00:00:00 IGIHE NETWORK KN KINYARWANDA EN ENGLISH FR FRANCAIS

Hagaragajwe inyungu zo kumenyekanisha mu baturage amategeko ku buzima bw’imyororokere

Yanditswe na Rosine Ingabire
Kuya 12 August 2022 saa 10:58
Yasuwe :

Save Generations Organization, Umuryango Nyarwanda utari uwa Leta uharanira Iterambere ry’umwana Urubyiruko n’umugore wagaragaje ko hakenewe ubukangurambaga buhamye bwo kumenyekanisha amategeko ku buzima bw’imyororokere, kuko kutayamenya bishyira ubuzima bwa bamwe mu kaga.

U Rwanda ni igihugu kimaze kumenyekana mu ruhando mpuzamahanga mu kuza ku isonga mu guteza imbere uburinganire no kuzamura uburenganzira bw’umugore, kikaba kimwe mu bihugu byasinye amasezerano mpuzamahanga yo kurwanya ihezwa n’ihohoterwa rikorerwa umugore.

Mu rwego rwo kugera ku ntego z’iterambere rirambye, hatezwa imbere uburinganire n’uburenganzira bw’umugore, hashyizweho gahunda mu rwego rw’ubuzima yerekeranye no kuboneza urubyaro n’ubuzima bw’imyororokere bw’abangavu n’ingimbi (National family planning and adolescent sexual and reproductive strategic plan (2018-2024), ivuga ko buri muturarwanda ugejeje igihe cy’uburumbuke, afite amahitamo kuri serivisi z’ubuzima bw’imyororokere.

Mu rwego rwo kubahiriza uburenganzira bwa muntu ku buzima bw’imyororokere kandi hashyizweho itegeko ry’ubuzima bw’imyororokere rya muntu rya 2016.

Nubwo bimeze gutyo, rimwe na rimwe ubumenyi buke kuri izo gahunda n’amategeko ashyirwaho cyane birebana n’ubuzima bw’imyororokere, bishobora kuba imbogamizi mu kubahiriza ubwo burenganzira bwo guhabwa amakuru na serivisi by’ubuzima bw’imyororokere by’umwihariko ku bangavu n’ingimbi.

Mu rwego rwo gushyira mu bikorwa umushinga wo kongerera ubumenyi abangavu n’ingimbi binyuze mu kubaha amakuru yizewe ku buzima bw’imyororokere, bibafasha gufata ibyemezo bikwiye ku buzima bwabo; Save Generations Organization, ibitewemo inkunga na Kvinna Till Kvinna, bateguye amahugurwa ku mategeko na gahunda z’ubuzima bw’imyororokere mu Rwanda.

Bimaze iminsi bikorwa mu byiciro birimo abarezi 40, ababyeyi 80, ndetse n’abafashamyumvire 20 mu Turere twa Gasabo na Kamonyi.

Ayo mahugurwa yari agamije kongera ubumenyi bw’abafashamyumvire, abarezi ndetse n’ababyeyi, gusobanukirwa amategeko na gahunda z’ubuzima bw’imyororokere mu Rwanda no gusobanukirwa uburenganzira bw’abangavu n’ingimbi ku buzima bw’imyororokere.

Umuyobozi wungirije mu Rwunge rw’Amashuri rwa Kabuga Catholique mu karere ka Gasabo, yavuze ko yungutse byinshi muri aya mahugurwa, birimo nko kumenya uburenganzira bw’abangavu n’ingimbi ku buzima bw’imyororokere, itegeko ribemerera kubona no guhabwa amakuru ku buzima bw’imyororokere.

Ati “Nk’umurezi ngiye kurushaho gutega abana amatwi mbasobanurira neza uburenganzira bafite n’icyo amategeko abivugaho cyane cyane ku bijyanye n’ubuzima bw’imyororokere, ikindi kandi nkaba naboneraho umwanya ngasaba Save Generations Organization ko yageza izi nyigisho twahawe hose mu miryango, mu midugudu dutuye kuko akenshi usanga ari naho ahanini habera ibyaha by’ihohoterwa, ugasanga niba icyaha kibaye bagiceceka ngo bakimenyekanisha.”

Yakomeje agira ati “Nyamara byagakwiye kumenyekana kugira ngo uburenganzira bw’uwahohotewe bwubahirizwe, rero bamenye icyo amategeko abivugaho nabo barushaho gufata iya mbere mu iyubahirizwa ry’uburenganzira kuri buri wese.”

Umurezi muri G.S Ndera mu Karere ka Gasabo, avuga ko amahugurwa yamugiriye akamaro kuko yungukiyemo byinshi cyane cyane ku burenganzira bw’abangavu n’ingimbi ku buzima bw’imyororokere n’icyo amategeko abuvugaho yaba we ndetse n’abo arera ku kigo akoraho.

Ati “Hari byinshi twari tuzi ku buzima bw’imyororokere n’uburenganzira bwacu ariko ntitwari tuzi amategeko agendana nabwo, muri aya mahugurwa hari amategeko twagiye dusobanukirwa tutari tuzi cyane cyane agendanye n’ubuzima bw’imyororokere ndetse no kurengera umwana.”

“Ntitwari tuzi icyo amategeko avuga ku gukuramo inda, n’uwemerewe gukuramo inda uwo ari we ndetse n’igihe n’impamvu yabyemererwa. Mbona ku bwanjye ubu bumenyi buba bukenewe. Twanasaba ko amwe mu mategeko y’ingenzi harimo n’ayo kurwanya ihohoterwa yashyirwa mu mfashanyigisho ku buzima bw’imyororokere.”

Umwe mu babyeyi bahuguwe, mu Karere ka Kamonyi, yagize ati “Gusobanukirwa amategeko icyo agena ku bijyanye n’uburenganzira ku buzima bw’imyororokere, nasobanukiwe ko itegeko ryemerera umwana kuganirizwa no kwigishwa ubuzima bw’imyororokere, nubwo ababyeyi tubitinya kubera umuco, ariko uburenganzira bwabo baba babubujijwe. Nasobanukiwe ko gukuramo inda ari icyaha ariko igihe umuntu yahohotewe, yemerewe gufashwa kuyikuramo bitewe n’amahitamo yagize”.

Izere Mugeni Vedastine uri mu batanze amahugurwa, yavuze ko aya mahugurwa yavugaga ku bijyanye n’amategeko ndetse n’uburenganzira ku buzima bw’imyororokere, amategeko mpuzamahanga cyangwa se amasezerano mpuzamahanga u Rwanda ruba rwarashyizeho umukono.

Yavuze ko hitezwe umusaruro muri aba bahuguwe ko bazageza inyigisho bahawe kuri bagenzi babo, ndetse urubyiruko n’abandi bose muri rusange bazarushaho kuryoherwa n’icyo amategeko avuga ku buzima bw’imyororokere na serivise bijyana, no guharanira uburenganzira bemererwa n’amategeko.

Yakomeje avuga ko umuntu wese afite uburenganzira ku buzima bwe bw’imyororokere ndetse afite n’uburenganzira bwo kumenya amategeko ajyenga ubuzima bwe bw’imyororokere.

Save Generations Organization yateguye aya mahugurwa ivuga ko intego nyamukuru ari ukongera ubumenyi bw’abafashamyumvire, abarezi ndetse n’ababyeyi, gusobanukirwa amategeko na gahunda z’ubuzima bw’imyororokere mu Rwanda no gusobanukirwa uburenganzira bw’abangavu n’ingimbi ku buzima bw’imyororokere, aho abangavu n’ingimbi bazitirwaga no kutamenya ko bafite uburenganzira ku buzima bwabo bw’imyororokere ndetse no kutamenya icyo amategeko abivugaho.

Urugero n’aho abenshi bari bafite amakuru atari yo abandi badafite na make kucyo amategeko avuga ku bijyanye no gukuramo inda mu Rwanda, ibyemewe n’ibitemewe. Hari hanagamijwe kurwanya imyumvire itariyo ku Iteka rya Minisitiri rigena ibigomba kubahirizwa kugira ngo muganga akuriremo umuntu inda.

Hari nk’ingingo ya gatatu ivuga ku mpamvu eshanu zemewe mu Rwanda zo gukuramo inda ari zo kuba umuntu utwite ari umwana, kuba umuntu usaba gukurirwamo inda yarakoreshejwe imibonano mpuzabitsina ku gahato; kuba usaba gukurirwamo inda yarayitwaye nyuma yo kubanishwa ku gahato n’undi nk’umugore n’umugabo; kuba usaba gukurirwamo inda yarayitewe n’uwo bafitanye isano ya hafi kugera ku gisanira cya kabiri no Kuba inda ibangamiye ubuzima bw’utwite cyangwa ubw’umwana atwite.

Abarimu barimo abo muri Gasabo bahuguwe ku mategeko yerekeye ubuzima bw'imyororokere
Hagaragajwe ko ubukangurambaga bukwiriye kugera kuri benshi kugira ngo bamenye amategeko ajyanye n'ubuzima bw'imyororokere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .