Hatangiye amahugurwa azafasha urubyiruko rufite imishinga mito kuyibyaza umusaruro

Yanditswe na Ndahayo Emmanuel
Kuya 15 Nzeri 2020 saa 07:37
Yasuwe :
0 0

Ku bufatanye bwa Kaminuza yigenga ya Kigali (ULK), Kempten University of Applied Science yo mu Budage, Minisiteri y’Ubucuruzi n’Inganda (MINICOM) ndetse n’Urugaga rw’ibigo by’imari iciriritse mu Budage, Sparkassenstiftung (SBFIC), ishami ry’u Rwanda; hatangijwe amahugurwa azamara ibyumweru bibiri, akazahugura urubyiruko rufite imishinga cyangwa ibitekerezo bishobora kubyara inyungu, bikazavamo ibigo by’ubucuruzi bikomeye.

Ni amahugurwa yiswe “National Entrepreneurship Summer Camp-2020”, akazaba afite intego yo “gufasha urubyiruko kugira imitekerereze yo kwihangira imirimo ndetse no kubaka ubumenyi bwabo, buzabafasha gukomeza ibikorwa byabo muri ibi bihe bikomeye bya Coronavirus na nyuma yayo”.

Aya mahugurwa azitabirwa n’urubyiruko rugera kuri 20 ruri hagati y’imyaka 18 na 35. Ni urubyiruko rurangije muri Kaminuza ya ULK rusanzwe rufite imishinga ibyara inyungu, ariko ikeneye ubwunganizi burimo ubw’ubumenyi n’amikoro.

Hazaba kandi harimo n’urubyiruko rw’abari kwiga mu mwaka wa nyuma wa kaminuza muri ULK, bafite ibitekerezo byiza bishobora kuzabyara ibigo by’ubucuruzi bikomeye, byatanga akazi ku rundi rubyiruko bikanagirira igihugu akamaro muri rusange.

Aya mahugurwa azibanda ku mishinga yatoranyijwe iri mu byiciro by’ubuhinzi, ingufu ndetse n’ikoranabuhanga, akazaba afite intego eshatu, ari zo: guteza imbere umuco wo kwikorera no guhanga udushya mu rubyiruko, cyane cyane muri ibi bihe bya Coronavirus; kuzamura urwego rw’ubumenyi n’imikorere y’urubyiruko rwikorera, ndetse no guteza imbere ubufatanye bw’amashuri makuru n’inganda binyuze mu mikoranire ndetse n’ibiganiro.

Atangiza ku mugaragaro aya mahugurwa, Umuyobozi Mukuru ushinzwe Igenamigambi n’Igenzura muri Minisiteri y’Ubucuruzi n’inganda, MINICOM, Jonas Munyurangabo, yavuze ko iyi gahunda ije yuzuza umugambi wa leta wo kurushaho gushishikariza urubyiruko kwitinyuka bagahanga imirimo, aho gukomeza gutegereza akazi kandi bafite ubushobozi bwo kukihangira.

Yabwiye IGIHE ati “Ibyo turimo ni ugufasha urubyiruko kugira imitekerereze iganisha aho umuntu wese ukora ubucuruzi aba aganisha. Ibya byabafasha kwagura imitekerereze no gukoresha amahirwe ari aho bari, n’ubwo abandi baba babibonamo ibibazo. Harimo kandi kubaka ubushobozi bwabafasha kubyaza umusaruro amahirwe babonye muri rusange”.

Aya mahugurwa abaye mu bihe ubukungu bw’isi buhanganye n’ingaruka z’icyorezo cya Coronavirus, cyibasiye cyane imishinga mito n’iciriritse ikunze gukorwa n’urubyiruko.

Ibi bikubitiraho ko ubumenyi bw’uru rubyiruko busanzwe buri hasi, ahanini bitewe n’uburyo bw’imyigishirize budateza imbere imitekerereze yagutse, ahubwo bushyigikira imyigishirize ishingiye ku busobanuro bwa mwarimu.

Munyurangabo yavuze ko mu rwego rwo guhangana n’izi ngorane, Leta y’u Rwanda iherutse gutangiza gahunda yo guteza imbere umuco wo kwihangira umurimo mu Rwanda (EDP), aho amahugurwa nk’aya aje ayunganira kuko atinyura urubyiruko ku bijyanye no kwihangira imirimo binyuze mu kubaha ubumenyi bakeneye.

Yagize ati “Ni igikorwa kimwe mu bifasha mu gushyira mu bikorwa iyo politike nshyashya, tugendeye ahanini ku buryo izafasha abantu kugira imyumvire yo kwihangira umurimo”.

Yongeyeho ko “gushaka akazi atari bibi, ariko habaye impinduka abantu benshi bakajya bagahanga, aho kugashaka byarushaho kuba byiza [ku bukungu bw’igihugu]. Ibyo rero bituruka mu bitekerezo, ndetse no mu bushobozi n’inyungazi urubyiruko ruhabwa n’inzego zibishinzwe. Uyu munsi rero ni byo tugira ngo tubafashe, bamenye ko bafite ubushobozi bwo kwikorera, noneho bakore batere imbere, bashingiye ku bumenyi bazahabwa”.

Munyurangabo yavuze ko by’umwihariko, kuba ibi bikorwa bibayeho muri ibi bihe bikomeye bya Coronavirus, hari kinini bizafasha uru rubyiruko.

Aya mahugurwa azakorwa mu buryo busanzwe aho umwarimu yigisha abanyeshuri bari kumwe, ariko hakazanakoreshwa ikoranabuhanga mu gihe abarimu b’inzobere baturutse muri Kempten University of Applied Science bazaba bari gutanga umusanzu wabo muri aya masomo.

Umwe mu bayobozi ba Kempten University of Applied Science, Prof. Dr. Tobias Peylo, yavuze ko aya mahugurwa atazatanga ubumenyi gusa, kuko ashobora no gufasha abazayitabira kumenyana, bakaba banakorana mu bihe biri imbere.

Yongeyeho ko aya mahugurwa “azafasha urubyiruko guhanga udushya mu mikorere yabo, bityo bongera umusaruro w’ibyo bakora”.

Yavuze kandi ko ibi bitekerezo by’urubyiruko bizafasha Isi guhangana n’ibibazo ifite, ati “Ibi si ibitekerezo byo kubyara amafaranga gusa, ni ibitekerezo bizarushaho kugira Isi ahantu heza kuko bizazana impinduka mu mibereho y’abayituye binyuze mu gucyemura ibibazo Isi ifite uyu munsi”.

Umuyobozi wa Kaminuza yigenga ya Kigali, ULK, Becky Balinda, yavuze ko bazifashisha ba rwiyemezamirimo bamaze kugira icyo bigezaho bakabwira aba banyeshuri inzira banyuzemo n’icyo bakora kugira ibitekerezo byabo bizabyare inyungu.

Ati “icya ngombwa cyane, tuzazana abandi ba rwiyemezamirimo batangiye nka bo, bababwire urugendo rwabo kuva ku gitekerezo kugeza aho bageze ubu.

Bazabasangiza uko babonye amafaranga, ababafashije n’ibindi nk’ibyo. Impamvu tuzabikora ni uko abo ba rwiyemezamirimo bateye imbere na bo batangiriye ku rwego rwo hasi, rero bazabasangiza inzira banyuzemo kugira ngo batere imbere”.

Yongeyeho ko bazakurikirana iterambere ry’imishinga y’aba ba rwiyemezamirimo, ibiri myiza ikazaterwa inkunga y’amafaranga kandi igakurikiranwa mu gihe cy’amezi atandatu nyuma yaho.

Maria Knappstein, Umuyobozi wa SBFIC ishami ry’u Rwanda, yavuze ko ba rwiyemezamirimo babonye aya mahirwe badakwiye kuyapfusha ubusa, kuko ari intangiriro y’urugendo rwabo rwo kwikorera.

Yagize ati “twiteze ko aba ba rwiyemezamirimo bazaba bafite ubushake bwo kwiga no kumenya byinshi. Turashaka ko bagira imitekereze yo kuba ba rwiyemezamirimo, kandi bafite ubushake bwo kubishyira mu bikorwa”.

Yongeyeho ko amasomo azatangwa azashingira ku ngamba zisanzweho zo kwirinda Coronavirus, kuko yabanje gusesengurwa bikagaragara ko nta kibazo azatera.

Akanyamuneza ku bazahugurwa

Kevin Mukarage, Umuyobozi Mukuru w’Ikigo East African Apparel Ltd, warangije muri ULK akaba n’umwe mu bazahugurwa, yavuze ko aya mahugurwa azamufasha kwiyungura ubumenyi, bityo akabasha gushyira mu bikorwa umushinga wo gukora ubudozi bw’imyambaro, ikintu abona gikenewe mu Karere ka Afurika y’i Burasirazuba.

Yagize ati “Icyo aya mahugurwa azadufasha ni ukwitegura tukaba ba rwiyemezamirimo bigenga, kuko abenshi muri twe biratugora gutangira, nizera ko aya mahugurwa azadufasha kuba ba rwiyemezamirimo bashobora kwikemurira ibibazo no kwiyoborera imishinga yacu”.

“Ibi bizatuma tuzamura urwego rwacu, tunoze ibyo dukora kandi turusheho guhanga imirimo mu gihugu”.

Yavuze ko kwitabira amahugurwa nk’aya bibaha ubushobozi bwo kumenya uburyo bwiza bakoresha bashaka igishoro, ku buryo barinda ubucuruzi bwabo ingorane zo gukorana n’ibigo by’imari mu gihe bagitangira.

Mukarage avuga ko byibura mu myaka ibiri iri imbere, ikigo cye kizaba kimaze gushinga imizi mu Karere ka Afurika y’i Burasirazuba.

Sandrine Mahoro, umukobwa w’imyaka 23 ufite igitekerezo cyo kuzorora inkoko mu buryo bugezweho, yashimye abateguye aya amahugurwa, avuga ko nk’abakiri bato bibagora kubona ubumenyi bw’ibanze bwabafasha guteza imbere ibikorwa byabo.

Yavuze ko bazagira byinshi muri aya mahugurwa, birimo “uburyo bwo kuba wajya nko mu kigo cy’imari ukerekana umushinga wawe bakaguha igishoro, rero aya mahugurwa azadufasha kurusheho kwiteza imbere”.

Yaboneyeho gusaba abandi bakobwa kwitinyuka bakitabira guhanga imirimo kuko Isi yahindutse, kandi igihugu kikaba cyarateje imbere umuco w’uburinganire n’ubwuzuzanye bityo ko ibyo umuhungu yakora n’umukobwa yabishobora.

Amwe mu masomo azigirwa muri aya mahugurwa harimo gutegura no gusesengura ibitekerezo by’imishinga ishobora kubyara inyungu, gukora ingendoshuri ku bigo byiteje imbere, kurema ibitekerezo bishobora kubyara inyungu n’ibindi bitandukanye.

Amahugurwa ya ‘National Entrepreneurship Summer Camp 2020 abaye ku nshuro ya mbere, ariko akazakomeza no mu myaka iri imbere, mu rwego rwo gufasha urubyiruko rufite imishinga y’iterambere kuyibyaza umusaruro.

Icyorezo cya Coronavirus cyahinduye ingengabihe y’aya mahugurwa, kuko yagombaga kuba muri Nyakanga, akitabirwa n’abanyeshuri 10 baturutse muri ULK naho abandi 10 bakaba bari buzave muri Kempten University of Applied Science yo gihugu cy’u Budage. Mu gihe icyorezo cya Coronavirus cyacogora, hari gahunda yo kuzakomereza kuri iyo ngengabihe.

JPEG - 198.2 kb
Umuyobozi Mukuru ushinzwe Igenamigambi n’Igenzura muri Minisiteri y’Ubucuruzi n’inganda, MINICOM, Jonas Munyurangabo, yavuze ko aya mahugurwa azatinyura urubyiruko rukihangira imirimo
JPEG - 195.3 kb
Maria Knappstein, Umuyobozi wa SBFIC ishami ry’u Rwanda, yavuze ko ba rwiyemezamirimo babonye aya mahirwe badakwiye kuyapfusha ubusa
JPEG - 200.7 kb
Umuyobozi wa Kaminuza yigenga ya Kigali, ULK, Becky Balinda, yavuze ko aya mahugurwa azakomeza no mu myaka iri imbere
JPEG - 260.8 kb
Abayobozi bayafunguye bafashe ifoto y’urwibutso
JPEG - 362.7 kb
Ba rwiyemezamirimo bakiri bato batangiye amahugurwa bigira mu matsinda ya babiri babiri, bagenda basimburana
JPEG - 296.7 kb
Ba rwiyemezamirimo bakiri bato batangiye basangira ibitekerezo
JPEG - 242.6 kb
Kevin Mukarage, Umuyobozi Mukuru w’Ikigo East African Apparel Ltd, yavuze ko aya mahugurwa azamufasha kwihugura mu bumenyi
JPEG - 351.6 kb
Aya mahugurwa azajya aba hubahirizwa ingamba zo kwirinda icyorezo cya Coronavirus
JPEG - 337 kb
Abanyeshuri bagize umwanya wo gusangira ibitekerezo
JPEG - 258.7 kb
Abahugurwa bose bagize umwanya wo kuganira

Amafoto: Darcy Igirubuntu


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .