00:00:00 IGIHE NETWORK KN KINYARWANDA EN ENGLISH FR FRANCAIS

Gisagara: Agahinda k’abangavu baterwa inda bajya kurega bagasiragizwa

Yanditswe na Prudence Kwizera
Kuya 7 August 2022 saa 05:08
Yasuwe :

Nyuma y’uko bigaragaye ko mu Rwanda abangavu bakomeje guterwa inda imburagihe bakiri bato, hafashwe ingamba zitandukanye zo kubikumira ariko by’umwihariko basabwa kujya bavuga abagabo babasambanyije kugira ngo bahanwe.

Iyi ngingo yo kuvuga abagabo babasambanyije yakomeje kuvugwamo imbogamizi nyinshi, aho bamwe mu bangavu bashinjwa kubahishira bitewe n’impamvu zirimo kwanga guhomba amafaranga y’indezo babaha ndetse no kuba bamwe baterwa ubwoba ko nibabivuga bazabica.

Ubukangurambaga bwarakomeje bigera aho bamwe mu bangavu batinyuka kuvuga abagabo babasambanyije ndetse bajyana n’ibirego byabo ku Rwego rw’Igihugu rw’Ubugenzacyaha (RIB), bamwe muri abo bagabo barafatwa bakorerwa dosiye, bashyikirizwa Ubushinjacyaha, bajyanwa mu nkiko bakatirwa ibihano kuko bahamwe n’ibyaha.

Urugero ni aho mu Karere ka Nyamagabe Abagabo 17 bahamwe n’ibyaha byo gusambanya abangavu no kubatera inda imburagihe mu mwaka wa 2021/22. Muri abo 17 harimo bane bazitewe na ba se.

Hari abatumwa kujya kuzana abagabo babateye inda

Bamwe mu bangavu bavuga ko iyo bagiye kurega abagabo babasambanyije bakabatera inda, bahura n’imbogamizi zitandukanye zirimo gutumwa kujya kubazana.

Umwe wo mu Mudugudu wa Kigozi mu Kagari ka Gabiro ho mu Murenge wa Gishubi mu Karere ka Gisagara, yavuze ko yajyanye ikirego kuri RIB kugira ngo umugabo wamuteye inda akurikiranwe babanza kwanga kucyakira.

Ati “Bwa mbere babanje kwanga kwakira ikirego cyanjye barambwira ngo nimpere hasi, mpereye hasi rero inzego z’ibanze zagiye kumushaka amaze kubyumva ahita acika arigendera.”

Undi mwangavu na we wo mu Murenge wa Gishubi yavuze ko yagiye kuri RIB kurega umugabo wamusambanyije akamutera inda, bamutuma urupapuro ruvuye mu mudugudu.

Ati “Njyewe nagize ikibazo nterwa inda noneho njya kuri RIB bantuma urupapuro ruvuye mu mudugudu, noneho ngiyeyo bararunyima. Noneho banyohereza i Kibirizi (ku bitaro) kunyura mu cyuma ngo barebe ko ntwite, bashaka kuyikuramo ku ngufu, bampa umuti w’icyatsi kibisi ndawanga.”

Uyu mwangavu avuga ko byabaye ngombwa ko ava aho ku bitaro ntacyo bamumariye, akaba yibaza aho ikibazo cye kizaherera kuko umucuruzi wamuteye inda yahise acika akimenya ko yagiye kumurega.

Undi mwangavu wo mu Kagari ka Nyeranzi yavuze ko yatewe inda n’umuhugu w’aho yagiye gukora akazi ko mu rugo mu Karere ka Huye.

Aho yakoraga bakimara kumenya ko atwite bamusubije iwabo. Abifashijwemo n’ababyeyi be yagiye gutanga ikirego kuri RIB.

Ati “Natanze ikirego muri RIB, nagiye i Gisagara ngezeyo banyohereza i Butare (Huye) ndagenda ndagitanga barambwira ngo bazantumaho mbasigira nimero zanjye. Ubu ngubu ndategereje ariko hashize igihe kinini, hashize nk’ibyumweru nka bibiri mvuyeyo.”

Undi mwangavu wo Mudugudu wa Gicaca mu Kagari ka Nyakibungo yavuze ko yatewe inda n’umusore, abimubwiye amusubiza ko bayikuramo, biba ngombwa ko abimenyesha Umukuru w’umudugudu ariko amugira inama yo kubiceceka.

Ati “Barabanje barantoteza ngo si umuhungu wabo wanteye inda, njya kumurega ku Mukuru w’Umudugudu, ubwo nari ntwite noneho Umukuru w’Umudugudu arambwira ngo umwana navuka tuzareba niba basa tumenye ko ari uwe. Arambwira ngo wowe wijya kumurega, abantu b’iyi Si batazagera aho baguhemukira. Ndabyihorera nyine ndatuza kuko nta kundi nari kubigenza.”

Umukozi uhagarariye umushinga Speak Out mu muryango Action Aid, Kakibibi Annet, yavuze ko bafasha bangavu batewe inda imburagihe ariko bajya babagaragariza imbogamizi bahura nazo iyo bagiye kurega abagabo babateye inda kuko babatuma kujya kuzana ababasambanyije.

Yavuze ko iki kibazo bakiganiriye n’abayobozi ba RIB mu turere bakoreramo kugira ngo bagishakire umuti urambye.

Ati “Abakobwa bagiye bakitugaragariza gusa twigeze kukivugaho no mu nama y’ubushize mu kwezi kwa Gatatu turi kumwe n’abayobozi ba RIB bo mu turere tubagaragariza ko ari imbogamizi kuba umuntu yakwitwarira convocation (urupapuro rw’ihamagara) batubwira ko bikwiriye guhinduka batangira no kubihindura ariko uracyavugana n’abakobwa bakakubwira ko bihari.”

Yavuze ko bagiye kongera gukurikirana baganire na RIB kugira ngo aho bigikorwa gutyo bikosorwe.

Bamwe mu bangavu bo mu Karere ka Giagara batewe inda imburagihe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .