Ibyo wamenya kuri Banyangiriki wahamwe n’ibyaha bya Jenoside wari umaze imyaka 12 yihishahisha mu Rwanda

Yanditswe na Prudence Kwizera
Kuya 20 Nzeri 2020 saa 01:46
Yasuwe :
0 0

Banyangiriki Isaac ukomoka mu Murenge wa Save mu Karere ka Gisagara yakatiwe igifungo cy’imyaka 30 n’Inkiko Gacaca nyuma yo guhamwa n’ibyaha bya Jenoside yakorewe Abatutsi mu 1994, ariko ntiyafungwa kuko yahise aburirwa irengero.

Uwo mugabo w’imyaka 50 y’amavuko mu rukerera rwo ku wa Gatanu tariki ya 18 Nzeri 2020, yafashwe agerageza kwiba mu Murenge wa Ruhashya mu Karere ka Huye.

Abamufashe bashakishije uwo ari we basanga amaze igihe ashakishwa n’ubutabera kuko yagize uruhare muri Jenoside yakorewe Abatutsi.

Bivugwa ko yari yajyanye n’abandi kwiba ariko bo barirukanse baracika, kugeza ubu ntibarafatwa. Banyangiriki bamusanganye icyuma, inkota n’ipiki.

Ubusanzwe Banyangiriki avuka mu Mudugudu wa Gasambu mu Kagari ka Gatoki mu Murenge wa Save. Ni mwene Nzabamwita Venuste na Nyirakamana Anastasie.

Perezida wa Ibuka mu Murenge wa Save, Mukarutamu Daphrose, yabwiye IGIHE ko asanzwe azi Banyangiriki kuko bari baturanye kandi yagize uruhare muri Jenoside yakorewe Abatutsi aza no kubihamywa n’Inkiko Gacaca mu 2008 akatirwa igifungo cy’imyaka 30.

Banyangiriki ashinjwa ko yagize uruhare mu kwica kwa Sentore Gabriel na Agatha Nyiraneza. Ashinjwa uruhare mu gutega abantu babaga bahunga muri Jenoside, kuba mu gitero cyagiye kuri Kiliziya i Save kureba abana bari bahahungiye no kubajyana kubica.

Yarezwe kandi kwica imiryango y’ahitwaga kwa Edouard ndetse no kugira uruhare mu bwicanyi bwabereye mu yahoze ari Komini Shyanda.

Mukarutamu ati “Mu 2003 mu ikusanyamakuru rya Gacaca, yavuzwe ko yagize uruhare muri Jenoside, ubwo rero nyuma hakurikiraho kuburana. Mu gihe cyo kuburana muri Gacaca ntiyigeze aboneka ngo aburane, yarihishe ntiyaboneka kuko yari azi ibyo yakoze. Kuva ubwo bamuciriye urubanza baramukatira adahari, noneho arabura ariko bakomeza kumushakisha kugira ngo ajye gukora igihano cye.”

Bakomeje gushakisha bayoberwa aho yagiye ariko amakuru akajya avuga ko ari iwabo mu rugo, gusa inzego z’ubuyobozi n’iz’umutekano zagerayo zikamubura.

Mukarutamu ati “Hakaba abantu bavuga bati ‘twamubonye ari iwabo’ ndetse n’inzego z’umutekano zikajyayo bagatangatanga ariko bakamubura. Hakaba ubwo bamubona akirukanka akabacika, ubwo rero yakomeje gushakishwa arabura bigera n’aho bavuga ko yapfuye.”

Muri icyo gihe ngo bamwe mu bo mu muryango we bagiye babazwa bakavuga ko yapfuye, ariko abandi bakavuga ko bajya bamubona aje iwabo ku babyeyi be.

Amakuru avuga Banyangiriki nta mugore yashatse ariko yabyaranye abana bagera kuri batatu n’umugore wa mukuru we. Uwo mukuru we arafunzwe kuko yahamwe n’ibyaha bya Jenoside yakorewe Abatutsi akatirwa gufungwa imyaka 25.

Kuba mu gatsiko k’abajurura batobora inzu

Amakuru aturuka mu Murenge wa Save mu Karere ka Gisagara avuga ko hari agatsiko k’abajura kajya kwiba mu masaha y’ijoro kagapfumura inzu kakica n’abantu kandi bikekwa ko na Banyangiriki yari akarimo.

Bamwe mu bakekwa ko bari muri ako gatsiko k’abajura harimo murumuna we kuri ubu uri gushakishwa kuko yahise aburirwa irengero bakimara gufata Banyangiriki. Harimo kandi n’umucuruzi ukora n’umwuga w’ubumotari wakoreraga mu gasantere ka Rwanza (we yamaze gufatwa ari kubaza).

Hari abandi bakihishahisha

Mukarutamu yavuze ko hari abandi bantu bo muri uwo murenge bagize uruhare muri Jenoside yakorewe Abatutsi, bakatiwe ibihano n’Inkiko Gacaca ariko kugeza ubu bakihishahisha hirya no hino mu gihugu, asaba ko nabo bashakishwa.

Ati “Barahari kuko hari n’uwatorotse uburoko (gereza); barahari benshi kuko hari n’abavugwa ko baba i Kigali kandi bafite amadosiye. Hari abantu bakorewe amadosiye baciriwe imanza na Gacaca batigeze bakora ibihano bahawe. Inzego zibishinzwe twazisaba gukurikirana n’abandi babuze hakamenyekana neza aho baba. Usibye nk’uko kumubona, ntabwo babakurikirana mu buryo bukwiriye rwose.”

Bamwe mu barokotse Jenoside yakorewe Abatutsi bo mu Murenge wa Save mu Karere ka Gisagara basaba ko Banyangiriki yazabazwa aho we na bagenzi be bagiye bajugunya Abatutsi bamaze kwica kuko kuri ubu hari abo imibiri yabo itaraboneka ngo ishyingurwe mu cyubahiro.

Bifuza kandi ko yabazwa neza hakamenyekana aho amaze igihe kirenga imyaka 12 yihishe kugira ngo abagize uruhare mu kumuhisha nabo babibazwe.

Urwego rw’Igihugu rw’Ubugenzacyaha, RIB, ruvuga ko kugeza ubu Banyangiriki yamaze gufatwa kandi dosiye ye iri kwigwaho n’inzego zibishinzwe kugira ngo ubutabera bwubahirizwe.

Umuvugizi wa RIB, Dr Murangira B. Thierry, yabwiye IGIHE ko Banyangiriki afungiye kuri Sitasiyo ya Save.

Dr Murangira yavuze ko amakuru y’ibanze bafite ari uko yari amaze igihe yihishahisha hirya no hino mu gihugu mu bice bitandukanye birimo no mu Karere ka Nyaruguru.

Yasabye abaturage kujya batanga amakuru igihe cyose babonye umuntu batazi cyangwa uwo bazi ko hari ibyaha akurikiranyweho kugira ngo ajye mu butabera kuko guhishira umunyabyaha bihanwa n’amategeko.

Inkuru wasoma: Gisagara: Uwakatiwe n’Inkiko Gacaca gufungwa imyaka 30 akaburirwa irengero, yafashwe agerageza kwiba

Banyangiriki Isaac yari amaze imyaka 12 ashakishwa kuko yakatiwe n'Inkiko Gacaca gufungwa imyaka 30
Byanyangiriki Isaac yafashwe yagiye kwiba mu Murenge wa Ruhashya bamusangana icyuma, inkota n’ipiki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .