00:00:00 IGIHE NETWORK KN KINYARWANDA EN ENGLISH FR FRANCAIS

Huye: Mugiraneza yikuye mu bukene ahereye ku bworozi bw’amatungo magufi

Yanditswe na Prudence Kwizera
Kuya 19 Nyakanga 2021 saa 11:51
Yasuwe :
0 0

Mugiraneza Jean Baptiste wo mu Karere ka Huye avuga ko yikuye mu bukene ahereye ku matungo magufi yahawe nk’inkunga kuko yari amaze igihe kirekire ari umukene atunzwe no guca inshuro.

Uyu mugabo w’imyaka 37 y’amavuko atuye mu Kagari ka Nyakagezi mu Murenge wa Huye aho abana n’umugore we n’abana bane babyaranye.

Avuga ko yabayeho mu bukene bukabije abarizwa mu cyiciro cya mbere cy’ubudehe ariko mu 2015 ahabwa ihene ebyiri zo korora n’umuryango Vétérinaires Sans Frontières (VSF-Belgique) ku bufatanye n’umuryango w’Abahinzi n’aborozi bo mu Rwanda, Imbaraga.

Izo hene yazitayeho zitangira kumuha ifumbire yo guhingisha ziranabyara zimufasha gutera intambwe ava mu bukene. Kuri ubu afite urugo rwifashije kandi yavuye mu cyiciro cya mbere cy’ubudehe ajya mu cya gatatu kibamo abantu bifashije.

Ati “Basanze ndi umukene wo hasi cyane utunzwe no guca inshuro. Bamaze kumpa ihene abyiri nazitayeho zimpa ifumbire yo guhingisha ndetse zitangira no kubyara nkagurishaho nkikenura.

Kuri ubu izo hene zamubyariye izindi zigera kuri 30 agurishaho agura ingurube yo korora kugira ngo ifumbire yo guhingisha yiyongere abashe kwihaza mu biribwa.

Ugeze mu rugo rwe uhita ubona ko ari umuturage witeje imbere kuko afite inzu yo kubamo yiyubakiye irimo amashanyarazi, yoroye ihene umunani zikomoka kuri za zindi ebyiri yahawe, afite ingurube abyiri kandi yoroye n’inkoko.

Avuga ko ari umugabo wifashije kuko abasha kwita ku muryango we akawubonera iby’ibanze ukeneye kandi yaguze amasambu abiri yo guhinga abikomoye kuri ubwo bworozi bwe.

Umugore we Musabyimana Josephine avuga ko kuri ubu babayeho mu buzima bwiza kuko batagitunzwe no guca inshuro kandi abana be bajya ku ishuri bakiga neza kuko bafite ibikoresho bihagije.

Yishimira ko afite isambu ihagije yo guhinga kandi abona n’ifumbire yo kuyifumbiza.
Ati “Ikinshimisha ni uko tutagitunzwe no guca inshuro nka mbere tukiri abakene. Abana banjye biga neza bikanshimisha kuko mbona ejo hazaza habo ari heza.”

Mukampore Viviane uhagarariye urugaga rw’abahinzi n’aborozi bo mu Rwanda, Imbaraga mu mirenge itandatu yo mu Karere ka Huye, avuga ko mu matsinda arenga 40 akorana na yo abayagize bose bahawe amatungo magufi kandi yabafashije guhindura imibereho yabo.

Mugiraneza Jean Baptiste wo mu Karere ka Huye avuga ko yikuye mu bukene ahereye ku ihene ebyiri yahawe nk’imfashanyo n’Umuryango Vétérinaires Sans Frontières
Ihene ebyiri yahawe zamaze kororoka zibyara izindi zirenga 30
Yamaze kugura ingurube zimufasha kubona ifumbire ihagije

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .