Ibikombe bya pulasitiki byifashishwaga mu guha amazi abitabiriye Car Free Day byahagaritswe

Yanditswe na Evariste Nsengimana
Kuya 19 Ukwakira 2019 saa 02:51
Yasuwe :
0 0

Ubuyobozi bw’Umujyi wa Kigali bwahagaritse ibikombe bya pulasitiki bikoreshwa inshuro imwe, byifashishwaga mu guha amazi abitabiriye Siporo rusange (Car Free Day) mu rwego rwo kubungabunga isuku no kurengera ibidukikije, basabwa kwijyanira ibikoresho byabo.

Ubusanzwe abantu bitabiriye Car Free Day bagiraga ahantu banywera amazi aho uyashaka bayamusukiraga mu gakombe ka pulasitiki gakoreshwa inshuro imwe yamara kuyanywa kakajugunywa.

Amakuru IGIHE yahawe n’Umujyi wa Kigali ni uko inama ubuyobozi bwawo bwakoze itegura Car Free Day, bwemeje ko utwo dukombe ‘Tutazongera gutangwa uhereye iki cyumweru [tariki 20 Ukwakira] bityo abaturage bakaba basabwa kwitwaza ibyo bazakoresha mu kunywa amazi’.

Aya mazi umujyi wa Kigali wayatangaga ku bufatanye n’ibigo biyakora n’ibiyacuruza nka Inyange, Jibu, WaterLife n’ibindi.

Bwemeje ko ibyo bigo ‘Bizajya bizana amazi mu bicupa binini nk’uko bisanzwe, umuntu akitwaza icupa bamushyiriramo amazi aakaba ari ryo anywesha.’

Uyu mwanzuro wafashwe mu rwego rwo gushyira mu bikorwa gahunda ya Leta yo guca ibikoresho bya pulasitiki kuko byangiza ibidukikije.

Mu ntangiriro z’iki cyumweru nibwo Minisiteri y’Ibidukikije yatangaje ko abafite ibikoresho bikozwe muri pulasitiki bikoreshwa inshuro imwe mu bubiko bwabo bagomba kubikoresha cyangwa kubicuruza bigashiramo mu gihe cy’amezi atatu, inganda zihabwa imyaka ibiri yo kuba zatangiye gukora ibikoresho byemewe.

Ni icyemezo gishingiye ku itegeko N° 17/2019 ryo ku wa 10/08/2019 ryerekeye kubuza ikorwa, itumizwa mu mahanga, ikoreshwa n’icuruzwa ry’amashashi n’ibikoresho bikozwe muri pulasitiki bikoreshwa inshuro imwe, riherutse gusohoka mu igazeti ya leta.

Mu bikoresho bya Pulasitiki rireba harimo amashashi yose, imiheha, amasahani, ibikombe, ibiyiko n’amakanya bikoreshwa inshuro imwe, ibipfunyikwamo ibiribwa n’ibindi bintu, ububiko cyangwa ibitwarwamo impapuro bikoze muri pulasitiki.

Imibare itangwa na Minisiteri y’Ibidukikije yerekana ko ubu hakorwa toni zisaga miliyoni 300 za pulasitiki buri mwaka, hakiyongeraho za miliyari z’amacupa na miliyari eshanu z’amashashi ya pulasitiki.

Kimwe cya kabiri cya pulasitiki zikoreshwa zirajugunywa zigahinduka umwanda. Hatagizwe igikorwa mu kubigabanya mu 2050 inyanja zose zo ku isi hazaba harimo pulasitiki ziruta amafi.

Ibikombe bya pulasitiki byifashishwaga n'abitabiriye Car Free Day ntabwo bizongera gukoreshwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza