Ikigo ‘ICT Innovation Center’ cyahembye imishinga 15 yagaragaje udushya mu ikoranabuhanga

Yanditswe na Twarabanye Venuste
Kuya 17 Ukwakira 2019 saa 07:09
Yasuwe :
0 0

Ikigo kigamije guteza imbere ikoranabuhanga mu Rwanda ‘ICT Innovation Center’ cyahembye imishinga ya mbere 15 yahize indi mu guhanga udushya n’ikoranabuhanga, muri 80 cyari cyakiriye, mu cyiciro cya mbere kiri gukurikirana kuva gifunguwe ku mugaragaro muri Kamena 2019.

ICT Innovation Center ni ikigo gifite intego yo gutoza no guhugura abantu muri gahunda zitandukanye zishingiye mu ikoranabuhanga no guhanga udushya ku mishinga y’ubucuruzi igitangira. Harimo gutunganya filimi, gukora porogaramu za telefone, imikino yo muri terefone no kuri internet n’ibindi.

Iki kigo cyari cyatanze itangazo gisaba ibigo by’ubucuruzi bigitangira bifite imishinga irimo udushya n’ikoranabuhanga kukigezaho imishinga yabo kugira ngo kibunganire, cyakira imishinaga 80 hatoranywamo 40 ariyo yakurikiranywe ikaza kuvamo 15 yahembwe.

Umuyobozi ushinzwe imishinga mu Kigo cy’igihugu cy’iterambere, Siboniyo Félix yavuze ko abahembwe bafashijwe guteza imbere imishinga yabo kuva muri Gicurasi 2019.

Ati"Ni Sosiyete zigitangira izo twashakaga ni izifite ikoranabuhanga no guhanga udushya. Twari twatanze itangazo hiyandikisha 80, dushobora gufatamo 40. Muri sosiyete 40, twahisemo 12 za mbere duhita tuziha ibiro, zifite n’abakozi bazifasha umunsi ku munsi hano.”

Yavuze ko baje gusanga hari 15 zakoze kurusha izindi, arizo zimaze zahawe ibihembo bitandukanye.

Ibyo bigo byabashije gufashwa kuzamura ikoranabuhanga byari bifite, inyungu no kumemyekana nabyo biriyongera.

Nancy Kayitare, ufite sosiyete ifasha ba mukerarugendo gushyikirana n’amahoteri banyuze kuri internet (booking), avuga ko aya mezi atandatu amaze kugeza ubucuruzi bwe ku yindi ntambwe.

Ati “Muri iki gihe cy’amezi atandatu nabashije kugera ku mahoteri amwe n’amwe mu Rwanda hose, njya nyashyiraho bikaborohereza. Mbasha no kubona abakiliya, bashobora kuza bakaba bagira ibyo bafata mbere y’igihe banyuze kuri porogaramu yanjye.”

Fiston Mudacumura ufite Inzu yandika ibitabo yitwa ‘Mudacumura publishing house’, ari mu bahembwe $ 2,000 kuko yaje ku mwanya wa kane.

Umushinga we ushingiye ku bitabo yandika ateganya kubishyira mu ikoranabuhanga ririmo imikino yo muri terefone.

Ati "Ubu turi mu mishinga yo kureba uburyo ibyo bitabo n’ibitekerezo harimo n’izo nkuru twabikoramo uburyo bw’ikoranabuhanga tugakora imikino ishingiye kuri ibyo bitabo. Tugakora filime z’amashusho agenda ‘animation’. Twari tumaze amezi ane dukora amahugurwa ajyanye n’ubucuruzi.”

Umunyamabanga uhoraho muri Minisiteri y’Ikoranabuhanga na inovasiyo, Claudette Irene yatangaje ko igikorwa cyo guteza imbere ikoranabuhanga kiri mu cyerekezo cy’igihugu ndetse ko icyo bifuza ari ukugeza amasomo batanga ku bagitangira imishinga benshi bashoboka.

Ati "Zimwe mu ngamba za Minisiteri ni ukongera ibigo nk’ibi tukabikwirakwiza, murabizi ko ibyinshi biri muri Kigali mu yindi mijyi cyangwa se mu cyaro nta biriyo ariko na none hariho ibigo by’urubyiruko hariho nibindi bigo bihari, ingamba ni ukureba ni gute twagenda nubwo tutabona ubushobozi bwo gufungura ibimeze nkibi, ariko tugakorana n’ibigo biriyo kugira ngo tubongerere bushobozi babashe gukora nk’ibi bigo."

Iyo mishinga 15 yagiye ihembwa hagati y’ibihumbi bibiri by’amadorari ya Amerika n’igihumbi cy’idorari. Biteganyijwe ko mu Ukuboza aribwo icyo cyiciro cya mbere kizacutswa hakakirwa ikindi.

Mu gutoranya bareba ibitekerezo by’imishinga yatanga akazi ku bantu benshi, ikabyara inyungu kandi ikaba ishobora gupiganwa ku isoko mpuzamahanga, ariko ishingiye ku ikoranabuhanga no guhanga udushya.

Ikigo cy’ikoranabuhanga ‘ICT Innovation Center’ cyatangiye kubakwa muri Kamena mu 2017 ku nkunga y’Ikigo Mpuzamahanga cya Koreya gishinzwe ubutwererane (KOICA).

Cyitezweho gukomeza guteza imbere ikoranabuhanga no guhanga udushya binyuze mu mishinga igitangira.

Umwe mu batsinze ubwo yashyikirizwaga igihembo
Sosiyete Mapa Zoombyte Innovation ni imwe mu zahembwe
Aba bahembwe amadolari 1000 kubw'umushinga wabo waje mu yahize indi
Aba bahembwe amadolari 1400 kubw'umushinga wabo w'ikoranabuhanga waje mu ya mbere myiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza