurava

Abatuye mu Mudugudu wa Kaburanjwiri n’ubuyobozi bwabo bavuga ko kuba barabaye ba mbere bahiga indi midugudu yose yo mu Ntara y’Amajyepfo ari ishema kuri bo kandi byabateye umurava wo gukomeza gukora ibyiza.

Mbonigaba Johnston ati “Kuba umudugudu wacu warabaye intangarugero twarishimye cyane bitewe n’uko twari twakoze kandi n’ubu turacyakora ntabwo twacitse intege.”

Bihaye intego mu 2020

Nyuma yo gukemura byinshi mu bibazo byari bibugarije, abatuye mu Mudugudu wa Kaburanjwiri biyemeje ko mu 2020 bazatangira gahunda yo gusakaza amabati inzu zabo zose.

Umuyobozi w’Umudugudu wa Kaburanjwiri, Nteziryayo Samuel, avuga ko icyo gikorwa bagitangiye.

Ati “Ubu ikintu duteganya ni ugukuraho amategura tugasakaza amabati twese kuko twaranabitangiye dufite ubwizigame turimo dukusanya ku buryo nyuma y’imyaka ibiri hano hose haba hari inzu zisakaje amabati.”

Umuyobozi w’Akarere ka Gisagara, Jérôme Rutaburingoga, avuga ko Umudugudu wa Kaburanjwiri wabahesheje ishema kandi bazakomeza kwushyigikira kugira ngo ukomeze kuba intangarugero.

Ati “Tuzakomeza kubashyigikira kuko iterambere ntabwo rihagagara; hari imishinga myinshi izabageraho yo kubashyigikira kugira ngo bakomeze gutera imbere. Umwaka utaha bose tuzabaha amashanyarazi akomoka ku miyoboro migari.”

Rutaburingoga avuga ko hari n’amafaranga azahabwa abaturage bo muri Kaburanjwiri yo gushyira mu bikorwa imishinga itandukanye.

Indi nkuru wasoma: Kaburanjwiri, umudugudu udasanzwe mu Ntara y’Amajyepfo wagabiwe inka na Perezida Kagame

Abagore bose bo mu Mudugudu wa Kaburanjwiri baba mu matsinda yo kuzigama no kugurizanya
Abana bo mu Mudugudu wa Kaburanjwiri bigishwa gukora ibyiza hakiri kare
Abaturage bose bo muri Kaburanjwiri batuye mu mudugudu
Amashanyarazi yabakuye mu bwigunge
Bahinga ibihingwa bibafasha kwihaza no kurwanya imirire mibi
Bahisemo korora inka kugira ngo babone ifumbire n'amata
Buri rugo rufite akarima k'igikoni
Buri rugo rufite akarimo k'igikoni gahinzemo imboga
Buri rugo rufite amashanyarazi akomoka ku mirasire y'izuba
Buri rugo rufite ibiti by'imbuto ziribwa
Hashyizweho amasibo afatanya gukemura ibibazo bihari
Imihanda yo muri uwo mudugudu yose yaciwe ku bufatanye n’abaturage
Kimwe mu biti by'imbuto ziribwa byo muri Kaburanjwiri
Mu Mudugudu wa Kaburanjwiri nta rugo na rumwe rudafite amashanyarazi akomoka ku mirasire y’izuba
Umudugudu wa Kaburanjwiri wo mu Karere ka Gisagara uherutse kutoranywa nk’icyitegererezo mu Ntara y’Amajyepfo
Umuyobozi w’Umudugudu wa Kaburanjwiri, Nteziryayo Samuel, yabwiye IGIHE ko ibyo bagezeho byose babikesha gukorera hamwe no kwishakamo ibusubizo
Umuyobozi w’Akarere ka Gisagara, Jérôme Rutaburingoga, avuga ko Umudugudu wa Kaburanjwiri bazakomeza kwushyigikira kugira ngo ukomeze kuba intangarugero

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza