00:00:00 IGIHE NETWORK KN KINYARWANDA EN ENGLISH FR FRANCAIS

Ibicuruzwa byakuriweho amahoro ya gasutamo hagati y’u Rwanda na RDC byiyongereye

Yanditswe na Mukwaya Olivier
Kuya 4 Ukuboza 2021 saa 07:41
Yasuwe :

Ibicuruzwa byambukiranya imipaka ihuza u Rwanda na Repubulika Iharanira Demokarasi ya Congo bisonewe gutanga amahoro byiyongereye biva kuri 70 bigera kuri 162.

Uyu mwanzuro wafashwe nyuma y’inama y’iminsi ibiri yahuje inzego za Gasutamo z’u Rwanda na RDC yasuzumye ishyirwa mu bikorwa ry’amasezerano agamije koroshya ubucuruzi buciriritse bwambukiranya imipaka. Yateguwe ku bufatanye bw’Ikigo cy’Igihugu cy’Imisoro n’Amahoro na Ministeri y’Ubucuruzi n’Inganda.

Impande zombi zemeranyije ko abakora ubucuruzi buciriritse bwambukiranya umupaka bagomba koroherezwa hubahirijwe amabwiriza y’Umuryango w’Isoko Rusange ry’Ibihugu bya Afurika y’Iburasirazuba n’Amajyepfo (COMESA).

Umuyobozi Mukuru wa Gasutamo n’Imisoro muri RDC, Désiré-Benoit Nianda Malanda, yavuze ko igihugu cye n’u Rwanda bimaze igihe biganira ku kuzamura amahame y’ubucuruzi ya COMESA.

Yagize ati “Guhera mu mwaka wa 2016 turimo kugenda tuzamura amahame y’ubucuruzi y’Umuryango wa COMESA, yashyizweho umukono n’ibihugu byombi mu rwego rwo kuzamura ubucuruzi. Aya masezerano yerekanaga urutonde rw’ibicuruzwa bisonewe mu guteza imbere ubucuruzi buciriritse; gahoro gahoro turimo kureba uko twakongeraho bikomeye biva mu bihugu byacu nibyemezwa bizahita bishyirwa mu bikorwa.”

Muri iyi minsi muri ibi bicuruzwa hongerewemo ibicuruzwa biva mu nganda ndetse impande zombi zumvikanye ko zizajya zihura nyuma ya buri mezi atandatu.

Komiseri ushinzwe za Gasutamo mu Kigo cy’Imisoro n’Amahoro, RRA, Mwumvaneza Félicien, yavuze ko imiterere y’ubucuruzi bwambukiranya umupaka bizagirira akamaro abacuruzi baciriritse n’igihugu mu gihe bizemezwa n’Inama y’Abaminisitiri b’Inganda.

Yakomeje ati “Twumvikanye ko umucuruzi uzajya wohereza ibicuruzwa bitarengeje agaciro k’amadolari 500 bitazajya bicibwa amahoro nubwo amategeko ya COMESA avuga ibihumbi bibiri by’amadolari.”

Muri ibyo biganiro, hari ibicuruzwa byumvikanyweho ko byasonerwa amahoro ya gasutamo byiganjemo ibikomoka ku buhinzi n’ubworozi mu gihe bitarengeje 500$.

Ibi byiyongeraho ko ibicuruzwa byambuka byavuye kuri 70 bigera ku 162; hiyongereyemo n’ibindi bitunganyijwe mu nganda birimo imyenda n’inkweto.

Mwumvaneza yakomeje avuga ko ibiganiro bizakomeza ku buryo ibi bicuruzwa byaziyongera kugira ngo ubucuruzi bukomeze gukorwa neza.

Mu mbogamizi Abanye-Congo bagaragaje hari ibicuruzwa banze ko bisonerwa amahoro kubera ko byahombya ibikomoka mu nganda zabo ariko bakavuga ko ibiganiro bizakomeza.

Abakora ubucuruzi buciriritse bwambukiranya umupaka mu Karere ka Rubavu bari bamaze iminsi bataka gucibwa amahoro ya gasutamo ku bicuzuruzwa byabo bakavuga ko bibateza igihombo kuko usanga igishoro cyabo kikiri hasi.

Umuyobozi Mukuru wa Gasutamo n’Imisoro muri RDC, Désiré-Benoit Nianda Malanda, yavuze ko igihugu cye n’u Rwanda bimaze igihe biganira ku kuzamura ubucuruzi
Ibiganiro byahuje u Rwanda na RDC byabereye mu Karere ka Rubavu
U Rwanda rwari ruhagarariwe n'abayobozi mu nzego zitandukanye
Intumwa z'u Rwanda n’iza Repubulika Iharanira Demokarasi ya Congo zahuriye mu biganiro by’iminsi ibiri byashibutsemo icyemezo cyo kongera umubare w'ibicuruzwa byasonewe amahoro ya Gasutamo biva kuri 70 bigera ku 162

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .