Gisagara: Ababyeyi baratabaza ubuyobozi ngo bubafashe kugaruza abana babo batanu ‘bashimuswe n’Abarundi’

Yanditswe na Prudence Kwizera
Kuya 14 Nzeri 2020 saa 03:34
Yasuwe :
0 0

Ababyeyi bo mu Murenge wa Mukindo mu Karere ka Gisagara bavuga ko hari abana babo batanu bashimuswe n’Abarundi ubwo bari bagiye kwahira ubwatsi mu Gishanga cy’Akanyaru, hakaba hagiye gushira ukwezi batazi aho babajyanye.

Abo babyeyi bavuga ko tariki ya 15 Kanama 2020 aribwo abana babo bagiye kwahira ubwatsi bw’amatungo mu gishanga cy’Akanyaru gihana imbibi n’u Burundi, basanga Abarundi bari bihishe mu migano ihari bahita babashimuta babajyana hakurya.

Abana bajyanywe ni Tuyishimire Jean de Dieu w’imyaka15; Sibomana Frederic w’imyaka 22; Ntahidakiriza Innocent w’imyaka 18; Noheli Jean Claude w’imyaka 18 na Sibomana Innocent w’imyaka 16. Bose ni abo mu Murenge wa Mukindo.

Abo babyeyi basabye Leta y’u Rwanda kuvugana n’iy’u Burundi kugira ngo abo bana bagarurwe.

Ndayisaba Samuel utuye mu Kagari ka Gitega uri mu bashimutiwe abana yavuze ko ababatwaye barimo n’abapolisi.

Ati “Abana bagiye kwahira mu gishanga basanga mu migano yaho yo mu Rwanda hari umupolisi wari wihishemo, yafashe abo bana barimo bahira, mu by’ukuri babakuye mu Rwanda, barangije babajyana i Burundi kugeza iyi saha ntituramenya aho baherereye.”

Abo babyeyi bavuga ko abo Barundi bakimara kubashimutira abana babatumyeho ngo bazane amafaranga babarekure ariko bagezeyo bari kumwe n’inzego z’ubuyobozi hamwe n’iz’umutekano, barababima bahita babajyana mu Burundi.

Ndayisaba ati “Ubundi bari abantu bane, bari abapolisi babiri bafite imbunda n’imbonerakure ebyiri. Harimo abana banjye babiri uwitwa Tuyishime Jean de Dieu n’undi witwa Irasubiza Jean Paul; bafashe uwo Irasubiza Jean Paul bamwandikira urupapuro ngo aze arushyire ababyeyi, noneho bari bavuze ko tujyana buri muntu ibihumbi 15.”

Akomeza agira ati “Twaragiye kugira ngo tuvugane n’abo bapolisi ariko bari hirya i Burundi, babonye hajemo abayobozi harimo ba Dasso babiri, umupolisi yahise ahaguruka aravuga ngo babashorere babajyanye hajemo ubuyobozi.”

Undi mubyeyi wo mu Kagari ka Nyabisagara witwa Uwimbabazi Yacinthe na we washimutiwe umwana witwa Noheli Jean Claude, avuga ko Abarundi bashimuse abana batandatu b’Abanyarwanda, umwe baza kumurekura bamutumye kubimenyesha ababyeyi ngo bazane amafaranga naho abandi batanu barabatwara.

Uyu mubyeyi avuga ko ubuyobozi bw’inzego z’ibanze bwagerageje gukurikirana ikibazo cyabo ariko ntibyagira icyo bitanga bityo bakifuza ko ubuyobozi bwisumbuye aribwo bwabafasha bukavugana n’u Burundi kugira ngo abana babo bagarurwe mu rugo.

Ati “Ubuyobozi turifuza ko bwadukorera ubuvugizi wenda bakavugana na Leta y’u Burundi bakazana abo bana; twebwe se ko bacyura impunzi zabo twebwe batuzaniye abana.”

Undi mubyeyi witwa Nyiratebuka Marie Grace avuga ko umwana we washimuswe yitwa Sibomana Innocent w’imyaka 16 y’amavuko. Avuga ko kugeza ubu atazi niba abo bana bakiriho.

Yemeza ko abana babo bari basanzwe bajya kwahira ubwatsi bw’amatungo mu Gishanga cy’Akanyaru ntibahure n’ikibazo.

Ababyeyi baganiriye n’itangazamakuru bahuriza ku kuba amaso bayahanze ubuyobozi bw’u Rwanda kugira ngo buvugane n’ubw’i Burundi abo bana bagarurwe.

Umuyobozi w’Akarere ka Gisagara, Rutaburingoga Jérome, yabwiye IGIHE ko icyo kibazo cy’abana batwawe bakimenye bavugana n’ubuyobozi bwo ku ruhande rw’u Burundi rubabwira ko abo bana bari barenze umupaka bityo bazashyikirizwa ubutabera.

Ati “Twavuganye n’ubuyobozi bwo hakurya mu Burundi tubabwira uko byagenze, mu by’ukuri ntibabasha kubyumva bavuga ko bazabakomezanya mu butabera. Uwo twavuganye ni Musitanteri (umuyobozi) wa Komini Nyamurenza.”

Yasobanuye ko aho abo bana bari bagiye kwahira ubwatsi ari mu mirima y’Abarundi ifatanye n’iyo mu Rwanda ariko uruzi rw’Akanyaru rwayobye rurayihuza ku buryo imbibi zasibanganye, abahinzi ari bo babasha kuzimenya bitewe n’uko bahamenyereye.

Akomeza avuga ko ibyakozwe n’Abarundi bitari bikwiye kuko nk’abantu b’abaturanyi basangiye urubibi bari bakwiye koroherana ntibafate abo bana ngo babajyane kuko bari basanzwe babazi kandi bazi neza ko nta migambi mibi bafite.

Yavuze ko hari abana b’Abarundi bajya bambuka bakagera mu Rwanda ariko Abanyarwanda bakabasubiza hakurya batabahohoteye.

Rutaburingoga avuga ko abo babyeyi bakoze amakosa yo kohereza abana babo kwahira ubwatsi bw’amatungo mu gishanga hafi y’umupaka batitaye ko bashobora kwambuka bakajya i Burundi muri ibi bihe Isi ihanganye n’icyorezo cya COVID-19 ngo bishobora kuba n’intandaro yo kugikwirakwiza.

Ati “Gusa twari twarababujije ariko babirengaho ari nayo mpamvu ababyeyi babo twabahannye.”

Ubusanzwe kuvogera imipaka no kwambukira ahatemewe birabujijwe. Gusa ababyeyi batwariwe abana bavuga ko ubuhamya bahawe n’abahinzi bahinga mu Gishanga cy’Akanyaru bababwiye ko abana babo bashimuswe bari ku butaka bw’u Rwanda.

Ubuyobozi bw’Akarere ka Gisagara bwaciye amande y’ibihumbi 10 Frw buri mubyeyi watwariwe umwana, buvuga ko ari igihano cy’uko bohereje abana kwahira mu gishanga. Gitansi y’amande yanditseho ko barenze ku mabwiriza yo kwirinda icyorezo cya COVID-19.

Bamwe mu baturage batuye mu Murenge wa Mukindo hafi y'Igishanga cy'Akanyaru ni bo batwariwe abana n'Abarundi
Mu gishanga cy'Akanyaru mu Murenge wa Mukindo niho aho bana bari bagiye kwahira ubwatsi bw'amatungo
Uruzi rw'Akanyaru hari aho rwayobye rutuma amasambu y'Abanyarwanda n'ay'Abarundi yivanga ku buryo bigorana kumenya imbibi zayo ku batazizi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .