00:00:00 IGIHE NETWORK KN KINYARWANDA EN ENGLISH FR FRANCAIS

Icyizere gishya ku ifatwa rya Maj. Mpiranya warindaga Habyarimana, Afurika y’Epfo yongeye kunengwa

Yanditswe na Musangwa Arthur
Kuya 21 Ukuboza 2021 saa 09:53
Yasuwe :

Maj. Protais Mpiranya, wari mu mutwe w’abasirikare barindaga Juvénal Habyarimana ni umwe mu bantu bamaze igihe kinini bihishe ubutabera aho atarabasha kugezwa mu nkiko ngo aburanishwe ku byaha akurikiranyweho birimo gutegura no gukora Jenoside, ubufatanyacyaha mu gushyira mu bikorwa Jenoside, ibyaha byibasiye inyokomuntu n’ibindi byaha by’intambara.

Mpiranya w’imyaka 60 y’amavuko, yahoze akuriye umutwe w’abasirikare barindaga Perezida Juvénal Habyarimana, yagezemo mu 1991.

Icyo gihe iryo tsinda ryayoborwaga na Lt-Col. BEM Nkundiye Léonard, gusa biza kurangira mu 1993 Mpiranya amusimbuye kuri uwo mwanya.

Muri Jenoside yakorewe Abatutsi ni we wari uyoboye iryo tsinda ry’abasirikare barindaga Perezida ryahise rifata ubuyobozi nyuma y’ihanurwa ry’indege ya Habyarimana tariki ya 6 Mata 1994.

Bimwe mu byo Mpiranya ashinjwa hamwe na bagenzi be ni ubwicanyi ndengakamere bakoreye abanyapolitiki bakomeye batavugaga rumwe na Leta.

Abanyapolitiki bahise bicwa harimo Uwilingiyimana Agathe wari Minisitiri w’Intebe hamwe n’abasirikare 10 b’Ababiligi bamurindaga bari mu butumwa bwo kubungabunga amahoro.

Bishwe mu masaha make nyuma y’ihanurwa ry’indege ya Habyarimana, igitero cyabishe kikaba cyari kiyobowe na Mpiranya nk’uko byagiye bigaragazwa na raporo zitandukanye.

Mpiranya afatwa nk’umwe mu bantu batatu batorotse ubutabera mpuzamahanga igihe kinini hamwe na Kabuga ndetse na Bizimana Augustin, biherutse gutahurwa ko yapfuye muri Kanama 2000, aguye mu gace ka Pointe Noire muri Repubulika ya Congo-Brazaville.

Uretse uruhare yagize mu ishyirwa mu bikorwa rya Jenoside yakorewe Abatutsi, Mpiranya ni umwe mu bagize uruhare mu inozwa ry’uyu mugambi.

Nyuma y’imyaka myinshi Leta ya Zimbabwe ihakana ko icumbikiye Mpiranya, muri Nzeri 2012 ni bwo yeruye yemeza ko ashobora kuba yihishe muri icyo gihugu.

Bivugwa ko yahinduye imyirondoro ye ku buryo akoresha amazina atandukanye arimo Theophase Mahuku na James Kakule.

Hari amakuru yagaragaje ko izina Kakule James ari ryo ryanditswe kuri Pasiporo No B 0511266 yahawe na Uganda mu 2005 ifite igihe cy’imyaka 10.

Icyo gihe byatangajwe ko Mpiranya yakoranaga n’abacuruzi bakomeye muri Zimbabwe n’umutwe wa FDLR yabereye umujyanama igihe kinini ari na bo bamufashaga no gukorera ingendo mu bindi bihugu bya Afurika.

Kuba Zimbabwe yarakingiye ikibaba Mpiranya iyi myaka yose, amakuru yizewe avuga ko byatewe n’umubano ukomeye yari yaramaze kugirana n’abasirikare bakuru bo muri iki gihugu.

Icyizere gishya

Umushinjacyaha Mukuru w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT), Dr Serge Brammertz, ni umwe mu bantu bakunze kunenga Zimbabwe byeruye kubera ko nta bushake yigeze igaragaza mu gushyikiriza uyu mugabo ubutabera.

Mu cyumweru gishize ubwo yari imbere y’Akanama ka Loni gashinzwe umutekano ku Isi, Brammertz yumvikanye mu mvugo igaragaza ko Zimbabwe yaba yarikubise agashyi ikemera gutanga umusanzu wayo ngo Mpiranya ashyikirizwe ubutabera.

Uyu mugabo yavuze ko “hari ibimenyetso bigaragaza ko Zimbabwe iri gukora ibishoboka byose ngo ite muri yombi Protais Mpiranya wahoze akuriye umutwe w’abasirikare barindaga Perezida w’u Rwanda”.

Yakomeje avuga ko amakuru yizewe bafite ari uko uyu mugabo akiba muri Zimbabwe. Ati “Ndacyeka ko yahabaye kuva mu 2000 kandi hari icyizere gikomeye ko ari ho akiri. Leta ya Zimbabwe iri kugira uruhare cyane mu iperereza ihuriyeho n’ubushinjacyaha mpuzamahanga kurenza uko byari bimeze mbere.”

Mpiranya yavukiye mu yahoze ari Komini Giciye, Perefegitura ya Gisenyi mu 1960, ubu ni mu Karere ka Nyabihu.

Yize amashuri abanza muri aka gace avukamo, akomereza icyiciro cya mbere cy’amashuri yisumbuye ku Kigo cya Shyira, arangiriza ayisumbuye mu Ishuri rya Byimana.

Mu 1979 ni bwo yinjiye mu Ishuri Rikuru rya Gisirikare (ESM) afite imyaka 19 arirangizamo mu 1983 afite ipeti rya “Sous-Lieutenant”, ari na bwo yahise yoherezwa gukora muri Jandarumori.

Yakoze imyitozo n’amahugurwa bitandukanye, yaba mu Budage, mu Bufaransa n’ahandi ndetse agenda ahabwa inshingano zinyuranye kugeza mu 1991 ubwo yimurirwaga mu itsinda ry’abasirikare barinda Perezida.

Yongeye gukurugutura Afurika y’Epfo

Mu bihugu Serge Brammertz akunze kunenga kubera ko bitagaragaza ubushake mu gushyikiriza ubutabera abagize uruhare muri Jenoside yakorewe Abatutsi, Afurika y’Epfo iza ku isonga.

Umuhate muke w’iki gihugu Serge Brammertz yongeye no kuwugarukaho ubwo yari imbere y’aka kanama ka Loni.

Uyu mugabo anenga Afurika y’Epfo kuba icumbikiye Kayishema Fulgence wagize uruhare mu isenywa rya Kiliziya ya Nyange yarimo Abatutsi barenga 2000 baje kubura uko basohoka bagapfiramo. Ibi byabaye ku itariki 15 Mata 1994.

Brammertz yavuze ko Guverinoma ya Cyril Ramaphosa iri gutuma habaho ugukererwa gukabije muri gahunda yo guta muri yombi abakekwaho uruhare muri Jenoside bahungiye muri Afurika y’Epfo.

Yavuze ko “kutagaragaza ubufatanye kwa Afurika y’Epfo, biri mu nzitizi zihambaye ibiro bye byaba byarahuye na zo.”

Yanenze iki gihugu ngo kuko kitarashyiraho uburyo bwo gukurikirana abagize uruhare muri Jenoside nubwo abayobozi bacyo bahora bamwizeza ibitangaza.

Si ubwa mbere Brammertz anenze Afurika y’Epfo imbere y’Akanama k’Umuryango w’Abibumbye gashinzwe Umutekano ku Isi kuko no muri Kamena 2021 byabaye.

Iki gihe yavuze ko Afurika y’Epfo yabaye indiri n’ahantu heza ho guhungira ku bakekwaho uruhare muri Jenoside yakorewe Abatutsi mu 1994.

Serge Brammertz yanenze Afurika y'Epfo imbere y’Akanama k’Umuryango w’Abibumbye gashinzwe Umutekano ku Isi
Protais Mpiranya amaze igihe yihishe muri Afurika y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .