Dr Bizimana yasobanuye inkomoko ya ‘Noheli y’amaraso’, ubwicanyi bwibasiye Abatutsi mu 1963

Yanditswe na Prudence Kwizera
Kuya 13 Ukwakira 2019 saa 10:15
Yasuwe :
0 0

Umunyamabanga Nshingwabikorwa wa Komisiyo y’Igihugu yo Kurwanya Jenoside, CNLG, Dr Bizimana Jean Damascène, yatanze ikiganiro ku mateka ya Jenoside agaruka ku mwihariko w’ubwicanyi bwibasiye abatutsi mu Cyanika mu Karere ka Nyamagabe ahahoze ari Perefegitura ya Gikongoro.

Yagitanze kuri uyu wa Gatandatu tariki ya 12 Ukwakira 2019 ubwo yari yitabiriye umuhango wo gushyingura mu cyubahiro imibiri 104 y’abazize Jenoside yakorewe Abatutsi iherutse kuboneka mu Murenge wa Cyanika mu Karere ka Nyamagabe, munsi gato ya Kiliziya Gatolika Paruwasi ya Cyanika.

Dr Bizimana yagarutse ku mateka y’aho mu Cyanika avuga ko Jenoside yakorewe Abatutsi yatangiye gutegurwa mu 1959.

Yagarutse ku bwicanyi bwakozwe mu 1963 mu yari Gikongoro nyuma y’inama yahuje Perefe Nkeramugaba n’abandi bategetsi iyobowe n’uwari Minisitiri w’Ubutegetsi bw’Igihugu Rwasibo Jean Baptiste.

Yavuze ko ubwicanyi bwatangiye tariki ya 24 Ukuboza 1963 nijoro hicwa Abatutsi bari muri za Paruwasi; birakomeza ku itariki 25 no kuri 26 noneho batangira no kurya inka za bo.

Kuri Paruwasi ya Cyanika ngo Abatutsi barishwe bajugunywa mu migezi.

Ati “Mu mwaka wa 1963 iyo Noheli y’amaraso yatumye Abatutsi bakurana ubwoba igihe cyose babayeho, baba mu bwoba bwinshi no gutinya; abandi na bo baba mu cyizere ko bashobora gukandamiza abatutsi nta kibazo.”

Yavuze ko mu 1963 habaye urwitwazo ko Inyenzi zateye mu Bugesera hicwa Abatutsi bo mu Cyanika bitwaje ko Inyenzi zacengeye zahageze.

Yashimye bamwe mu Bapadiri bishyize hamwe batangaza iby’ubwo bwicanyi baranabwamagana.

Ati “Abapadiri babayemo abantu b’’intwari […] ni bo babaye aba mbere mu kugaragaza imiterere y’ubwo bwicanyi bwaberaga mu Cyanika. Hari Abapadiri b’abamisiyoneri bishyize hamwe bandika ibarurwa ku itariki ya 12 Mutarama 1964.”

Bimwe mu byari bikubiye muri iyo baruwa

Iyo baruwa yagaragazaga ko ubuyobozi bwa Kiliziya Gatolika mu Rwanda budashobora kwamagana ubwo bwicanyi kubera impamvu zitandukanye zirimo ko Arkiyepiskopi wa Kabgayi wari uhari yari umunyamahanga adashobora kwitandukanya n’ibikorwa bya Leta kuko yari ayishyigikiye.

Harimo kandi ko Abasenyeri babiri bari bahari, Musenyeri Bigurumwami na Gahamanyi bari Abatutsi bakaba batarashoboraga kugira icyo bavuga.

Banditse ko ku itariki ya 22 Ukuboza 1963 Radiyo yatangaje ko Inyenzi zateye mu Bugesera kandi zatsinzwe. Icyo gihe ngo Leta yararakaye ihita itegeka ko hafungwa Abatutsi bose bakekwaho gufatanya n’Inyenzi.

Abafunzwe barenga 30 barasiwe mu Ruhengeri batajyanywe mu butabera ngo bacirwe urubanza.

Ku itariki ya 25 Ukuboza 1963 ku isaha ya saa sita, kuri Noheli hatangijwe ibikorwa byo kurimbura Abatutsi bose muri Perefegitura ya Gikongoro.

Abaturage bose b’Abahutu baba abakirisitu n’abapagani, bakoze ibitero ku Batutsi bayobowe n’abarwanashyaka ba Parmehutu n’abategetsi ba Leta. Icyari kigamijwe si ugusahura ngo ahubwo ni ukwica umuntu wese ufite ubwoko bw’umututsi.

Dr Bizimana ati “Ngira ngo aha Jenoside murayumvamo rwose kandi ni Abapadiri babyanditse ku itariki 15 z’ukwa mbere 1964 bavuga uko ibintu byagenze mu cyumweru kibanza.”

Banditse ko Paruwasi ebyiri zibasiwe cyane ari Cyanika na Kaduha kandi Abapadiri bo mu Cyanika bagereranya ko abishwe bagera mu bihumbi bitanu.

Bimwe mu bikubiye muri iyo baruwa Dr Bizimana yabisomye ati “Ubungubu twandika uru rwandiko impunzi zari mu Cyanika Leta yarazirukanye izisubiza iwabo kandi inzu zabo zaratwitswe. Ubu kuri Paruwasi ya Cyanika harabarizwa abana b’imfubyi 138 bafite munsi y’imyaka irindwi. Abategetsi bakaba barategetse ko bagomba gushyirwa mu miryango y’Abahutu ikaba ari yo ibarera.”

Abo Bapadiri bibazaga uko abo bana bazabaho barererwa mu miryango y’abishe ababyeyi babo.

Bagaragaje ko umubare w’imirambo y’Abatutsi batawe mu migezi ya Mwogo na Rukarara wari hagati y’ibihumbi bibiri na bitatu.

Bati “Twebwe nk’Abamisiyoneri turasanga tutagomba guceceka ibi bintu byo kubona ko abicanyi benshi ari abakirisitu ndetse bamwe muri bo bakaba ari abayobora abandi bakirisitu, bakaba ari abarimu n’abagize imiryango ya Kiliziya Gatolika.”

Abo Bapadiri bifuzaga ko ibikubiye mu ibaruwa yabo byatangazwa mu itangazamakuru rya Kiliziya Gatolika, amahanga yose akabimenya kandi n’umuntu wese uyibonye ntabiceceke.

Abafashe ijambo kuri uyu wa Gatandatu, bagaragaje ko kuba hakiri abanga gutanga amakuru y’ahari imibiri y’abazize Jenoside yakorewe abatutsi biterwa ahanini n’ingengabitekerezo ya Jenoside babibwemo igihe kirekire ikaba ikibarimo.

Gushyingura mu cyubahiro imibiri y’abazize Jenoside iherutse kuboneka byitabiriwe n’abayobozi batandukanye barimo Minisitiri w’Ubutabera, Busingye Johnston; Perezida wa Ibuka, Prof Dusingizemungu Jean Pierre; Guverineri w’Intara y’Amajyepfo, CG Gasana Emmanuel n’abandi.

Minisitiri Busingye yavuze ko kuba iyo mibiri ibonetse muri 2019 byerekana imyaka 25 yo gucecekana icyaha.

Ati “Kuriya guceceka kugize icyaha, biratwereka imyaka 25 y’ubufatanyacyaha, biratwereka imyaka 60 cyangwa irenga y’imyumvire ironda ubwoko, itsemba ubundi ikagera aho ibyiyemeza bikaba gahunda.”

Hashimwe umukobwa w’imyaka 24 witwa Mushimiyimana Anatolie wagize ubutwari atanga amakuru ko abonye iyo mibiri mu isambu ya Kiriziya aho bari barimo guhinga.

Abayobozi batandukanye bareba aho imibiri y'abishwe muri Jenoside yakorewe Abatutsi yabonetse munsi ya Kiliziya
Abayobozi batandukanye bitabiriye umuhango wo gushyingura mu cyubahiro imibiri y'abazize Jenoside iherutse kuboneka
Bamwe mu bitabiriye umuhango wo gushyingura bateze amatwi ijambo rya Minisitiri Busingye
Hashyinguwe mu cyubahiro imibiri 104 y’abazize Jenoside iherutse kuboneka
Imibiri y'abazize Jenoside iheruka kuboneka yashyinguwe mu cyubahiro mu rwibutso rwa jenoside rwa Cyanika
Iyo mibiri iherutse kuboneka munsi gato ya Kiliziya Gatolika, Paruwasi ya Cyanika
Minisitiri Busingye yunamiye Abatutsi baruhukiye mu rwibutso rwa Cyanika
Umunyamabanga Nshingwabikorwa wa Komisiyo y’Igihugu yo Kurwanya Jenoside, CNLG, Dr Bizimana Jean Damascène, yatanze ikiganiro ku mateka ya Jenoside agaruka ku mwihariko w’ubwicanyi bwibasiye abatutsi mu Cyanika

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza