Huye: Polisi yahumurije abamotari bikandagira mu kuyiha amakuru batinya ko isanze atariyo yabahana

Yanditswe na Prudence Kwizera
Kuya 4 Ugushyingo 2020 saa 07:25
Yasuwe :
0 0

Umuyobozi wa Polisi mu Ntara y’Amajyepfo, CSP Kanyamihigo Innocent, yasabye abamotari gukomeza gukorana neza n’inzego z’umutekano batanga amakuru igihe cyose hari uwo baketse ko ashobora guhungabanya umutekano cyangwa gukwirakwiza ibiyobyabwenge.

Yabigarutseho kuri uyu wa Gatatu ubwo yagiranaga ibiganiro n’abamotari bo mu Karere ka Huye, byibanze ku kubibutsa gutanga serivisi nziza, kwirinda impanuka no gukumira ikwirakirwa ry’icyorezo cya COVID-19.

CSP Kanyamihigo yamaze impungenge abatinya gutanga amakuru batizeye neza ko ariyo, abizeza ko ntawe uzabibaziza.

Ati “Ndabakangurira ko igihe cyose uzajya ubona uhetse kuri moto ikintu kiguteye amakenga cyangwa utwaye umuntu uteye amakenga, (…) niyo waba wibeshye ukeka, ukavuga uti ‘uyu muntu ndamukeka’ ariko wibeshye, ntabwo tuzakugaya ko wibeshye, tuzaza kandi ntabwo tuzavuga ngo wadutesheje umwanya cyangwa ngo watwitse amavuta yacu.”

Yakomeje agira ati “Icya ngombwa ni uko dusanze ya makenga yawe nta kibi kirimo kuko ntabwo ari ngombwa ko wowe ukora iperereza. Wowe uzatubwire uti ‘iki kintu ntigisobanutse muze mukirebe’. Ntawe uzavuga ngo wibeshye, nta na rimwe, ahubwo tuzagufata nk’Umunyarwanda muzima ubona ikintu akabona ko giteye amakenga akumva ko yatubwira hakiri kare hataraba ikibazo.”

Bamwe mu bamotari bo mu Karere ka Huye baganiriye na IGIHE bavuze ko hari ubwo batinyaga gutanga amakuru kuri Polisi bitewe n’uko batayizeye neza, batinya ko isanze nta kuri kurimo yabahana.

Bavuze ko nyuma y’inama bagiriwe na CSP Kanyamihigo bagiye kurushaho gukorana neza na Polisi no gutanga amakuru nta nkomyi igihe cyose hari amakenga bagize.

Niyonagize Elia ati “Iyi nama tuyungukiyemo byinshi bizadufasha mu kazi dukora ndetse no mu bijyanye no gukorana neza na Polisi tuyiha amakuru igihe cyose.”

Abamotari bibukijwe ko igihe cyose hari uhuye n’ikibazo akwiye kwihutira kukimenyesha inzego zibishinzwe kugira ngo gikemurwe hakiri kare.

Abahura n’akarengane nabo basabwe kujya batinyuka bakabivuga kugira ngo barenganurwe. Basabwe kwirinda impanuka kuko ahanini ziterwa n’umuvuduko mwinshi ndetse no kugenda nabi mu muhanda.

Bibukijwe ko ruswa imunga ubukungu bw’igihugu basabwa kuyirinda no gutanga amakuru igihe hari uyibatse.

Umuyobozi wa Polisi mu Ntara y’Amajyepfo, CSP Kanyamihigo Innocent, yasabye abamotari gukomeza gukorana neza n’inzego z’umutekano batanga amakuru igihe cyose bagize amakenga
Abamotari bahawe umwanya wo gutanga ibitekerezo n'ibibazo bafite
Umuyobozi w'Akarere ka Huye, Sebutege Ange, yasabye abamotari kurushaho kunoza serivisi batanga
Abamotari bo mu Karere ka Huye bagiranye ibiganiro na Polisi y'Igihugu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .