Hatangijwe gahunda yo kuguriza abashaka firigo zitangiza ikirere bakishyura bakatwa ku mafaranga bagura umuriro

Yanditswe na Bukuru JC
Kuya 21 Ukwakira 2020 saa 02:32
Yasuwe :
0 0

Ikigo cy’Igihugu gishinzwe kubungabunga ibidukikije, REMA, ku bufatanye na Banki y’Abaturage n’Ishami ry’Ikigo cy’Igihugu gishinzwe ingufu rifite mu nshingano gucuruza umuriro, EUCL, cyatangije uburyo bushya aho abazajya bafata inguzanyo yo kugura firigo n’ibyuma bikonjesha bikoresha ingufu neza kandi ntibyangize ikirere bashobora kuzishyura binyuze mu nyemezabwishyu y’umuriro bakoresha buri kwezi.

Mu rwego rwo kubahiriza amasezerano ya Montreal, yavugururiwe mu 2016 i Kigali avuga ku igabanywa ry’imyuka yoherezwa mu kirere, REMA yatangije gahunda igamije kunganira ubushobozi bw’abantu kugira ngo babashe kugura firigo n’ibyuma bikonjesha bitangiza ikirere. Ni gahunda yiswe Rwanda Cooling Finance Initiative.

Muri iyi gahunda abantu babyifuza bazajya bafata firigo n’ibyuma bikonjesha bihitiyemo mu buryo bw’inguzanyo, bazishyure binyuze ku muriro bagura mu gihe runaka, aho bazajya bakatwa ijanisha ryumvikanyweho ubundi bahabwe uw’amafaranga asigaye.

Ubu buryo bwo kwishyura bwamaze kumvikanwaho na REMA, BPR Plc, abacuruza ibi bikoresho na REG.

Umuyobozi Mukuru wa REMA, Juliet Kabera, yashimye BPR, nk’umufatanyabikorwa w’iyi gahunda kubera uruhare iri kugira mu migendekere myiza yayo.

Kabera yavuze ko kandi ibikorwa nk’ibi by’inzego z’abikorera bizana inyungu kuri buri ruhande ari ingenzi mu iterambere ry’ubukungu rirambye.

Umuyobozi wa REG, Ron Weiss, yavuze ko uku gufasha abaturage kubona ibyuma bikoresha neza ingufu kandi ntibyangize ikirere bizafasha igihugu mu kugabanya amafaranga cyashoraga mu bikorwa byo gushyiraho andi masoko y’ingufu.

Ati “REG ishyigikiye iyi gahunda iteza imbere ikoreshwa neza ry’ingufu n’ukudasesagura mu gihe kirekire yaba ku muntu ku giti cye n’igihugu. Igiteranyo cy’ibyo umuntu azabika kizagabanya ibishorwa mu gushaka izindi ngufu kandi bitume dukoresha neza ubushobozi twari dusanganywe.”

Muri iyi gahunda biteganyijwe ko kugera mu 2024 hazatangwa inguzanyo ingana na miliyoni 4$ izifashishwa mu kugura ibi bikoresho bidasesagura ingufu kandi ntibyangize ikirere bibarirwa mu 12500.

Ibarura ryakozwe na REMA, ryerekana ko mu Rwanda hari ibikoresho birenga 200 000 nka firigo n’ibyuma birinda ubushyuhe bisohora imyuka yangiza ikirere.

Umukozi Ushinzwe ishyirwa mu bikorwa ry’Amasezerano ya Montreal, Uwera Martine, aherutse gutangaza ko u Rwanda rwagabanyije kwinjiza ibyuma byangiza ikirere biva kuri toni 4,1 mu 2010 aho ubu bigeze kuri toni 1,89.

Ati “Twagabanyije imyuka yangiza ikirere ku kigero cya 54 ku ijana ariko haracyari icyuho cya toni 1.89 dushaka gukuraho bitarenze mu 2030".”

Kugeza ubu, u Rwanda rwagabanyije imyuka ihumanya ikirere igira uruhare mu kwangiza akayungirizo k’izuba [ozone] ku kigero cya 54%.

Umuyobozi wa REMA, Juliet Kabera, yashimye abiyemeje gutanga umusanzu muri iyi gahunda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .