Gushyira abagore mu buyobozi ntibyapfuye kubaho: Ubuhamya bwa bamwe bari mu myanya ikomeye

Yanditswe na Ishimwe Israel
Kuya 16 Ugushyingo 2018 saa 06:38
Yasuwe :
0 0

Ubushobozi bw’Umunyarwandakazi ntibwijanwa! Ubu afite ijambo kuva mu rugo kugera mu bushorishori bw’igihugu, uruhare rwe mu kubaka u Rwanda ntirushidikanywaho.

Ubu abanyarwandakazi bari mu myanya ikomeye mu nzego za leta n’izigenga.

Urugero rwa bugufi ni umugoroba wo ku wa 12 Ukwakira 2018. Abatuye Kigali babonye Kigali Convention Centre imyasa mu mabara y’umutuku, umuhondo, ubururu, icyatsi n’umwura.

Icyo cyari igice kimwe mu byaranze kubyina intsinzi, ubwo Umunyarwandakazi Louise Mushikiwabo yemezwaga nk’Umunyamabanga Mukuru w’Umuryango w’Ibihugu bikoresha Igifaransa, OIF.

Umuyobozi w’Umujyi wa Kigali, Rwakazina Marie-Chantal yatangarije Jeune Afrique ko Mushikiwabo wabaye Minisitiri w’Ububanyi n’amahanga w’u Rwanda mu myaka icyenda, yabereye icyitegererezo Abanyarwandakazi benshi bashaka kwinjira mu nshingano zabo.

Ati “Ni umugore w’indatwa nka Inyumba Aloysia (wabaye Minisitiri w’Uburinganire n’Iterambere ry’Umuryango witabye Imana mu 2012.)”

Mu Rwanda imibare irivugira! Ubu abagore bari mu Nteko Ishinga Amategeko mu Mutwe w’Abadepite ni 61.25%, ndetse bamaze kugaragaza ubushobozi mu buyobozi bw’ibigo byose byaba ibya leta cyangwa ibyigenga.

Rwakazina ubarizwa mu Muryango wa FPR Inkotanyi, avuga ko guhabwa umwanya ahanini harebwa ibyo ushoboye gukora, kandi iyo wize ndetse ukaba ushoboye, biba byoroshye guhabwa inshingano.

Uyu mugore w’imyaka 45 wavukiye mu Burundi, yatowe muri Gicurasi nyuma y’ukwegura kwa Nyamurinda Pascal. Ayoboye abaturage barenga miliyoni n’igice batuye Kigali.

Rwakazina yize muri Kaminuza ya Louvain-la-Neuve mu Bubiligi. Yigishije mu yari Kaminuza Nkuru y’u Rwanda mu 2000-2008, aza no kugirwa Umuyobozi wungirije w’Ishyirahamwe ry’ Uturere n’Umujyi wa Kigali (RALGA) mu 2010-2013.

Yanabaye Umuhuzabikorwa w’inkunga zose z’Umuryango w’Abibumbye mu bikorwa bya leta ndetse yo gutorerwa kuyobora Kigali.

Umwe mu banyamuryango ba FPR Inkotanyi yabwiye Jeune Afrique ati “Iyo FPR ibona umuntu ufite ubushobozi, imwigaho ikareba umurimo yakora neza. Hatoranywa abakandida batatu cyangwa bane, bakaganirwaho na Biro Politiki y’Umuryango. Iyo umuryango utanyuzwe, hashakwa undi musimbura.”

FPR iri ku butegetsi kuva muri Nyakanga 1994, yubakiye politiki yayo ku guteza imbere abagore. Kuva mu 2003 Itegeko Nshinga rigena ko mu myanya yose itorerwa mu buyobozi no muri guverinoma, abagore bagomba kugiramo 30%.

Senateri Rutaremara Tito yagize ati “Ni ubushake bwa politiki bujyanye n’ibibera mu Rwanda. Nyuma ya Jenoside yakorewe Abatutsi, abagore banganaga hafi na 70% by’abaturage bose.’’

Mu bagore bakomeye harimo Umuyobozi wa Bank of Kigali Group PLC, Dr Karusisi Diane. Avuga ko nyuma ya Jenoside yaguyemo Abatutsi barenga miliyoni, Leta yafashe ikindi cyerekezo.

Ati “Igice kimwe cy’abatubanjirije bishwe mu 1994. Abayobozi bashatse uko baha inshingano abiganjemo urubyiruko rurangije amasomo kuko hari n’ikibazo cy’ubushobozi. Kuva icyo gihe, Guverinoma yatangije uburyo bwo gushaka abandi bantu bashyirwa mu myanya.’’

Dr Karusisi yavukiye i Kinshasa mu muryango w’aborozi b’Abanyarwanda bari mu buhungiro. Ayobora BK kuva mu 2016.

Kimwe n’abandi banyarwanda, ba sekuru bahunze mu 1960, mu bihe Abatutsi bameneshejwe mu gihugu. Byatumye yigira mu Mujyi wa Goma mu yahoze ari Zaïre. Nyuma umuryango we waje gukomereza mu Burundi.

Dr Karusisi w’imyaka 45 yigiye amashuri yisumbuye mu Burundi mbere yo kwerekeza mu Busuwisi. Yavanye impamyabumenyi muri Kaminuza ya Fribourg ndetse atangira gukora muri Crédit Suisse.

Ubumenyi bwe bwatumye abengukwa n’u Rwanda, ndetse mu 2009 ahabwa igihembo nk’umwe mu rubyiruko rw’Indashyikirwa kizwi nka “YouthConnekt Champions and Celebrating Young Rwanda Achievers Awards (CYRWA) gitangwa na Madamu Jeannette Kagame.

Iki gihembo cyanahawe Nyombayire Stéphanie wigaga muri Kaminuza ya Swarthmore muri Philadelphie na Mpambara Inès, ubu bombi bakora mu Biro by’Umukuru w’Igihugu.

Dr Karusisi yagize ati “Madamu Jeannette Kagame yagize uruhare mu guteza imbere urubyiruko. Igihembo nahawe cyatumye ngaruka mu Rwanda mu 2009.”

Usibye we, hari abandi bagore bafite uruhare rukomeye mu miyoborere, bakuriye mu buhungiro kubera ingaruka z’ubuyobozi bubi bwa mbere ya Jenoside.

Aba barimo; Clare Akamanzi warerewe muri Uganda, ubu ayobora Ikigo cy’Igihugu cy’Iterambere (RDB); Yvonne Makolo uyobora RwandAir wavuye mu gihugu ajya muri Canada hagati ya 1993-2003 n’umuvandimwe we Yolande Makolo, ubu ushinzwe Ubujyanama mu by’Itumanaho mu Biro bya Perezida no kwandika imbwirwaruhame z’umukuru w’igihugu.

Umuryango wa Marie-Chantal Rwakazina wo wahunze u Rwanda ubwo Juvénal Habyarimana yari akijya ku butegetsi mu 1973, ku buryo yinjiye mu mujyi ubu abereye umuyobozi mu 1995.

Hari kandi Inès Mpambara wakuriye muri Canada, wayoboye Ishuri ry’Itangazamakuru mu yahoze ari Kaminuza Nkuru y’u Rwanda. Ubu ni we muyobozi w’ibiro by’Umukuru w’Igihugu.

Yvonne Makolo ufite impamyabumenyi yakuye muri Kaminuza ya McGill i Montréal muri Canada yagize ati "Ni ko kuri ko ubu abagore bakiri bato bari mu myanya ikomeye mu Rwanda".

Iyo myanya kandi ihabwa abantu bafite ubumenyi, bize mu mashuri akomeye nko mu Bubiligi, Leta Zunze Ubumwe za Amerika, u Busuwisi n’u Bwongereza.

Mu myaka wa 2000 nibwo hakozwe ubukangurambaga bugamije gushishikariza abantu bafite ubumenyi bwafasha igihugu ariko bari mu mahanga, gutaha bagatanga umusanzu mu kugisana. Bigeze muri diaspora, nibwo bamwe biyemeje gutaha barimo na Dr Diane Karusisi.

Abandi bagiye binjira mu gihugu muri gahunda izwi nka ‘Come and See, Go and Tell’, ifasha abantu baba mu mahanga gusura u Rwanda, bakitegereza intambwe rugezeho, bakirebera isura nyayo rufite itandukanye n’iy’ u Rwanda bahunze.

Iyo ni n’imwe mu ntego za Rwanda Day, igikorwa gikomeye gihuza abanyarwanda bo muri diaspora guhera mu 2010.

Umwe mu bitabira Rwanda Day cyane, Jolie Murenzi, yanavuze ko indi ntego y’uyu munsi ari no gushakisha impano z’abanyarwanda bari hirya no hino.

Uburyo umugore yanahawe umwanya mu miyoborere y’u Rwanda, bwatumye ubwo ku wa 18 Ukwakira 2018 Perezida Kagame yavugururaga Guverinoma, abagore bahawe 50% mu baminisitiri n’abanyamabanga ba leta bayigize.

Umuyobozi w’Umujyi wa Kigali, Rwakazina Marie-Chantal avuga ko abagore bahabwa inshingano hashingiwe ku bushobozi bafite
Umuyobozi Mukuru wa RDB Clare Akamanzi
Louise Mushikiwabo ni umwe mu banyarwandakazi baharuriye abandi amayira
Umunsi Mushikiwabo yatoweho, Kigali Convention Centre yamyasaga amatara mu mabara y'ibendera rya OIF
Umuyobozi Mukuru wa BK Group Plc Dr Diane Karusisi, ni umwe mu bagore bakomeye kuko ayoboye banki ya mbere mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza