Imibereho y’abarimu, ubucucike, imfashanyigisho zidahagije mu bibangamiye imyigire y’abana

Yanditswe na Evariste Nsengimana
Kuya 18 Ukwakira 2019 saa 08:37
Yasuwe :
0 0

Abafite uburezi mu nshingano mu Rwanda no muri Afurika bagaragaje ko impamvu zikomeje gutera ubukene mu myigire y’abana mu bihugu bikiri mu nzira y’amajyambere harimo imibereho y’abarimu itari myiza, ubucukike mu mashuri, guteshuka ku nshingano kw’ababyeyi muri gahunda z’uburezi n’ibindi.

Byagarutsweho kuri uyu wa 17 Ukwakira ubwo hizihizwaga Umunsi Mpuzamahanga wo kurwanya ubukene, wahawe insanganyamatsiko igaruka ku isano iri hagati y’ubukene mu myigire n’ubushobozi bw’abakozi.

Banki y’Isi igaragaza ko umubare w’abana bari munsi y’imyaka 10 batazi gusoma aricyo gipimo nyamukuru kigaragaza ubukene mu myigire ku rwego mpuzamahanga.

Kuri uyu munsi mu bihugu bitandukanye muri Afurika abafite mu nshingano uburezi, abanditsi b’ibitabo, abanyamakuru n’abandi bahuriye mu biro bya Banki y’Isi, baganira ku biteza ubukene mu burezi n’ingamba zafatirwa.

Nyuma habayeho umwanya wo gusangizanya ibyo baganiriyeho hirya no hino mu bihugu n’abayobozi ba Banki y’Isi bari ku cyicaro gikuru cyayo i Washington imbonankubone hifashishijwe uburyo bw’amashusho (Video Conference).

Impamvu nyamukuru zahurijweho zigira uruhare mu guteza ubukene mu myigire harimo ubukene bw’urwego rw’uburezi, ubucukike mu mashuri bushingiye ku bikorwa remezo bike.

Mu Rwanda bagarutse ku kibazo cy’abana benshi mu mashuri, ababyeyi badafasha abana ngo babone umwanya wo kwiga cyangwa banabakundishe gusoma n’ibindi.

I Burundi bavuze ko bafite ikibazo cy’imfashanyigisho zidahagije, aho usanga abana batanu barwanira igitabo kimwe bigatuma bamwe kitageraho, bakadindira mu kumenya gusoma, ingengo y’imari nke igenerwa urwego rw’uburezi.

Hari ibihugu bimwe bidashyira imbere kwigisha indimi gakondo, kuba usanga henshi imibereho ya mwarimu itifashe neza, kubura imfashanyigisho zihagije, kutita ku burezi bw’incuke n’ibindi.

Umuyobozi wungirije w’Igihugu cy’Uburezi (REB), Tusiime Angelique, yababwiye ko icyo u Rwanda rushyize imbere ari ukuzamura ireme ry’uburezi rizagerwaho binyuze muri gahunda rwashyizeho zo kwishakamo ibisubizo.

Ati “Imwe mu ngorane dufite mu mashuri ni umubare muke w’ibyumba ugereranyije n’abanyeshuri baza kwiga, ubucucike. U Rwanda rumaze igihe rushyira mu bikorwa guhunda yo kwishakamo ibisubizo mu kubaka ibyo byumba.”

Ibyo bikorwa muri gahunda zitandukanye zirimo imiganda rusange y’abaturage aho bahura bagafatanya kubaka ibyumba by’amashuri n’ibindi bikorwa remezo nkenerwa mu burezi bidasabye ko Leta ibishoramo imari.

Ati “Ikindi ni ukuzana umuganda wo gusoma mu gukangurira ababyeyi gushakira abana umwanya wo gusoma, umunyeshuri ntabwo akwiye kubikora ku ishuri gusa.”

Uretse ibyo hari na gahunda y’umugoroba w’ababyeyi, bashishikariza ababyeyi gushyira abana mu ishuri no kubakundisha gusoma.

Umuyobozi ushinzwe ubukungu mu ishami rya Banki y’Isi mu Rwanda, Aghassi Mkrtchyan, yavuze ko ku munsi wo kurandura ubukene ari igihe Banki y’Isi yishimira ibyo yagezeho muri urwo rugendo nk’uko ari imwe mu ntego zayo.

Ati “Ni umunsi twishimira ibyagezweho ariko tunareba imbogamizi tugifite. Mu by’ukuri imbogamizi ziracyahari cyane muri Afurika yo munsi y’Ubutayu bwa Sahara aho abarenga 40% bari munsi y’umurongo w’ubukene.”

Aghassi yavuze ko uyu mwaka bihaye insanganyamatsiko igaruka ku bukene mu myigire nka kimwe mu bigira ingaruka ku bushobozi bw’abakozi mu gutanga umusaruro mu kazi bakora.

Yavuze ko Banki y’Isi igenda ifasha ibihugu bya Afurika mu mishinga itandukanye igamije guhashya ubukene mu myigire, irimo n’uzatwara miliyoni 200$ izatangiza mu Rwanda (2019-2023).

Imibare ya Banki y’Isi igaragaza ko mu bihugu bikiri mu nzira y’amajyambere abana 53% bari munsi y’imyaka 10 badafite ubushobozi bwo gusoma no kumva interuro yoroheje, ariko intego ikaba ari ukubagabanyago ½ bitarenze mu 2030.

Umuyobozi ushinzwe ubukungu mu ishami rya Banki y'Isi mu Rwanda, Aghassi Mkrtchyan, yavuze ko ku munsi wo kurandura ubukene ari igihe Banki y’Isi yishimira ibyo yagezeho
Ku ruhande rw'u Rwanda bicaye bahanze amaso ibyo mu bindi bihugu baganiriyeho
Mutesi Lilian ushinzwe Uburezi mu ishami rya Banki y'Isi mu Rwanda
Tusiime Angelique yavuze ko icyo u Rwanda rushyize imbere ari ukuzamura ireme ry’uburezi rizagerwaho binyuze muri gahunda rwashyizeho zo kwishakamo ibisubozo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza