Huye: Abanyeshuri 47 biga mu ishuri ryisumbuye birukanwe burundu icyarimwe

Yanditswe na Prudence Kwizera
Kuya 16 Mutarama 2020 saa 08:51
Yasuwe :
0 0

Abanyeshuri 47 biga mu burezi bw’ibanze bw’imyaka 12 mu Ishuri rya Butare Catholique mu Karere ka Huye birukanwe icyarimwe bazizwa ikinyabupfura gike none babuze ahandi bajya kwiga.

Abo bana biganjemo abiga mu mwaka wa kabiri n’uwa gatanu w’ayisumbuye bahawe inyemezamanota zanditseho ko birukanwe burundu mu kigo ubwo hasozwaga umwaka w’amashuri wa 2019.

Umuyobozi w’iryo shuri, Byiringiro Dan, n’ubwo adasobanura neza ikosa abo bana bakoze, avuga ko Komite ishinzwe ikinyabupfura mu kigo yafashe umwanzuro wo kubirukana burundu kuko bagaragaje imyitwarire mibi.

Ati “Twabirukanye kubera imyitwarire mibi; nonese umwana yagira amanota mabi mu gihembwe cya mbere, mu cya kabiri bikaba uko no mu cya gatatu bagakomeza kwitwara nabi ukabagira ute? Ni Komite ishinzwe imitwarire mu kigo yabafashe icyemezo cyo kubirukana.”

Mu ntangiriro z’umwaka w’amashuri wa 2020, bamwe muri abo banyeshuri birukanwe bagarutse ku ishuri bari kumwe n’ababyeyi babo baje gusaba imbabazi ariko bangirwa gukomeza kwiga.

Hari n’abavuga ko bagerageje kujya gushaka ishuri ku bindi bigo barangirwa kuko bafite indangamanota igaragaragaza ko birukanwe kubera imyitwarire mibi.

Mu buhamya bwabo hari umuhungu wari urangije mu mwaka wa gatanu wavuze ko ikosa yakoze ari uko yageze ku ishuri yakererewe atanatebeje. Mugenzi we w’umukowa we avuga ko ikosa yakoze ari uko yasohotse mu kigo mu masaha atemewe ajya gushaka ibyo kurya hanze kuko abandi bari bagiye kurya kandi we atabyemerewe kuko nta mafaranga y’ifunguro yari yaratanze.

Umwe mu babyeyi ufite umwana wirukanwe yavuze ko byamutunguye kuko yabimenye ari uko umwaka w’amashuri wa 2020 utangiye.

Ati “Byarantunguye kuko umwana yararwaye ntiyajya gufata indangamanota; ejo bundi agiye gutangira ni bwo bamuhaye indangamanota ye asanga baramwirukanye. Nahise noherezayo nyina ajya kumusabira imbabazi ariko bamubwira ko batamubabarira wenyine kuko ngo abo birukanye ari benshi.”

Icyakora uyu mubyeyi avuga ko mu 2019 yigeze gutumizwa ku ishuri ngo ajye gusobanura impamvu umwana we aza kwiga yakererewe. Icyo gihe ngo yasabye imbabazi yemera ko bitazasubira yiyemeza ko azajya amuzindura.

Umuyobozi wungirije ushinzwe Imibereho Myiza y’Abaturage mu Karere ka Huye, Kankesha Annonciata, yavuze ko icyo kibazo ari kugikurikirana kugira ngo abo bana bashakirwe uko basubira mu ishuri.

Yavuze ko ubuyobozi bw’ishuri rya Butare Catholique bwakoze amakosa yo kwirukana abanyeshuri benshi icyarimwe kandi ubw’Akarere butabizi.

Ikindi ngo ni uko niba abo bana baragaragaje imyitwarire mibi mu buryo bukabije mu bihembwe bitandukanye hari hakwiye kubanza guhamagaza ababyeyi babo n’ubuyobozi bw’Akarere bakagirwa inama aho kwihutira kubirukana burundu.

Ati “Ntabwo twashyigikira ibyo umuyobozi w’ishuri yakoze kuko yarakabije, ntabwo wakwirukana abana barenga 40 utaragaragaje ko ari ikibazo mbere y’igihe, na we narabimubwiye ndamubwira ngo witegure ibisobanuro kuko ntabwo wigeze ugaragaza ko ishuri ryakunaniye.”

Yanenze ababyeyi babonye abana babo birukanwe bakabiceceka ntibahite babimenyesha ubuyobozi ngo ikibazo gikurikiranwe.

Ati “Umubyeyi umaze ibirukuko byose guhera mu kwezi kwa cumi na kumwe umwana yarirukanwe ntaze byibura no mu buyobozi ngo atere impuruza umwana tumusubize mu ishuri cyangwa tumushakire irindi.”

Kankesha yavuze ko ibigo by’amashuri byirukana abanyeshuri biri mu bituma umubare w’abana bata amashuri wiyongera.

Yijeje ko bagiye gukora ibishoboka byose abo bana bagashakirwa andi mashuri bakajya kwiga ku buryo nta n’umwe uzata ishuri.

Ati “Numva twafatanya n’ubuyobozi bw’ikigo bariya bana tukabajyana ahandi bakajya ku kindi kigo. Tugiye kubikurikirana kugira ngo basubire mu ishuri bajye kwiga.”

Muri iyi minsi abandi bana batangiye amashuri abo birukanywe bo bakunze kuzindukira ku ishuri no ku Biro by’Akarere ka Huye gusaba imbabazi no kwinginga ubuyobozi ngo bubashakire aho bajya kwiga.

Mu Ukwakira 2019 ubuyobozi bw’Akarere ka Huye bwatangaje ko bufite abana 1 271 bo mu mashuri abanza n’ayisumbuye bataye ishuri bituma umubare w’inzererezi mu Mujyi wa Huye wiyongera, bityo buri guhangana n’icyo kibazo harebwa uko basubizwa kwiga.

Inyubako y'Ibiro by'Akarere ka Huye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .