Ibipimo bishya nta murwayi byagaragaje- Minisante yasabye abaturarwanda kuba maso mu kwirinda Coronavirus

Yanditswe na Twarabanye Venuste
Kuya 19 Werurwe 2020 saa 09:32
Yasuwe :
0 0

Ni inkuru nziza! Minisiteri y’Ubuzima yatangaje ko nta murwayi mushya wasanganywe icyorezo cya COVID-19 giterwa na Coronavirus mu bipimo byafashwe kuri uyu wa 19 Werurwe 2020.

Coronavirus byemejwe ko yageze mu Rwanda ku wa 14 Werurwe 2020, ubwo yabonekaga ku Muhinde ukorera rimwe mu mashami y’Umuryango w’Abibumbye mu gihugu.

Imibare ya Minisante igaragaza ko abantu 11 aribo bamaze gutahurwaho Coronavirus.

Mu itangazo ryo kuri uyu wa Kane, Minisante yavuze ko ‘‘Uyu munsi nta murwayi wa Coronavirus wagaragaye mu bipimo byafashwe. Ibi bikaba byatumye umubare w’abarwaye Coronavirus uguma kuri 11.’’

Abarwayi bose kuri ubu bari kuvurirwa ahantu habugenewe ndetse hanashakishijwe amakuru ku bantu bose bahuye na bo kugira ngo na bo basuzumwe, bitabweho n’inzego z’ubuzima zibishinzwe.

Rikomeza riti “Nkuko bisanzwe abagenzi bose banyura ku Kibuga Mpuzamahanga cy’Indege cya kigali bagaragaza ibimenyesto bya Coronavirus barashyirwa mu kato mu gihe cy’iminsi 14. Abandi bagenzi bose harimo n’abageze mu Rwanda mu byumweru bibiri bishize baributswa kwishyira mu kato mu gihe cy’iminsi 14 guhera igihe bagereye mu Rwanda, hakurikizwa amabwiriza ya Minisiteri y’Ubuzima.’’

Ku wa Gatatu nibwo u Rwanda rwafashwe umwanzuro wo guhagarika ingendo z’indege ziva n’izinjira mu Rwanda harimo na RwandAir.

Guverinoma y’u Rwanda yanzuye guhagarika ingendo z’indege mu gihe cy’ukwezi mu rwego rwo gukumira ikwirakwira ry’iki cyorezo. Ni mu gihe umubare munini w’abarwayi bose bamaze kugaragarwaho nacyo, ari abari baherutse mu ngendo mu bihugu kirimo.

Ni icyemezo kizatangira gukurikizwa ku wa 20 Werurwe 2020, saa 23h59. Biteganyijwe ko indege zitwara imizigo n’izikora ibikorwa by’ubutabazi zizakomeza gukora.

Minisante yasabye abaturarwanda ‘gukomeza kwitwararika, bakurikiza amabwiriza y’inzego z’ubuzima hibandwa cyane cyane ku gukaraba intoki, kwirinda kujya ahantu hateraniye abantu benshi hashyirwamo intera hagati y’abantu (byibura netero imwe) no kwirinda ingendo zitari ngombwa.’

Ibimenyetso bya Coronavirus birimo kugira umuriro, ibicurane, umunaniro n’inkorora ijyana no kubabara mu muhogo, guhumeka nabi bishobora no gutera umusonga ari na wo ntandaro y’urupfu.

Iyi ndwara ishobora kwandura binyuze mu gukora ku muntu uyirwaye nko mu kuramukanya abantu bahana ibiganza, hakabaho guhererekanya amatembabuzi aturuka mu myanya y’ubuhumekero avuye mu muntu wanduye Coronavirus, akaza kugera ku mazuru, ku munwa cyangwa amaso y’utaranduye, ari naho yinjirira mu mubiri.

U Rwanda rwafashe ingamba zirimo gufunga amashuri, insengero n’ibikorwa bihuza abantu benshi ndetse abakozi bashishikarizwa gukorera mu mu ngo aho bishoboka no kugabanya ingendo mu gukumira ikwirakwira rya Coronavirus.

Inzego z’ubuzima zitanga inama ko ugaragaweho ibimenyetso bya Coronavirus yakwihutira guhamagara umurongo utishyurwa wa 114 cyangwa akitabaza umujyanama w’ubuzima umwegereye.

Minisante yasabye abaturarwanda kuba maso no gukurikiza ingamba zashyizweho mu kwirinda Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .