Hari abacuruzi bakigowe no kubona ibisimbura ibikoresho bya pulasitiki n’amashashi byaciwe

Yanditswe na Uwimana Abraham
Kuya 19 Ukwakira 2020 saa 10:54
Yasuwe :
0 0

Bamwe mu bacuruzi bavuga ko bakigowe no kubona ibikoresho bifashisha mu mwanya w’amashashi amaze imyaka myinshi aciwe n’ibikoresho bya pulasitiki bikoreshwa rimwe nabyo hemejwe umushinga w’itegeko rikumira ikoreshwa ryabyo cyangwa byanaboneka igiciro kikaba kiri hejuru.

Ubuke bw’ibyo bikoresho ngo ntibubangamiye imigendekere myiza y’ubucuruzi gusa ahubwo ngo binatuma haba ubucuruzi bw’ibirimo amashashi rwihishwa, ibintu bibangamiye gahunda yo kurengera ibidukikije.

Abacuruzi bavuga ko bari guhura n’imbogamizi zo kutabona ibipfunyikwamo bihagije ku isoko, kuko ngo kuri ubu ibiboneka gusa ari amahitamo make arimo “envelope”, ubukarito n’imifuka.

Ikindi kigoye kurushaho ngo ni ukuzabona ibizifashishwa mu mwanya w’amacupa n’ibindi bikozwe muri pulasitiki bikoreshwa inshuro imwe, bitewe n’uko nta bibisimbura byinshi bikorerwa mu Rwanda.

Umuyobozi Nshingwabikorwa wa Entreprise Urwibutso, Kalisa Thierry, yabwiye Rwanda Today ko bakigowe no kubona ibyo bazasimbuza amacupa akoze muri pulasitiki bapfunyikamo ibinyobwa byabo.

Ati “Ku bintu bimwe na bimwe nk’amacupa y’amazi, nta cyabisimbura dufite hano mu gihugu, gusa tuzi ko mu bindi bihugu ho bihari, ibyo rero byadusaba igiciro gihanitse cyo kubitumiza mu mahanga bigadusaba no guhindura uburyo twakoresha dufunga, ibintu tutabasha gukora kuri ubu.”

Yakomeje avuga ko hari ibyo bagerageje gushakira ibisubizo nk’ikinyobwa cyabo kitwa “Akarusho” babashije guhindura ibyo gipfunyikwamo, kuri ubu kikaba gifungwa mu mukebe.

Sosiyete z’imbere mu gihugu ziracyagowe cyane no kubona ibisimbura ibikozwe muri pulasitiki bipfunyikwamo, nk’amacupa y’amazi, ibikombe bya za “yogurt” n’ibindi.

Sosiyete nyinshi zagiye zishishikarizwa gushaka ibisubizo byasimbura ibikozwe muri pulasitiki, ariko ubushobozi bwayo buracyari buke ku gushaka ibyasimbura ibikozwe muri pulasitiki bifungwamo.

Imbogamizi zigaragazwa birimo gukenera iby’ibanze nkenerwa bisaba gutumizwa mu mahanga no kuba igiciro cyo kubitunganya kiri hejuru ku buryo bigorana kubyigondera.

Ngo haniyongeraho ko bagihanganye ku isoko n’abagicuruza rwihishwa ibikoresho byaciwe cyane cyane amashashi, bakabicuruza ku giciro gito bituma ibyo bakora rimwe na rimwe bitagurishwa.

Nyir’uruganda rwa Bonus Industries Ltd rutunganya ibikoresho byo gupfunyikamo bagurisha mu maguriro manini, amafarumasi, ku bakora imigati n’ahandi, Ngarambe Brian, yavuze ko bakibangamiwe n’icurizwa ry’amashashi mu buryo butemewe.

Yagize ati “Turi sosiyete enye hano muri Kigali, gusa ntituri kugurisha, twarushijwe imbaraga n’ubucuruzi bwa forode bw’ibikoresho bya pulasitiki.”

Umuyobozi Mukuru w’Ikigo Gishinzwe Kurengera Ibidukikije (REMA), Juliet Kabera, yemeye ko igihugu kigifite icyuho mu kubona ibisimbura amashashi.

Gusa ngo hari gahunda yigeze gushyirwaho y’imyaka ibiri y’uko sosiyete zimwe na zimwe zizajya zisaba uburenganzira budasanzwe bwo kwemererwa kwinjiza no gukoresha ibikoresho bya pulasitiki, bitewe n’uko hari hataraboneka igisubizo kirambye, gusa ibyo ngo byagiriye umumaro sosiyete nini gusa.

Kubona ibipfunyikwamo bisimbura amashashi n'ibikoresho bya pulasitiki ngo biracyari ingorabahizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .