Gicumbi: Ingo zisaga 6000 zahawe amashanyarazi mu mwaka umwe

Yanditswe na Mugabo Jean d’Amour
Kuya 1 Kanama 2018 saa 01:48
Yasuwe :
0 0

Abatuye mu Karere ka Gicumbi ubu bariruhutsa imvune n’igihombo baterwaga no kutagira umuriro w’amashanyarazi aho batuye kuko bagombaga gushakira kure serivisi zitandukanye.

Ingo 6136 ni zo zahawe amashanyarazi mu mwaka w’ingengo y’imari wa 2017-2018 nk’uko byatangajwe na Nkundabakuze Fulgence, Umuyobozi w’ishami rya Sosiyete y’Igihugu Ishinzwe Ingufu (REG) mu Karere ka Gicumbi.

Ubwo IGIHE yasuraga abatuye mu Mirenge ya Mutete na Kaniga, badutangarije ko batangiye kubona ibyari inzozi zabo biba impamo mu Ugushyingo 2017, ubwo amashanyarazi yageraga aho batuye maze bakabona urumuri ndetse bagatangira kubonera hafi ibyo bakeneye.

Dusabemungu Gaudence, umubyeyi twasanze ku biro by’Umurenge wa Mutete agiye kwishyura umusanzu w’ubwisungane mu kwivuza akaba atuye mu Kagarari ka Kabeza, yavuze ko serivisi zisigaye zihuta ndetse ibyo bakeneye byose babibonera aho batuye kuko bagejejweho amashanyarazi.

Yagize ati “Kubona ibyangombwa byararuhanyaga ariko ubu aho amashanyarazi agereye hano byarakemutse; turaza byose tukabirangiriza hano. Ubu tugiye kwishyura mitiweli tutavunitse kuko hano barabidukorera byose tugahita twisubirira mu mirimo yacu, twazagira uburwayi tukegura iyi ndangamuntu tukajya kwa muganga bakatuvura.”

Nsanzimfura Téléphore, utuye mu Kagari ka Nyarubuye, Umudugudu wa Rusumo, yavuze ko batarabona amashanyarazi batangaga amafaranga agera ku 2000 bajya gufotoreza ibyangombwa mu Rukomo cyangwa i Byumba, ariko ubu bakaba basanga serivisi zose ku Murenge.

Nakure Marie Clemence, utuye mu Murenge wa Kaniga, Akagari ka Kabuga, yavuze ko amashanyarazi yabegereje nyinshi muri serivisi bakenera cyane harimo izo kwiyogoshesha, gushesha imyaka ndetse n’abana bagashobora gusubiramo amasomo mu masaha ya nijoro.

Nzayisenga Donat, umwarimu utuye mu Mudugudu wa Runyinya, Akagari ka Mulindi, yavuze ko ubu biborohera gukoresha ikoranabuhanga n’itumanaho mu gihe batarabona umuriro wasangaga telefoni ziva ku murongo kenshi kubera ko bajyaga kuzicaginga mu gasanteri ka Mulindi bakishyura amafaranga 100 naho uwayabuze akaba avuye ku murongo.

Serivisi z’imari n’uburezi zarahindutse

Munyaneza Papias, Umucungamutungo wa Kira Mutete Sacco, yavuze ko amashanyarazi yatumye serivisi batanga ziba zinoze ndetse n’amafaranga bakoreshaga mu bikorwa bya buri munsi akaba yaragabanyutseho nibura kimwe cya gatatu.

Yagize ati “Hano twari dufite mudasobwa ariko inyinshi ntizakoreshwaga kuko twagombaga kujya gucaginga izigendanwa tukazizana tukazikoresha umwanya muto nabwo umuriro ugahita ushiramo. Impapuro dukenera mu kazi ka buri munsi twajyaga kuzifotoza mu Rukomo cyangwa i Byumba mu bilometero hafi 20 ugasanga bidutwara amafaranga menshi ariko ubu byose turabyikorera hano, tugakoresha imashini zibara amafaranga, ugasanga akazi karihuta.”

Umunyamabanga Nshingwabikorwa w’Umurenge wa Kaniga, Bangirana Jean Marie Vianney, yavuze ko uyu Murenge wari ufite umuriro ku kigero cya 13% mu 2015 ariko ubu bageze kuri 40% ndetse utugari twose dutanu n’ibigo by’amashuri bitandatu bikaba bifite amashanyarazi.

Yagize ati “Ibi rero birimo kuzana impinduka mu mibereho n’iterambere ry’abaturage. Ubu hari ibikorwa abaturage bagenda bihangira harimo inzu zogosha imisatsi, abasudira, hari abafite ibyuma bisya imyaka n’ibindi. Ubu imyigire iragenda neza, abarimu bakifashisha ikoranabuhanga mu kwigisha, ibiro by’utugari bibasha gutanga serivise neza n’abari basanzwe bakora ibikorwa by’ubucuruzi ubu bashoboye kunoza serivise kubera amashanyarazi.”

Bangirana yashishikarije abaturage baturiye umuyoboro w’amashanyarazi kuwufatiraho bakawugeza mu ngo zabo kandi ntibumve ko umuriro ari uwo gucana mu rugo gusa ahubwo bakawubyaza umusaruro bakora ibikorwa bibateza imbere.

REG itangaza ko ingo zingana na 32% zifite amashanyarazi mu Karere ka Gicumbi, bakaba bafite intego yo kugeza umuriro ku zindi ngo 5083 muri uyu mwaka w’ingengo y’imari.

Guverinoma y’u Rwanda yiyemeje kugeza umuriro ku Banyarwanda bose bitarenze mu 2024, ubu abafite amashanyarazi bakaba bagera kuri 46,5% nk’uko imibare ya REG yo muri Kamena 2018 ibigaragaza.

Nsanzimfura Jacques, utuye mu Mudugudu wa Runyinya mu Kagari ka Mulindi, yavuze ko atarahabwa amashanyarazi yamurikishaga ibishirira
Nzayisenga Donat, umwarimu utuye mu Mudugudu wa Runyinya, Akagari ka Mulindi, yavuze ko ubu telefoni ye itakibura umuriro kuva aho REG ibahereye umuriro
Abatuye mu Murenge wa Mutete bajyaga gushakira serivise zitandukanye i Byumba ubu bariruhutsa nyuma yo guhabwa amashanyarazi
Hari ibikoresho byinshi byamaze kugera mu Karere ka Gicumbi bizakoreshwa mu kugeza umuriro ku ngo 5083 mu mwaka w'ingengo y'imari wa 2018-2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza