Gasabo: Abagore bo muri FPR Inkotanyi baremeye abatishoboye, babagenera ubutumwa bwo kwibohora

Yanditswe na Twarabanye Venuste
Kuya 2 Nyakanga 2020 saa 10:59
Yasuwe :
0 0

Urugaga rw’Abagore rushamikiye ku Muryango FPR Inkotanyi n’Inama y’Igihugu y’Abagore, CNF, ku rwego rw’Akarere ka Gasabo baremeye abagore bagizweho ingaruka n’Icyorezo cya COVID-19 bo mu Murenge wa Gikomero babagezaho n’ubutumwa bwo Kwibohora.

Imiryango 15 yo mu Murenge wa Gikomero muri Gasabo niyo yahawe ibiribwa, udupfukamunwa n’amasabune. Buri muryango wahawe ibilo 10 bya kawunga, ibilo 10 by’ibishyimbo, litiro ebyiri z’amavuta, udupfukamunwa tune n’amasabune.

Umuyobozi w’Urugaga rw’Abagore rushamikiye kuri FPR Inkotanyi mu Karere ka Gasabo, Rugera Jeannette, yavuze ko ari inkunga bakusanyije muri Komite z’urugaga n’iza CNF ku rwego rw’akarere n’urw’imirenge.

Ni nyuma yo kubona ko hari abagore bafite ibibazo byihariye bakeneye ubufasha, barimo abapfakazi n’abana babyariye iwabo mu miryango itishoboye.

Rugera yavuze ko amafaranga yamaze gukusanywa isabukuru yo Kwibohora ku nshuro ya 26 yegereje bagahitamo kubihuza kugira ngo banatange ubutumwa kuri abo bagore.

Ati “Kubihuza n’umunsi wo Kwibohora ku nshuro ya 26 ni uko igihugu cyacu gifite aho cyavuye hatari heza kikaba gifite aho kigana akaba ari n’uburyo bwo gutanga ubutumwa ku bo twaremeye kugira ngo bumve ko bagomba kugira uruhare mu iterambere ry’igihugu.”

Perezida w’Inama y’Igihugu y’Abagore (CNF) mu Karere ka Gasabo, Kamashazi Donnah, yavuze ko umuntu aba agomba kurenga ibibazo yahuye nabyo agaharanira kujya mbere nk’uko u Rwanda rwanyuze muri byinshi birimo Jenoside yakorewe Abatutsi mu 1994 ariko rukaba ari igihugu gifite icyerekezo cyiza.

Yibukije ko abagore ari ishingiro ry’umuryango kandi bagomba kugira uruhare mu cyerekezo cy’igihugu. By’umwihariko muri ibi bihe bya COVID-19 yabasabye kubahiriza amabwiriza yo kwirinda icyo cyorezo bubahiriza amabwiriza yose kugikumira.

Ati “Dufatanye iki cyorezo tuzagitsinda turangajwe imbere n’Umutoza w’Ikirenga.”

Bamwe mu baremewe babwiye IGIHE ko bishimiye guhabwa ibiribwa kandi ko birabafasha kuba bajya guca inshuro bafite ibyo kurya.

Mukamanzi Julienne utuye mu Kagari ka Kibara Umudugudu wa Gasharu yagize ati “Ndumva nezerewe, ibyo ntari mfite byose ndabibonye; agasabune, amavuta, ibishyimbo, akawunga nshimye Imana baritegereje cyane [mu kubatoranya].”

Umwe mu bakobwa babyariye iwabo we yagize ati “Twe biba ari ibibazo noneho muri ibi bihe bimeze bitya, ni ibintu biba bigoranye cyane, ariko ubu nibura umuntu arajya gushakisha yariye.”

Mu bikorwa, Urugaga rw’abagore rushamikiye ku Muryango FPR Inkotanyi na CNF bateguye mu cyumweru cyo kwizihiza Isabukuru yo kwibohora harimo no gushimira abagore bari mu ngabo zabohoye u Rwanda.

Umuyobozi Ushinzwe imiyoborere mu Karere ka Gasabo, Shema Jonas, witabiriye icyo gikorwa yibukije ko ako karere hari byinshi kishimira, inzu zizatuzwamo imiryango 56 muri Bumbogo na Nduba, Poste de santé eshatu, imihanda mishya ya kaburimbo ya Kimihurura.

Hari kandi Ikigo mbonezamikurire y’abana bato, ECD mu Murenge wa Ndera, amasoko mu Murenge wa Jabana, Umuhanda Karuruma-Jali wa kilometero 15 n’ubwanikiro muri Gikomero.

Imiryango 15 niyo yahawe ibiribwa udupfukamunwa, amavuta n'amasabune
Insanganyamatsiko y'Isabukuru yo Kwibohora ku nshuro ya 26 igira iti "Kwibohora twubaka u Rwanda twifuza''
Perezida w'Inama y'Igihugu y'Abagore, CNF, mu Karere ka Gasabo, Kamashazi Donnah, yasabye abagore kuba umusemburo wo kwimakaza ingamba zo kwirinda COVID-19 bahereye mu ngo zabo
Umuyobozi w’Urugaga rw’Abagore rushamikiye kuri FPR Inkotanyi mu Karere ka Gasabo, Rugera Jeannette, yavuze ko inkunga yatanzwe yahujwe n'imyaka 26 yo kwibohora k'u Rwanda
Buri muryango wagiye uhabwa udupfukamunwa tune mu gukomeza ingamba z'ubwirinzi
Ibikorwa byo kwizihiza isabukuru ya 26 yo kwibohora bizarangwa no gushimira abagore bari mu ngabo zabohoye u Rwanda
Perezida w'Inama y'Igihugu y'Abagore, CNF, mu Karere ka Gasabo, Kamashazi Donnah, na Shema Jonas ushinzwe Ishami ry'Imiyoborere muri Gasabo bashyikiriza ibiribwa umwe mu bagore
Abahawe ibiribwa bavuze ko bibafasha kubahiriza amabwiriza yo kwirinda COVID-19 yashyizweho
Abagizweho ingaruka na COVID-19 batishoboye bo muri Gikomero mu Karere ka Gasabo bahawe ibiribwa birimo ibishyimbo, kawunga n'amavuta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .