Minisitiri Shyaka yasabye igisubizo cyihuse ku bambuka umupaka bagiye kwahira hakurya y’Akanyaru

Yanditswe na Ishimwe Deborah
Kuya 15 Nzeri 2020 saa 10:34
Yasuwe :
0 0

Minisitiri w’Ubutegetsi bw’igihugu Prof Shyaka Anastase yasabye ubuyobozi bw’Akarere ka Gisagara gushyira imbaraga mu gutera ubwatsi kugira ngo hirindwe ikibazo cy’abantu bagenda bagiye kwahira ubwatsi bw’amatungo bakarenga imbibi z’u Rwanda.

Ibi Minisitiri Shyaka abigarutseho mu gihe hashize igihe gito havuzwe amakuru y’uko hari abana batanu bo mu Karere ka Gisagara bagiye kwahira mu gishanga cya Akanyaru bagashimutwa n’Abarundi.

Mu ruzindiko Prof .Shyaka Anastase aheruka kugirira muri aka karere ka Gisagara yibukije ubuyobozi bwako ko ibyatsi bitagakwiye kuba biba ikibazo abantu bajya gushakira igisubizo hanze y’igihugu.

Yagize ati “ Tugiye kuba abantu bo gushakira ibyatsi hakurya y’Akanyaru? Imbanzabigwi inanirwe n’ibyatsi? Abagoronome baze batubwire uko ibyatsi bizaboneka abantu ntibongere kurenga imipaka bashaka ibyatsi,hagomba guhingwa ubwatsi bwinshi kuko nibyo bizakemura iki kibazo.”

Ubuyobozi bw’Akarere bwijeje Minisitiri Shyaka ko bitarenze uyu mwaka bazaba bamaze gukemura iki kibazo cy’ubwatsi.

Ku wa 15 Kanama nibwo humvikanye ikibazo cy’abana batanu bagiye kwahira ubwatsi bw’amatungo mu gishanga cy’Akanyaru gihana imbibi n’u Burundi, basanga Abarundi bari bihishe mu migano ihari bahita babashimuta babajyana hakurya.

Abana bajyanywe ni Tuyishimire Jean de Dieu w’imyaka15; Sibomana Frederic w’imyaka 22; Ntahidakiriza Innocent w’imyaka 18; Noheli Jean Claude w’imyaka 18 na Sibomana Innocent w’imyaka 16. Bose ni abo mu Murenge wa Mukindo.

Abo babyeyi basabye Leta y’u Rwanda kuvugana n’iy’u Burundi kugira ngo abo bana bagarurwe.

Ubuyobozi bw’aka karere bwabwiye TV1 ko aba bana bahiye ku ruhande rw’u Burundi bituma babatwara, buvuga ko kandi bavuganye n’ubuyobozi bwaho bavuga ko buzabashyikiriza ubutabera.

Akarere ka Gisagara kasabwe gushaka uko haterwa ubwatsi kugira ngo abaturage badakomeza kurenga imbibi z'igihugu bajya kwahira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .