Huye: Contrôle technique Perezida Kagame yemereye abaturage igiye kuzura (Amafoto)

Yanditswe na Prudence Kwizera
Kuya 20 Ukwakira 2020 saa 09:28
Yasuwe :
0 0

Mu Karere ka Huye hagiye kuzura ikigo kizajya kigenzurirwamo ubuziranenge bw’imodoka (Contrôle technique) Perezida Kagame Paul yemereye ako karere ubwo yagasuraga mu 2018.

Imirimo yo kubaka icyo kigo giherereye mu Murenge wa Ngoma igeze hafi ku musozi ku buryo mu gihe gito kizatangira gukorerwamo akazi cyagenewe.

Uhagarariye abakozi bubaka icyo kigo, Sibomana Zacharie, yavuze ko bageze ku kigero cya 98% bacyubaka ku buryo ukwezi k’Ukwakira 2020 kuzarangira imirimo yo kubaka yarasojwe.

Ati “Nk’uko mubibona tugeze nko kuri 98% hasigaye gushyiramo imashini hano, inyubako zo zisa n’izirangiye, harabura intebe zo mu biro n’izo kwicazaho abakiriya bategereje guhabwa serivisi.”

Sibomana yavuze ko icyo kigo gifite ubushobozi bwo kwakira imodoka 100 ku munsi cyangwa izirenzeho kandi imodoka imwe izajya ihamara nk’iminota itarenze 20.

Izakira imodoka zituruka mu turere twose two mu Ntara y’Amajyepfo n’utwo mu Burengerazuba turimo Rusizi, Nyamasheke, Ngororero na Karongi.

Bamwe mu bafite imodoka bo mu Karere ka Huye babwiye IGIHE ko bishimiye Contrôle technique bari kubakirwa kuko mbere bagorwaga no kujya gusuzumisha ibinyabiziga i Kigali.

Iraguha Simon Pierre ati “Mbere byari bigoranye kuko twese twajyaga i Kigali akenshi tukarararyo tudakoresheje cyangwa bakatuzanira izikoreshwa igihe gito ariko byari ibibazo. Turashimira Umukuru w’Igihugu wayiduhaye kuko izadufasha cyane.”

Abafite imodoka bavuga ko nanone bagorwaga no guhabwa gahunda y’igihe kirekire kugira ngo bajye gusuzumisha imodoka i Kigali, rimwe na rimwe bigatuma batizera ubuziranenge bw’imodoka zabo.

Biteganyijwe ko kuri uyu wa Gatatu hazatangira ibikorwa byo gushyiramo imashini zizifashishwa mu gusuzuma ubuziranenge bw’imodoka.

Umuyobozi wungirije ushinzwe Iterambere ry’Ubukungu mu Karere ka Huye, Kamana André, yavuze ko Contrôle technique ari igikorwa remezo gikomeye mu Karere ka Huye bitezeho iterambere rirambye.

Yavuze ko abazajya basumisha imodoka bazasiga amafaranga mu Karere ka Huye kandi bahagure n’ibikoresho bakeneye (pièces de rechange) ndetse hari n’abazaharara cyangwa bakagura amavuta y’imodoka na lisansi.

Ati “Ni igikorwa remezo gikomeye twahawe na Nyakubahwa Perezida wa Repubulika, kije kongera ubukungu bw’akarere no kudufasha kugendera mu binyabiziga bifite ubuziranenge, urumva ko impanuka zo mu muhanda zizagabanyuka.”

Umushinga wo kubaka iyo Contrôle technique uri gushyirwa mu ngiro na Polisi y’Igihugu kuko n’ubusanzwe niyo ibifite mu nshingano.

Biteganyijwe ko kuri uyu wa Gatatu hazatangira ibikorwa byo gushyiramo imashini zizifashishwa mu gusuzuma ubuziranenge bw’imodoka
Imirimo yo kubaka inzu zizashyirwamo imashini igeze ku musozo
Inyubako zizakoreramo abayobozi b'icyo kigo zamaze kuzura
Ku marembo hari kubakwa ubukarabiro ku buryo abazayigana bazajya babanza gusukura intoki nk'uburyo bwo kwirinda ikwirakwira rya Coronavirus
Mu Karere ka Huye hagiye kuzura ikigo gishinzwe kugenzura ubuziranenge bw’imodoka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .