Ibyo u Rwanda rutumiza mu mahanga byagabanutse kuri 32% muri Mata 2020

Yanditswe na Cyprien Niyomwungeri
Kuya 18 Kamena 2020 saa 07:34
Yasuwe :
0 0

Raporo nshya y’Umuryango w’Isoko rusange ry’Ibihugu bya Afurika y’Iburasirazuba n’Amajyepfo (COMESA), ku ngaruka icyorezo cya Coronavirus cyagize ku bucuruzi, yerekanye ko ibyo u Rwanda rutumiza n’ibyo rwohereza mu mahanga byagabanutse cyane ugereranyije Mata na Werurwe 2020.

Iyi raporo yasohotse mu cyumweru gishize, yatanze ishusho y’urujya n’uruza rw’ibicuruzwa ku mipaka y’u Rwanda, mbere na nyuma y’uko icyorezo cya Coronavirus kigera mu gihugu.

Nk’uko iyi raporo ibigaragaza, ibitumizwa mu mahanga byinjira mu Rwanda byagabanutse ku kigero cya 32% muri Mata ugereranyije na Werurwe 2020.

Ku mupaka wa Rusumo, urujya n’uruza rw’ibicuruzwa rwagabanutse ku kigero cya 35%, naho ku bibuga by’indege rwagabanutse ku kigero cya 16%.

Ku bijyanye n’ibyoherezwa mu mahanga biva mu Rwanda, byagabanutse ku kigero cya 8% muri Mata ugereranyije na Werurwe 2020.

Raporo yerekana ko kwakira imisoro n’amahoro ya gasutamo nabyo byagizweho ingaruka cyane kuko byagabanutseho 55% muri Mata ugereranyije na Werurwe. Ku mupaka wa Rusumo imisoro n’amahoro ya gasutamo yagabanutse ku kigero cya 52%, Kagitumba ni 71%, naho ku kibuga cy’indege ni 41%.

Mu kwirinda ikwirakwira rya Coronavirus, imwe mu ngamba zafashwe ni uko serivisi za gasutamo zose zimuriwe ku mipaka aho ibicuruzwa byinjirira mu gihugu, hanategurwa uburyo abashoferi baturukana hanze aya makamyo bajya bagarukira ku mupaka ntibagere mu gihugu kereka abatwaye ibyangirika na peteroli.

Hashyizweho kandi ububiko bw’ibicuruzwa (warehouses) ku mipaka, mu rwego rwo kugira ngo horoshywe uburyo bwo gupakurura no gupakira ibicuruzwa bituruka hanze y’Igihugu.

Imizigo n’ibinyabiziga biyitwaye birapakururwa bigashyirwa mu bubiko cyangwa mu zindi modoka bikigera kuri Gasutamo byinjiriyeho mu Rwanda. Serivisi zose za Gasutamo zatangirwaga i Kigali n’ahandi imbere mu gihugu, zitangirwa ku mipaka.

Ku mupaka wa Rusumo, hari serivisi zose za gasutamo, n’ububiko bucungwa n’abasanzwe bakora izi serivisi mu Rwanda aribo MAGERWA, DP World na Boloré. Ibi byose bikaba biri ku buso bungana na ha 7,5 ariko ahubatse hangana na ha 5. Kuva izi serivisi zatangira, ngo hagiye hagaragara ikibazo cyo kuhatinda kw’amwe mu makamyo, kandi nyamara ku munsi yaparika arenga ku 100. Ku mupaka wa Kagitumba na ho hashyizwe izi serivisi.

Minisitiri w’imari n’igenamigambi Dr Ndagijimana Uzziel, yavuze ko kubera guhungabana kw’ibikorwa by’ubucuruzi byavagamo imisoro, bizagira ingaruka ku misoro yakusanywaga ku buryo imisoro izinjizwa mu 2020/2021 izagabanuka ikagera kuri miliyari 1421 Frw ugereranyije na miliyari 1569 Frw yakusanyijwe mu ngengo y’imari iri gusozwa.

Ati “Ingengo y’imari izagirwaho ingaruka n’ubwoko bubiri; icya mbere ni uko amafaranga yagombaga kwinjira mu isanduku ya leta ava mu misoro azagabanuka urebye no ku bucuruzi byagaragaye ko amahoro yatangiye kugabanuka avuye ku bitumizwa hanze ariko n’imisoro y’imbere mu gihugu bitewe n’uko ibikorwa nabyo byasubiye inyuma, birasobanura ko n’imisoro ivamo nayo izagabanuka”.

RRA ivuga ko abatumiza ibicuruzwa mu mahanga bagomba gukoresha EBM y’icyiciro cya kabiri (EBM version 2), kugira ngo boroherezwe mu igenzura n’irekurwa ry’ibicuruzwa muri Gasutamo.

Kugabanuka kw'ibyinjira n'ibisohoka mu gihugu byagize ingaruka ku misoro yinjira mu isanduku ya leta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .