Dutemberane hamwe mu hantu h’ingenzi mu rugamba rwo kubohora u Rwanda (Amafoto)

Yanditswe na Nkurunziza Ferdinand
Kuya 19 Nyakanga 2020 saa 07:19
Yasuwe :
0 0

Hashize imyaka 26 Ingabo zari iza RPA zibohoye u Rwanda, zirukura mu maboko ya Leta yari yubakiye ku macakubiri, yari yarahejeje ishyanga abanyarwanda ikababuza gutaha mu rwababyaye nyamara cyari icyifuzo cy’abatari bake bari bamaze kurambirwa ubuhunzi bari baratangiye mu 1959.

Ni amateka yatumye benshi mu rubyiruko rw’abanyarwanda bakomokaga mu miryango yari yarameneshejwe ndetse ikimwa uburenganzira bwo kugaruka mu gihugu, bafata icyemezo cyo kwihuriza hamwe bagamije gushaka uburyo bushoboka bwose bwazabafasha gutaha i Rwanda.

Usibye ababaga hanze y’igihugu, n’abari baragumye mu gihugu ariko ibikorwa bihungabanya ubuzima bwabo, byiganjemo itotezwa no kwicwa byari bishyigikiwe na Leta yari iriho icyo gihe, ntibyasibaga kubageraho, bahorwa ko ari abatutsi.

Mu 1987, benshi mu banyarwanda bari barinjiye mu gisirikare cya Uganda bafatanyije n’abasivile b’impunzi, bishyira hamwe bashinga Umuryango wa FPR-Inkotanyi, wari ufite umutwe w’ingabo wa RPA, batangira gutegura uko bataha mu rwababyaye.

Cyari icyemezo Leta y’u Rwanda yari iriho icyo gihe itifuzaga kubona gishyirwa mu bikorwa, ariko umugambi ukomeye waturukaga ku nyota ingabo za RPA zari zifite, yo kugarura ubumwe mu banyarwanda, watumye tariki ya 01 Ukwakira 1990 izi ngabo zari zimaze igihe ziyubaka, zitangira urugamba.

Umusirikare wa mbere wa RPA wageze ku mupaka wa Kagitumba, tariki ya 01 Ukwakira 1990, ni Maj Chris Bunyenyezi wari uyoboye batayo ya Mbere.

Ikigo cy’imyitozo cya mbere cya RPA cyashinzwe ahitwa Namuhemure mu karere ka Nyagatare.

Urugamba rwo kubohora igihugu rugabanyije mu bice bine

Igice cya mbere nacyo cyaranzwe n’ibice bine, birimo gutangiza urugamba; kwigaruri ibirindiro bikomeye bya FAR, birimo Gabiro; gusubira inyuma bamwe mu bari abayobozi bakuru bamaze kwicwa ndetse no kongera kujya kwisuganya.

Nyuma yo kongera kwisuganya, RPA yateye ku mupaka wa Gatuna, biyongerera amahirwe yo kubona inzira izerekeza mu Birunga ndetse n’imiterere y’intambara irahinduka.

Igice cya kabiri cyaranzwe no kugaba ibitero shuma ku ngabo za Ex-FAR, ku buryo zasigaye zicitse intege bikomeye.

Muri iki gihe nibwo RPA yaharaniye kugumana ubutaka buto yari imaze kwigarurira.

Nubwo hageze igihe cy’amasezerano yari agamije guhagarika intambara, uruhande rwa Leta yari iriho icyo gihe ntirwabashije kuyashyira mu bikorwa.

Igice cya gatatu cyaranzwe no kugaba ibitero bigamije kwigarurira ibice bitandukanye bakagura ubutaka bari barigaruriye ndetse no kwereka Leta yari iriho ubushobozi bwa RPA, ku buryo yemera ibiganiro byo kugarura amahoro.

Igice cya kane kigizwe n’urugamba rwo guhagarika Jenoside yakorewe abatutsi mu 1994.

Nubwo hakoreshwaga intwaro mu guhangana n’ingabo za Ex-FAR zakoranaga n’interahamwe, Radio Muhabura yafashije mu buryo bukomeye RPA kumvikanisha impamvu bahisemo gutangiza intambara kuri Leta ya Habyarimana.

Igitero Ingabo za RPA zagabye ku Mupaka wa Gatuna, cyazifashije kugabanya igitutu zari zatewe na EX-FAR

Ibitero ingabo za RPA zagabye ku mupaka wa Gatuna, byazifashije kubona inzira izerekeza mu Birunga
Uyu mupaka wabaye izingiro rikomeye y'intsinzi y'urugamba rwo kubohora igihugu
Magingo aya, uyu mupaka wubatswe neza ku buryo bujyanye n'igihe

Igice cya Rubaya cyakoreshejwe igihe kinini nk’ibirindiro bikuru by’Ingabo za RPA

Muri iyi kiliziya ndetse n'ahandi hayikikije, Ingabo za RPA zahakoreshaga nk'ibirindiro bikuru by'Ingabo
Igihe cyo gusenga iyo cyagera, Abasirikare ba RPA barazaga bagasengera muri iyi kiliziya
Igice cy'inyuma cya Kiliziya ya Rubaya yamaze igihe kini ikoreshwa nk'ibirindiro bikuru by'ingabo za RPA

Ahakoreraga Radio Muhabura, hari hari indacye, n’ubu zikigaragara

Muri iyi ndacye habagamo Studio ya Radio Muhabura

Ku Mulindi wa Byumba hari inzu Gen Maj Paul Kagame yabagamo; ni naho hari hari Icyicaro Gikuru cya RPA na FPR-Inkotanyi

Inzu Gen Maj Paul Kagame yabagamo; ni naho hari hari Icyicaro Gikuru cya RPA na FPR-Inkotanyi
Idirishya ryo hirya kuri iyi nzu, ni iry'icyumba Perezida Kagame yararagamo
Muri iyi nzu niho Gen Maj Paul Kagame yahuriraga n'abandi basirikare bakuru
Iyi nzu yakoreshwaga nk'uburiro, ahakirirwaga abantu basuraga FPR, ahakorerwaga inama n'ibindi mu gihe cy'urugamba
Inzu yitiriwe Arusha, kubera ko ariho FPR na RPA babanzaga gukorera inama ku ngingo zikenewe mu gihe cy'imishyikirano
Hepfo y'inzu yitiriwe Arusha hari 'Piscine" yakoreshwa n'abasirikare ba RPA
Iyi ni imashini yakoreshwaga bashyira amazi muri 'Piscine'
Iyi nyubako ni iyari igenewe abagore n'abakobwa bari bari mu bikorwa bitandukanye byo gushyigikira urugamba, barimo n'abasirikare
Nyuma yo kuvugurura iyi nzu, hazashyirwamo amashusho n'ibindi biranga amateka y'abagore barwanye urugamba rwo kubohora igihigu

Mu byafashije Inkotanyi kumenyerana n’abandi bantu bari mbere mu gihugu, harimo n’imikino itandukanye

JPEG - 657.6 kb
Iki ni ikibuga cya Tennis, Perezida Kagame yajya akoresha mu gihe cy’urugamba
Kuri iki kibuga niho havukiye ikipe ya APR FC
Umukino wahabereye, wahuje Abakombozi bo muri PSD, warangiye RPA itsinze Abakombozi 2-1

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .