Gicumbi: Gitifu w’akagari yafashwe akekwaho kunyereza amata agenewe abana

Yanditswe na Nkurunziza Ferdinand
Kuya 2 Mutarama 2020 saa 04:42
Yasuwe :
0 0

Umunyamabanga Nshingwabikorwa w’Akagari ka Rwaruyumbu, Umurenge wa Manyagiro, ho mu Karere ka Gicumbi afunzwe akurikiranyweho kunyereza umutungo wa leta.

Uyu muyobozi wagejejwe ku Biro by’Urwego rw’Igihugu rw’Ubugenzacyaha (RIB), Ishami rya Cyumba tariki ya 30 Ukuboza 2019; ko yanyereje amata y’Inyange yari agenewe abana muri gahunda yo kurwanya imirire mibi.

Umuyobozi w’agateganyo w’Umurenge wa Manyagiro, Zephrin Habimana, yabwiye IGIHE ko ifungwa ry’uyu muyobozi w’akagari ryaturutse ku kirego cyatanzwe n’uwari umwungirije, bari basanzwe bafitanye amakimbirane.

Yagize ati “Twe ubundi iyo tubirebye, dusanga ari nk’ikibazo cy’amakimbirane, wenda tutahamya ko amata yibwe cyangwa atibwe, kuko n’ubundi ikibazo kikiri mu iperereza nyine tugomba gutegereza; ariko iyo turebye dusanga ari amakimbirane kuko bakoresha n’abandi baturage bafitanye ikibazo n’uwo mudamu, abo baturage bakamera nk’abakoze agatsiko ko gushaka ibimenyetso byose byaho uwo gitifu yaba yarakoze ikosa kugirango babone icyaha cyamuhama, bityo yirukanwe, hashingiwe ku gushaka kwihimura kuko ngo na we (uwafashwe) yirukanishije uwari umuyobozi w’ako kagari.”

Habimana yakomeje avuga ko raporo y’uburyo amata yatanzwe mu bihe bitandukanye, batigeze bayikurikirana cyane ko n’uburyo amata agezwa ku bo agenewe, nta ruhare Umurenge ubigiramo.

Umuvugizi wa RIB, Marie Michelle Umuhoza, yabwiye IGIHE ko ufunzwe yafashwe tariki 30 Ukuboza 2019 akurikiranyweho icyaha cyo kunyereza umutungo wa Leta.

Yakomeje avuga ko icyaha uwo muyobozi akurikiranyweho nikiramuka kimuhamye, azahanwa n’ingingo ya cumi y’itegeko ryo kurwanya ruswa.

Iyi ngingo ya 10 mu Itegeko ryo kurwanya ruswa ivuga ko umuntu wese, yaba umukozi wa Leta cyangwa undi ukora umurimo wa Leta ukoresha mu nyungu ze cyangwa iz’undi, umutungo wa Leta aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka irindwi ariko kitarenze imyaka icumi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’umutungo yanyereje.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .