00:00:00 IGIHE NETWORK KN KINYARWANDA EN ENGLISH FR FRANCAIS

Hafi 70% y’imyanda itwarwa mu kimoteri i Nduba ni ibiryo: Intabaza ku biribwa bipfa ubusa muri Kigali

Yanditswe na Cyprien Niyomwungeri
Kuya 3 June 2022 saa 08:03
Yasuwe :

Ikibazo cy’ibiribwa byangirika bitaragera mu gifu giteye inkeke ku Isi yose. Mu Rwanda 40% by’ibiribwa bihaboneka bipfa ubusa, ni ukuvuga ibyera ku butaka bungana na 21% by’ubutaka bwose buhingwaho mu gihugu.

Ibiribwa byangirika ni icyo ari cyo cyose cyitwa ikiribwa kitageze ku isahani ngo kiribwe kigere mu gifu. Ni ukuvuga ibiribwa byangirika mu rugendo rwo kuva mu isarura kugera ku isahani ariko kitaragera mu gifu.

Ubushakashatsi bwakozwe n’Umuryango mpuzamahanga wita ku biribwa (FAO) n’ikigo cy’igihugu gishinzwe guteza imbere ubuhinzi n’ubworozi (RAB) bwagaragaje ko Umujyi wa Kigali ujyana ibishingwe bingana na toni 500 ku munsi, muri zo nibura hafi 70% ni ibituruka ku biribwa.

Ubushakashatsi bwerekana kandi ko buri rugo mu Mujyi wa Kigali rupfusha ubusa ibiribwa bingana n’ibilo 164 buri mwaka, mu gihe toni 2,075,405 z’ibiribwa zangirikira mu ngo zose buri mwaka. Ni mu gihe 19% mu gihugu badafite ibyo kurya bihagije.

Ibi biribwa byangirika, mu rwego rw’ibidukikije bifite ingaruka nyinshi kuko bitanga nibura 8% by’imyuka ihumanya ikirere. Ku musaruro mbumbe (GDP) ibi biribwa bingana na 12% by’umusaruro wose w’ubuhinzi. Ibi bigaragaza ko iki ari ikibazo gikomeye kandi giteye inkeke ku buryo buri wese akwiye kugihagurukira.

Umukozi wa RAB, Niyoyita Shaffy, asobanura ko impamvu basanze zitera iyangirika z’ibiribwa ari nyinshi. Hari ibiribwa byangirika bitewe na kamere yabyo nk’imboga, imbuto, iyo ubisaruye ntubishyire ahakwiye birangirika.

Hari ibyangirika kubera imyumvire y’abantu. Abakora ku kimoteri cya Nduba mu Karere ka Gasabo bagaragaje ko ibiribwa byinshi ari ibyo bakura mu ngo z’abantu. Hari ibisigara ku masahani bikamenwa, ibyo abantu bahaha badashoboye kubirya nk’aho abantu bahaha nk’igitoki kikarinda kiba umuneke bakajugunya, ibirayi n’ibijumba bibora.

Umujyi wa Kigali washyizeho itsinda ryo kuwufasha kugabanya imyanda ikomoka ku biribwa no kureba uburyo iyo myanda niba iramutse ibonetse yabyazwa umusaruro.

Iri tsinda rimaze iminsi mu guhugura ibyiciro bitandukanye birimo abanyamahoteli, restaurant, abacuruza ibiribwa mu masoko, amashuri agaburira abanyeshuri ku ishuri ku buryo hagabanywa ibiribwa byangirika.

Niyongira Janviere ucuruza imbuto mu isoko rya Gahoromani mu Karere ka Gasabo, ni umwe mu bahuguwe, avuga ko kwangirika kw’ibiribwa abibona kenshi kandi bibahombye bikomeye.

Ati "Byangirika ahanini bitewe n’uko nta bakiriya twabonye kandi dufite ibiciruzwa byinshi. No kubimena birashoboka. Iyo byangiritse ucuruza ku giciro gito munsi y’uko waranguye".

Umuyobozi wungirije w’Umujyi wa Kigali ushinzwe Imiturire n’Ibikorwa Remezo, Dr Merard Mpabwanamaguru, agira inama abacuruza ibiribwa ku masoko atandukanye yo mu mujyi yo gucunga neza umusaruro ukomoka ku buhinzi cyangwa se ibiryo bacuruza kugira ngo babicuruze birinda ko byangirika cyangwa ko bihinduka umwanda bikaba byanabahombera.

Yagize ati "Turagira ngo habeho gucunga neza ibiribwa aho kugira ngo bihinduke umwanda, bikoreshwe, bibungabungwe kandi neza. Usanga hari imyembe yaboze, ubwoko bw’imbuto nyinshi, imboga, bijyanwa ku kimoteri byarapfuye kubera ko bitigeze bibikwa neza".

Hakorwe iki?

Dr Mpabwanamaguru avuga ko icya mbere kirimo gukorwa n’umujyi wa Kigali ari ukwigisha abacuruzi gufata neza ibicuruzwa, kumenya ngo iyo bigeze ku cyiciro runaka biba bigiye kwangirika no kurangura ibingana n’abakiriya bateganya kugira.

Ati "Mbere na mbere umucuruzi agomba kumenya ngo ncuruza ibi, byangirika muri ubu buryo, ndasabwa iki mu kwirinda ko umusaruro wanjye wangirika, ndasabwa kujya ndangura bike, icyo kubitwaramo giteye gutya, ndarangura igihe iki n’iki".

Umuyobozi Nshingwabikorwa w’Umuryango Nyarwanda uharanira Iterambere ry’Igihugu (RWARRI), Bel Ange Uwizeye, asanga muri rusange abanyarwanda bakeneye ubukangurambaga kugira ngo basobanukirwe, ese dukeneye gukomeza kwangiza ibintu bitwara amafaranga kandi hari abantu bakeneye kuba batungwa n’ibi twangiza?".

Ati "Mu maguriro manini hari aho usanga bategereza ko ibiribwa birangiza igihe bikajya kujugunywa, ese ntihakorwa uburyo bw’ikoranabuhanga ku buryo ibijya kwangirika bimenyekana hakiri kare noneho bikaba byagabanyirizwa igiciro byaba na ngombwa bikaba byatangirwa ubuntu".

Niyoyita avuga ko mu byo basanze byakemura ikibazo cy’ibiribwa byangirika harimo ubukangurambaga bwo kubwira abantu ngo ’bya biryo bihahe ubiteke kuko ubikeneye, niba utabikeneye bireke. Niba ugiye ku isoko, haha ibyo ushoboye’.

Ku bacuruza ibiribwa, hari umushinga wo gushyiraho urubuga ’Website’ ku buryo umuntu niba afite inyanya azishyira kuri rwa rubuga uzikeneye akazibona agahita ajya kuzigura. Bizatuma nta biryo byangirikira mu bubiko kuko byabuze abaguzi.

Hari ugushishikariza abikorera gushyiraho ibyuma bikonjesha. Niba umuntu acuruza imyembe, aho kugira ngo igume muri ka kabati yangirike ishyirwe muri cya cyuma igumane bwa buziranenge.

Icyabaye ibishingwe cyakorwamo ifumbire aho kugira ngo byitwe imyanda bibe ifumbire. Imyanda kandi yakorwamo ibicanwa bya ’briquette’.

Niyoyita avuga ko hanashyirwaho komite ku rwego rw’umudugudu cyangwa akagari ikusanya ibiribwa bitagikenewe n’ababiguze bikajyanwa mu bakene babikeneye.

Umuyobozi Nshingwabikorwa w’Umuryango Nyarwanda uharanira Iterambere ry’Igihugu (RWARRI), Bel Ange Uwizeye, asanga muri rusange abanyarwanda bakeneye ubukangurambaga kugira ngo basobanukirwe uko bafata neza ibiribwa
Dr Mpabwanamaguru yavuze ko abacuruzi bagirwa inama yo kurangura ibigendanye n'isoko bafite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .