Ibyambu ku Kivu, gari ya moshi n’Ikibuga cy’Indege cya Bugesera mu mishinga igiye kwagura urwego rw’ubwikorezi

Yanditswe na Twarabanye Venuste
Kuya 8 Gicurasi 2020 saa 10:09
Yasuwe :
0 0

Muri gahunda y’Igihugu yo kwihutisha Iterambere (NST1), u Rwanda rwiyemeje gushyira imbaraga mu mishinga yagutse y’ubwikorezi iri mu by’ingenzi byubakirwaho ubukungu bwarwo.

Guhindura urwego rw’ubwikorezi si inzozi ku Rwanda kuko byagaragariye buri wese ubwo hatangiraga umushinga wo kubaka Ikibuga Mpuzamahanga cy’Indege mu Karere ka Bugesera n’umuhanda wa Gari ya Moshi Isaka-Kigali. Iyi mishinga yiyongereyeho ibyambu bizubakwa ku Kiyaga cya Kivu.

Umushinga wo kubaka ibyambu ku Kivu ukubiye muri gahunda ya NST1 hagamijwe guteza imbere ubucuruzi bwambukiranya imipaka hagati y’u Rwanda na Repubulika Iharanira Demokarasi ya Congo.

Guverinoma y’u Rwanda yemeje ko hazubakwa ibyambu bine ku Kivu birimo ikizubakwa mu Karere ka Rubavu, aka Rusizi, i Rutsiro kuri Santere y’Ubucuruzi ya Nkora iri ku mazi n’icy’i Karongi.

Uyu mushinga wose uzatwara miliyoni 24 z’amadolari ya Amerika ndetse ku bufatanye bw’u Rwanda, Ikigo giharanira Iterambere ry’Ubucuruzi muri Afurika y’Iburasirazuba (TradeMark East Africa,_TMEA) n’u Buholandi iyo ngengo y’imari yarabonetse.

Imirimo yo kubaka ibyambu bibiri binini; icya Rubavu n’icya Rusizi yatangiye mu Ukuboza 2019. Byitezwe ko umushinga wose uzamara amezi 18, bikaba biteganyijwe ko imirimo izaba irangiye mu 2022. Ibyambu nibimara kuzura biteganyijwe ko bizegurirwa abikorera.

Umuhanda wa Gari ya Moshi uzatuma u Rwanda rukora ku Nyanja y’u Buhindi

Kubaka imihanda ya gari ya moshi nabyo biteganyijwe muri gahunda y’igihugu yo kwihutisha iterambere. U Rwanda ruhanze amaso imishinga ibiri y’imihanda ya gari ya moshi izarugeza ku Nyanja y’Abahinde.

Umuhanda umwe n’ufatiye ku muhora wa ruguru uva Mombasa-Nairobi-Kampala-Mirama Hills ukagera i Kigali, undi ni uwo ku muhora wo hagati uva Dar es Salaam-Isaka ugana i Kigali.

Icyiciro cya mbere cyo kubaka umuhanda uzahuza u Rwanda n’umuhora wa ruguru, Mombasa–Nairobi cyararangiye ubu kirakoreshwa.

Kubaka igice cya Nairobi–Naivasha kigeze kuri 50% ni mu gihe kandi Guverinoma za Kenya, Uganda, Rwanda na Sudani y’Epfo biri gushaka ingengo y’imari yo kubaka ahasigaye. Ibice bisigaye ni Naivasha-Kisumu, Kisumu-Malaba, Malaba-Kampala, Kampala–Bihanga–Mirama–Kigali na Tororo-Gulu–Nimule muri Sudani y’Epfo.

Ku muhora wo hagati, Guverinoma yemeranyije na Tanzania kubaka umuhanda wa Dar es Salaam -Isaka-Kigali muri Werurwe 2018.

Inteko Ishinga Amategeko y’u Rwanda yemeje umushinga w’Itegeko ryemera kwemeza burundu amasezerano hagati y’u Rwanda na Tanzania, yerekeye ubufatanye mu ishyirwa mu bikorwa ry’umushinga w’inzira ya Gari ya Moshi, Isaka-Kigali, yashyiriweho umukono i Kigali ku wa 9 Werurwe 2018.

Ni umushinga ukomeye wo kubaka umuhanda wa Gari ya Moshi ureshya n’ibilometero 532, ukazatwara miliyari 3.6 z’amadorali ya Amerika.

Umuhanda wa Gari ya Moshi ufite kilometero 532 muri rusange, ku ruhande rw’u Rwanda uzava Rusumo ugere i Kigali ariko haziyongeraho agace kagera ku Kibuga cy’Indege cya Bugesera.

Ku ruhande rw’u Rwanda uyu muhanda uzaba ureshya na kilometero 138 mu gihe ku ruhande rwa Tanzania ari kilometero 394. Umuhanda wose wa Isaka-Kigali uzatwara miliyari $ 3.6 arimo miliyari $ 2.3 azakoreshwa ku ruhande rwa Tanzania aho kilometero imwe ibarirwa muri miliyoni $ 5.9 naho miliyari $ 1.3 azakoreshwa ku ruhande rw’u Rwanda, aho kilometero izajya utwara miliyoni $ 9.5.

Biteganyijwe ko uyu muhanda uzajyamo gari ya moshi z’umuriro zigenda kilometero 120/h na 180/h.

U Rwanda ruvuga ko uwo muhanda uzagabanya 40% ku giciro cy’ubwikorezi, bigire ingaruka nziza ku byo u Rwanda rwohereza n’ibyo ruvana mu mahanga.

Ubufatanye bw’u Rwanda na Qatar mu mushinga w’Ikibuga cy’Indege cya Bugesera

Guverinoma y’u Rwanda na Qatar Airways zasinyanye amasezerano y’ubufatanye ku wa 9 Ukuboza, aho iki gihugu cyaguze imigabane ingana na 60% mu kubaka Ikibuga cy’Indege cya Bugesera uzatwara miliyari $ 1.3.

Ni nyuma y’uko mu 2016 u Rwanda rwasinyanye amasezerano na Sosiyete y’Ubwubatsi yo muri Portugal yitwa “Mota Engil Engenharia e Construcao Africa”, kugira ngo izubake icyo kibuga.

Ubwubatsi bw’icyo kibuga bwari bwashyizwe mu byiciro. Icya mbere cyagombaga gutwara miliyoni $418, byari biteganyijwe ko kizaba cyuzuye mu Ukuboza 2019.

Nyuma y’icyo cyiciro hagombaga gukurikiraho ibikorwa byo kwagura ahamaze gukorwa, byari byaragenewe agera kuri miliyoni $400; ku buryo cyari gukoreshwa u Rwanda rwakira inama ya Commonwealth muri Kamena 2020, inama yaje gusubikwa bitewe n’ingamba zo kurwanya icyorezo cya koronavirusi cyugarije ibihugu byose byo ku isi harimo n’u Rwanda rwari kuzakira iyi nama.

Uyu mushinga wahagaze mu 2016 hagamijwe kuvugurura igishushanyo mbonera cyakozwe na Sosiyete ya Mota-Engil yo muri Portugal.

Igishushanyo gishya cyemejwe giteganya ko icyo kibuga nicyuzura kizakira abagenzi miliyoni zirindwi, bazagera kuri miliyoni 14 mu 2032.

Amasezerano ya Mota-Engil n’u Rwanda yavugaga ko ifite imigabane 75% naho Guverinoma y’u Rwanda, ihagarariwe na Aviation Travel and Logistics Holding (ATL) ikagira 25%.

Minisitiri Gatete asobanura ko u Rwanda rwaguze imigabane 75% ya Mota-Engil muri uyu mushinga kugira ngo rugire 100%, hanyuma rushaka undi mufatanyabikorwa [Qatar], rumugurisha 60%.’

RwandAir yaguye ibikorwa

Mu bindi byakozwe kandi harimo ko ikigo cy’indege cy’u Rwanda, RwandAir, cyakomeje kwagura ibikorwa byacyo.

Mbere y’uko icyorezo cya Coronavirus gituma ingendo zihagarikwa, indege zayo zakoraga ingendo mu byerekezo 29 byo muri Afurika y’Iburasirazuba, Hagati, Ibirengerazuba, Amajyepfo, u Burasirazuba bwp hagati, u Burayi na Aziya.

Muri ibi bihe bya Coronavirus, ingendo zitwara abagenzi zarahagaritswe, hongerwa imbaraga mu kubakaubushobozi bwo gutwara imizigo, kuko nubwo abantu benshi batava mu ngo, ibyo bakenera ntabwo byigeze bihagarara.

Yifashishije indege zihari, RwandAir yatangije gahunda yo gutwara imizigo iva cyangwa iva mu byerekezo birimo u Burayi n’u Bushinwa.

Iyubakwa ry’imihanda yo mu mijyi no mu byaro

Imbere mu gihugu naho imihanda iri kubakwa mu mijyi no mu byaro. Kugeza ubu hari imihanda iri kubakwa irimo uwa Controle Technique - Nyabisindu – Nyarutarama - Green Hills – Kibagabaga, ibi byajyanye n’ibikorwa byo kwishyura ingurane abatuye Alpha Place – Kabeza.

Umuhanda wa Rwandex- Kigali Convention Centre uri hafi kurangira, ndetse imirimo yo kubaka uwa Gasabo - Airtel- Sport View Hotel - Control Technique n’uwa Mulindi – Rusororo irarimbanyije.

Ku bijyanye n’imihanda yo mu mijyi, hari kubakwa umuhanda wa 54 Km muri Kigali mu rwego rw’umushinga watewe inkunga na Guverinoma y’u Bushinwa. Hari kubakwa kandi ibilometero 105 muri Kigali biteganyijwe ko bizuzura mu Ukuboza 2020.

Muri Kigali hari kubakwa imihanda ireshya na Km 54.56 ; irimo uwa Sonatubes-Gahanga-Akagera ufite Km 13.8.

Icyiciro cya kabiri cyo kubaka imihanda yo mu Mujyi wa Kigali kigizwe na Km 39.7 kirimo imihanda itandatu y’i Kigali no mu mijyi iyunganira n’imiyoboro ya km 10.7 yatangiye tariki 21 Mutarama 2020 izamara amezi 12.

Ubwikorezi mu Mujyi wa Kigali

Mu bijyanye no gutwara abantu muri Kigali, icyiciro cya mbere cy’isoko cyatanzwe muri Kanama 2013 kugeza muri Gicurasi 2020. Guverinoma yemeje politiki y’ubwikorezi mu rwego rwo kubuteza imbere. Byaje bikurikira amavugurura y’ubwikorezi yakozwe muri Kanama 2013.

Gutwara abagenzi byahawe Kigali Bus Services (KBS), Royal Express na RFTC. N’ubwo hari byinshi byahindutse haracyari ikibazo cyo gukora nta ngengabihe ihamye bituma abantu batamenya igihe imodoka ikorera.

Mu cyico cya Kabiri kizava muri Gicurasi 2020 kugeza Gicurasi 2025 hari byinshi byo kuvugurura. Umubare w’abagenda Kigali uriyongera buri munsi, bikenewe kuziba icyuho cyabonetse mu cyiciro cya mbere, Guverinoma iri no kuvugurura ibyo gutwara abantu no kugabanya igihe abantu bamara bategereje imodoka.

U Rwanda rufite imihanda ireshya na 38,803 Km. Muri yo ibilometero birenga 2000 ni kaburimbo, hafi ya yose ikaba yarubatswe nyuma ya Jenoside yakorewe Abatutsi.

Mu rugendo rudasubira inyuma rw’imyaka 25, hasanwe imihanda y’imigenderano ireshya na kilometero 2,487 ugereranyije na kilometero 2,666.8 zakozwe mu 2019/2020. Byitezwe ko iyi mibare izagera ku bilometero 5,145 mu 2024 muri Gahunda y’Igihugu yo kwihutisha Iterambere (NST1).

Muri icyo cyerekezo kandi hazatezwa imbere ibikorwa remezo by’ibanze mu guteza imbere ubuhahirane aho kilometero 250 zizubakwa, mu gihe imihanda ireshya na kilometero 288 izashyirwamo kaburimbo. Ibi bizajyana no gucanira imihanda minini yo ku rwego rw’uturere n’urw’igihugu.

Ikibuga cy'indege cya Bugesera kiri mu mishinga izitabwaho muri gahunda yo kuzahura ubukungu bw'u Rwanda
Mu masangano y'imihanda ahazwi nko kwa Lando cyangwa Kisimenti haratunganyijwe
Imihanda yo mu mijyi yunganira Kigali n'iyi yo ku rwego rw'igihugu izubakwa indi isanwe
Imihanda yamaze kwagurwa, uyu ni umuhanda uca kuri Kigali Convention Centre wahawe inzira ebyiri
RwandAir itegereje ko imipaka y'ibihugu yongera gufungurwa nyuma ya Coronavirus, hagati aho irimo gutwara imizigo
Imijyi itandukanye ikomeje kubakwamo imihanda imeze neza
Umujyi wa Muhanga wahawe imihanda igezweho
Ku kiyaga cya Kivu hagiye gushyirwa ibyambu bizoroshya urujya n'uruza rw'ibicuruzwa
U Rwanda ruteganya gutangira kubaka imihanda igenewe imodoka zitwara abagenzi, ku buryo zisanzura bityo zikihuta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .