I&M Bank yegukanye igihembo cy’umwaka: Uko ibigo byahembwe muri RDB Business Excellence Awards (Amafoto)

Yanditswe na Mukaneza M.Ange
Kuya 19 Mutarama 2019 saa 12:51
Yasuwe :
0 0

Ikigo cy’Igihugu cy’Iterambere (RDB), ku nshuro ya gatandatu cyahembye abashoramari babaye indashyikirwa mu mwaka 2018, aho igihembo nyamakuru cy’umushoramari w’umwaka cyegukanywe na I&M Bank.

Ibi bihembo bizwi nka 2018 RDB Business Excellence Awards, byatanzwe mu ijoro ryo ku wa 18 Mutarama 2019 mu gikorwa cyabereye muri Kigali Convention Centre.

Byatanzwe mu byiciro bitandukanye birimo igihembo cy’umushoramari w’umwaka wabaye I&M Bank, icy’umushoramari mushya w’umwaka ariwe Afriprecast ikora ibikoresho by’ubwubatsi naho igihembo cy’ikigo cyohereza ibintu mu mahanga cyegukanywe na Africa Improved Food (AIF) yari yegukanye igihembo cy’umushoramari w’umwaka mu 2017.

Igihembo cy’umucuruzi mushya wohereza ibintu mu mahanga cyahawe Garden Fresh yohereza mu mahanga umusaruro ukomoka ku buhinzi naho igihembo cy’uwagaragaje udushya kurusha abandi gihabwa Babyl, ikigo gifasha abantu kwisuzumisha no kwivuza binyuze kuri telefoni igendanwa.

Hanatanzwe igihembo cy’ishoramari ry’umugore w’umwaka cyegukanywe na Get It igira uruhare mu gutuma umusaruro ukomoka ku buhinzi by’umwihariko imboga n’imbuto ugera ku muguzi ukimeze neza naho icy’umushoramari muto cyahawe Cow Horns Rwanda ikora ibihangano by’ubugeni mu mahembe y’inka.

Igihembo cy’uwateje imbere ibikorerwa mu Rwanda cyegukanywe na Entreprise Urwibutso itunganya umusaruro w’ubuhinzi n’ubworozi naho igihembo cy’umucuruzi mushya wateje imbere ibikorerwa mu Rwanda gihabwa East African Granite Industries ikora amakaro.

Ikigo gikora ubucuruzi buto n’ubuciriritse cy’umwaka cyabaye Pascal Technology Limited, gikora ibijyanye n’ikoranabuhanga ryibanda kuri porogaramu za mudasobwa zorohereza abacuruzi batandukanye mu gihe igihembo cy’umushoramari watanze serivisi nziza cyahawe Ivuriro Legacy Clinics.

Umuyobozi Mukuru wa RDB, Clare Akamanzi, yavuze ko ari ingenzi cyane gushima uruhare rw’abikorera mu iterambere ry’igihugu, by’umwihariko mu gihe umwaka ushize hagezwe kuri byinshi.

Ati “Bwa mbere RDB yabashije kwandika ishoramari rifite agaciro kari hejuru ya miliyari ebyiri z’amadolari, iyi ikaba ari inyongera ya 20% ugereranyije n’iryanditswe mu 2017”.

Yakomeje avuga ko igishimije kurushaho ari uko 26% by’iri shoramari riri mu mishinga ifitanye isano no kohereza ibicuruzwa mu mahanga, mu gihe inzego zirimo inganda, ubucukuzi bw’amabuye y’agaciro n’ubuhinzi n’ubworozi byihariye 57%.

Minisitiri w’Ibikorwaremezo, Amb.Claver Gatete, wari umushyitsi mukuru, nawe yagarutse kuri ibi bihembo, avuga ko kuba byiyongera ndetse bikarushaho kuba byiza ari ikimenyetso ko urwego rw’abikorera rugenda rutera imbere.

Ati “Guverinoma yacu ifite intego imwe y’ingenzi ariyo kurushaho gutuma ubuzima bw’abaturage bacu burushaho kuba bwiza kugira ngo tugire igihugu gikungahaye. Ibi ntibishobora kugerwaho tudafite abikorera bahagaze neza n’iteranmbere ry’urwego rw’imari.”

Ibihembo bya RDB Business Excellence Awards bigamije kwereka abandi bashoramari icyitegererezo bakwiye kugenderaho mu kurushaho kunoza imikorere.

Minisitiri w'Ibikorwaremezo, Amb.Claver Gatete, ashyikiriza Umuyobozi Mukuru wa I&M Bank, Robin Bairstow, igihembo cy'umushoramari w'umwaka wa 2018

Minisitiri w'Ubuhinzi Minisitiri Dr Geraldine Mukeshimana ashyikiriza igihembo Pascal Ndizeye washinze Pascal Technology Limited, cy'umushoramari ukora ubucuruzi buto n'ubuciriritse
Minisitiri w'Ikoranabuhanga na Inovasiyo, Ingabire Paula, ashyikiriza uwari uhagarariye Babyl igihembo cy'umushoramari wahanze udushya
Minisitiri w'Ubuzima, Dr Diane Gashumba ashyikiriza Jean Malic Kalima washinze Legacy Clinics igihembo cy'Umushoramari wahize abandi muri serivisi nziza
Minisitiri w'Urubyiruko, Rosemary Mbabazi ashyikiriza Jean Marie Vianney Habiyaremye washinze Cow Horns Rwanda, igihembo cya rwiyemezamirimo ukiri muto wahize abandi
Umuyobozi Mukuru wa AIF, Prosper Ndayiragije nyuma yo gushyikirizwa igihembo cy'Uwohereza ibintu mu mahanga w’umwaka wa 2018
Umuyobozi Mukuru wa East African Granite Industries, Kabanda R. Donati ashyikirizwa n'Umunyamabanga wa Leta Ushinzwe iterambere ry'abaturage, Dr Mukabaramba Alvera, igihembo cy'Umucuruzi mushya wateje imbere ibikorerwa mu Rwanda
Umuyobozi Mukuru wa RDB, Clare Akamanzi ashyikiriza Francesco De Martino uyobora Afriprecast igihembo cy'umushoramari mushya w'umwaka
Umuyobozi Mukuru wa Entreprise Urwibusto, Sina Gerard, yakira igihembo cy'umucuruzi wateje imbere ibikorerwa mu Rwanda
Uwari uhagararariye Get It ashyikirizwa igihembo n'Umuyobozi Mukuru wa RwandAir, Yvonne Manzi Makolo
Umuyobozi Mukuru wa RDB, Clare Akamanzi yavuze ko umwaka wa 2018 wagenze neza kuko u Rwanda rwabashije kugera ku ishoramari risaga miliyari ebyiri z'amadolari
Abagize akanama nkemurampaka katoranyije abahawe ibihembo nabo bashimiwe
Abahawe ibihembo bitandukanye bya Business Excellence Awards hamwe n'abashyitsi bakuru bitabiriye ibi birori

Kanda hano urebe andi mafoto menshi

Amafoto: Moise Niyonzima & Muhizi Serge

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza