Gisagara: Uko abaturiye igishanga cy’Akanyaru bafashijwe kubaho

Yanditswe na Prudence Kwizera
Kuya 20 Nyakanga 2019 saa 09:55
Yasuwe :
0 0

Bamwe mu baturage bo mu Karere ka Gisagara baturiye igishanga cy’Akanyaru bavuga ko mbere kitaratunganywa bari batunzwe no guca inshuro rimwe na rimwe bakabura ibyo kurya bakarara ubusa.

Bavuga ko ubwo bukene no kubura ibyo kurya babiterwaga no kutagira aho guhinga hahagije cyangwa bahinga ntibeze kuko nta nyongeramusaruro babaga bafite.

Nyuma yo gutunganyirizwa igishanga cy’Akanyaru bagahabwa igice cyo guhinga, imbuto n’inyongeramusaruro basigaye bahinga bakeza bakihaza mu biribwa ndetse bagasagurira isoko.

Icyo gishanga cy’Akanyaru gifite ubuso bwa hegitali 529 gihingwamo n’abaturage bagera ku 4 080; bavuga ko bahakura umusaruro w’ibigori urenga toni 300 ku gihembwe.

Mukeshimana Josephine ati “Nahoze mu bukene cyane kuko naburaga n’ibyo abana bararira. Icyanteje imbere ni uko baduhaye igishanga cyo guhinga; neza nk’ibilo 500 ku buryo nkuramo amafaranga ibihumbi birenga 70.”

Nyirabataruzi Chantal ati “Twari tugowe no kubona aho duhinga; nka njye ubu noroye amatungo magufi nakuye mu buhinzi mu gishanga.”

Nayigizi Boniface uyobora koperative ihinga muri icyo gishanga yavuze ko buri munyamuryango afite igipimo ahinga kingana n’intambwe 20 ku 100; kandi iyo bamaze gusarura bagakusanyiriza hamwe umusaruro bakawujyana ku ruganda ruwutunganya.

Ati “Iyo umusaruro weze tuwukusanyiriza hamwe tugashyira ku isoko amafaranga bakayashyira kuri konti hanyuma tukagira igihe cyo guhemba abahinzi.”

Abo bahinzi bavuga ko bamaze kwiyubakira uruganda rutunganya ifu y’ibigori ingana na toni eshanu ku munsi.

Bavuga ko abenshi muri bo babarizwa mu cyiciro cya mbere n’icya kabiri by’ubudehe ariko nibivugururwa biteguye kuva mu mubare w’abahabwa inkunga.

Umuyobozi wungirije ushinzwe iterambere ry’ubukungu mu Karere ka Gisagara, Hanganimana Jean Paul, yavuze ko abaturage bahinga muri icyo gishanga bahoze mu bukene ariko kuri ubu bari mu batagihangayikishije.

Ati “Abahinga muri kiriya gishanga ni bamwe mu baturage batagihangayikishije ubuyobozi haba mu birebana no kubona ibibatunga, mu kugira amacumbi ndetse no kugira amatungo nk’inka.”

“Mu Murenge wa Mamba ku gace kegereye igishanga cy’Akanyaru ubona ingo zose zoroye inka; byose bikomoka ku musaruro bakura muri kiriya gishanga.”

Hanganimana avuga ko bafite gahunda yo gutunganya ibishanga byose bakabiha abaturage bakabihinga kuko basanze bigira uruhare mu kubavana mu bukene.

Abagera ku 4 080 barimo abagore, abagabo n’urubyiruko ni bo bakorera ubuhinzi mu gishanga cy'akanyaru cyatunganyijwe
Abahinzi b'ibigori mu gishanga cy'Akanyaru bavuga umusaruro bahakura wabafashije kuva mu bukene

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza