00:00:00 IGIHE NETWORK KN KINYARWANDA EN ENGLISH FR FRANCAIS

Gicumbi: Sahinkuye amaze imyaka itandatu atabyuka kubera indwara itaramenyekana

Yanditswe na Evence Ngirabatware
Kuya 24 Nzeri 2022 saa 05:11
Yasuwe :

Umuturage witwa Sahinkuye Jean Paul wo mu mudugudu wa Mutobo, Akagari ka Nyamiyaga, Umurenge wa Kageyo mu Karere ka Gicumbi, amaze imyaka irenge itandatu atabasha kuva mu buriri kubera indwara n’ubu itaramenyekana.

Sahinkuye w’imyaka 45 avuga ko indwara yamuhejeje hasi yamufashe nyuma y’uko asitaye agwa hasi avuye gusura inshuti ye ari kumwe n’umuryango we, kuva ubwo yabaye ‘paralyse’ ntarabasha guhagarara.

Yivuje mu bitaro bya CHUK bamucisha mu cyuma babura indwara, ajya mu bitaro byitiriwe Umwami Faysal naho indwara barayibura baramucyura. Mu myaka itandatu yose ntabasha guhagarara, kujya kota akazuba cyangwa gusubira mu nzu ni ukurindira abaterura amaguru n’amaboko.

Mu kiganiro na IGIHE, Sahinkuye yasobanuye ko yagerageje kwivuza ku bwisungane mu kwivuza afite biranga, FARG nayo igerageza kumuvuza mu gihugu biranga, agurisha n’isambu yari afite ngo arebe ko yivuza agakira byose biranga.

Ati “Biragaragara ko ndwaye ariko uburwayi ntibuboneka, simbasha guhagarara, wenda abenshi iyo bagiye kwivuza hanze bakabacisha mu cyuma hari igihe indwara iboneka bagakira, ndamutse mbonye ubufasha bwo kwivuriza hanze wenda nanjye nakira”.

Mu gahinda kenshi, uyu mugabo ufite umugore n’abana batatu avuga ko imyaka amaze aryamye yamuteye ubukene n’inzara bihoraho mu muryango kuko atakibasha guhahira umuryango.

Ati “Maze imyaka itandatu n’amezi abiri ntabasha guhaguruka aho ndyamye, mu bushobozi dufite tubayeho nabi biragoranye, mbasha kubona amafaranga ibihumbi cumi na bibiri ku kwezi [agenerwa na FARG] bidutunga nk’umuryango w’abantu batanu ariko biragoranye ugendeye ku biciro byo ku isoko”.

Amaboko ya Sahinkuye yatangiye kwikunja kubera igihe amaze atabasha kuva mu buriri, iyo abonye icyo kurya cyangwa kunywa abana nibo bamutamika aho aryame iwe mu rugo.

Yasabye abagiraneza bafite umutima utabara gukora ibyo bashoboye, niyo atavurwa, ariko akabona ibyo kurya bimutungira abana.

Abaturanyi ba Sahinkuye bavuga ko ikibazo cy’uburwayi bwe gikomeye kandi iyo umusuye ari bwo umenya agahinda afite. Basaba abagiraneza kumufasha kuko akeneye gusurwa mu gihe akiri ku isi.

Sahinkuye amaze imyaka itandatu atabyuka kubera indwara abaganga batarabona
Amaboko yamaze kwikunja ntabasha no gufata isahani ngo arye bisaba kumutamika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .