Hagiye kwifashishwa imashini mu gushaka indi mibiri ku Kibuga cy’Indege cya Gisenyi

Yanditswe na Mukwaya Olivier
Kuya 7 Mutarama 2020 saa 09:44
Yasuwe :
0 0

Ubuyobozi bw’Akarere ka Rubavu bwatangaje ko bugiye kwiyambaza imashini mu gushaka indi mibiri nyuma y’iyabonetse mu myobo itandukanye yo ku Kibuga cy’Indege cya Gisenyi bikekwa ko ari iy’inzirakarengane za Jenoside yakorewe Abatutsi mu 1994.

Iyi mibiri yabonetse ku wa 4 Mutarama 2020 mu masaha ya saa tanu ubwo abakozi barimo gukora imirimo yo kwagura ikibuga.

Kuri uyu wa Kabiri nibwo hatangiye ibikorwa byo gushaka iyo mibiri ndetse habonetse 28 mu myobo ibiri itandukanye.

Ubuyobozi bw’Akarere ka Rubavu bwasabye abaturage ko batanga amakuru kugira ngo imibiri yose iboneke hamenyekane n’uko bishwe.

Abarokotse Jenoside yakorewe Abatutsi bavuga ko hashobora kuba hakiri n’abubatse inzu hejuru y’imibiri, bataratanga amakuru.

Segacaca Hassan warokokeye Jenoside yakorewe Abatutsi mu yahoze ari Gisenyi yavuze ko hakiri inzu zubakiye ku mibiri y’abazize Jenoside yakorewe abatutsi.

Ati “Mu by’ukuri abantu bacu uko bagendaga bicwa bajugunywaga mu byobo, twabonye ko aba bantu bishoboka ko ari abacu kuko imibiri myinshi twabonye ni iy’abagore kandi bari bafite n’abana bato. Si hano gusa bishoboka ko hari n’aho bagiye babubakiraho inzu nko mu mujyi. Twagiye duhura n’ikibazo cyo gusenya izo nzu kuko batubwiye ko tuzisenye twazishyura. Turasaba ubuyobozi ko bwadufasha inzu zigasenywa imibiri ikaboneka.’’

Umuyobozi w’Akarere ka Rubavu wungirije ushinzwe Imibereho myiza y’Abaturage, Ishimwe Pacifique, yavuze ko igikorwa cyo gushaka imibiri kizakomeza hifashishijwe imashini (Caterpillar).

Ati “Ubu tumaze kubona imibiri 28 harimo 24 bigaragara ko ari iy’abantu bakuru n’ine y’abana bato nkuko bigaragara n’uko ari iyo muri Jenoside yakorewe Abatutsi mu 1994.’’

“Igikorwa kirakomeje ariko tugiye kwifashisha imashini guhera ejo [ku wa Gatatu] kuko bigaragara ko muri iki kibuga cy’indege harimo ibyobo bitandukanye kandi byagoranye cyane kubera amabuye.’’

Mu bikorwa byo Kwibuka Jenoside yakorewe Abatutsi mu Karere ka Rubavu mu myaka ishize hagiye hasabwa gutangwa amakuru y’ahajugunywe imibiri y’Abatutsi bishwe muri kiriya gihe. Bivugwa ko hari abantu baburiwe irengero, hakaba n’abishwe bajugunywa mu irimbi riri ahashyizwe Komini Rouge cyangwa igashyirwa ahandi ariko amakuru ntatangwe.

Kuri uyu wa Kabiri, bamwe mu baturage basabwe gutanga amakuru ariko bamwe bavugaga ko batibuka neza uko byagenze.

Mu Mujyi wa Gisenyi mu gihe abaturage baba bacukura imiferege bagiye basanga imibiri y’Abatutsi bishwe muri Jenoside mu 1994. Mu 2015 imbere y’Ibitaro bya Gisenyi hagaragaye imibiri y’Abatutsi barimo abarwaza n’abari baharwariye bakaza kwicwa bazizwa uko bavutse.

Abayobozi bo mu nzego z'ibanze, igisirikare na polisi bageze ahari gushakirwa imibiri bareba uko byifashe
Umuyobozi w’Akarere ka Rubavu wungirije ushinzwe Imibereho myiza y’Abaturage, Ishimwe Pacifique, yavuze ko igikorwa cyo gushaka imibiri kizakomeza hifashishijwe imashini
Guverineri w'Intara y'Iburengerazuba, Munyantwari Alphonse, areba imwe mu mibiri 28 yabonetse kuri uyu wa Kabiri
Bwije hagishakishwa imibiri yaba yarajugunywe mu myobo iri ku Kibuga cy'Indege cya Gisenyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza