COVID-19: Abantu 11 barimo umugabo wigishaga umukobwa gutwara imodoka batawe muri yombi (Video)

Yanditswe na Iradukunda Regis
Kuya 10 Nyakanga 2020 saa 07:11
Yasuwe :
0 0

Polisi y’Igihugu yerekanye abantu 11 barenze ku mabwiriza yo kwirinda icyorezo cya COVID-19, barimo abafashwe bigisha gutwara imodoka n’abatubahirije amasaha ntarengwa yo kugera mu rugo.

Aba bantu berekanywe kuri uyu wa Gatanu, tariki ya 10 Nyakanga 2020 mu gikorwa cyabereye kuri Sitasiyo ya Polisi ya Remera mu Mujyi wa Kigali.

Abafashwe bose bemera amakosa, bakavuga ko barenze ku mabwiriza yashyiriweho kwirinda ikwirakwira rya COVID-19 iterwa n’agakoko ka Coronavirus kubera kubura uko bagira.

Umwe muri bo wafatiwe i Remera yigisha imodoka, yavuze ko yabitewe n’uko yashakaga amafaranga cyane yabona uyamuha ngo amwigishe akanga kuyitesha.

Yagize ati “Nari nsanzwe mbizi ko ari icyaha, sinari nsanzwe nanabikora ahubwo ni uko umunyeshuri nigishije yarambwiye ati ‘mfite umuntu ngiye kuguha, murigisha?’ Nanjye ntekereje ko hagiye kuzamo agafaranga, ntekereza ko namukuraho utwo dufaranga na we nkamwongera ku basigaye muri cya gihe baduhagarikaga. Urumva nakoze uburiganya.”

Uyu mugabo wiyemerera ko yagize uruhare mu gushuka uwo yigishaga gutwara imodoka kuko yamubwiye ko bitari mu bikorwa bibujijwe, yagiriye abandi inama yo kutarenga ku mabwiriza ya leta ahubwo bagategereza igihe ibikorwa bashaka gukora bizakomorerwa.

Uwigishwaga na we yahuriye na mugenzi we ku gusaba imbabazi ndetse no kugira inama bagenzi be.

Umuvugizi wa Polisi y’u Rwanda, CP John Bosco Kabera, yavuze ko abafatiwe muri ayo makosa bose bagomba kubihagarika kuko amabwiriza yo kwirinda akiriho, kandi ko polisi ifite uburenganzira bwo gukurikirana abatayubahirije.

Abajijwe niba abona abayarengaho baba babuze uko bagira, yasubije ko abona kutubahiriza amabwiriza ari imyumvire iciriritse.

Yakomeje ati “Ni imyumvire mike, ni imyumvire iciriritse, ni imyumvire idahwitse. Tuzi ko twaciye mu bihe bikomeye bya guma murugo, abaturage barafashijwe. Ubwo rero ntibashobora kwitwaza ngo ‘twebwe turarenga kuri aya mabwiriza kubera ko hari impamvu.’ Izo mpamvu zigomba gukurikiranwa n’inzego z’ibanze cyangwa izishinzwe gukurikirana ishyirwa mu bikowa ry’amabwiriza yo kwirinda mbere y’uko umuturage yishora mu bibazo nk’ibi ngibi.”

CP Kabera yavuze ko abatawe muri yombi bazahanwa n’amategeko bitewe n’amakosa bakoze kuko buri ryose rifite itegeko rihana uwarikoze.

Kugeza ubu mu Rwanda abamaze kwandura Coronavirus ni 1210 mu bipimo 172 362 bimaze gufatwa, abayikize ni 623, abakirwaye bo ni 584 naho abamaze guhitanwa na yo ni batatu.

Minisiteri y’Ubuzima isaba Abanyarwanda gukomeza kwirinda ikwirakwira rya Coronavirus bakurikiza amabwiriza yashyizweho arimo kwambara agapfukamunwa n’amazuru igihe cyose bavuye mu rugo, gukaraba intoki kenshi no guhana intera igihe bagize aho bahurira n’abandi mu ruhame.

Umugabo wafatiwe i Remera yigisha gutwara imodoka yavuze ko yashakaga gukorera amafaranga
Umukobwa wafashwe yigishwa gutwara imodoka ari mu beretswe itangazamakuru
Ku wa 10 Nyakanga 2020, Polisi y'Igihugu yerekanye abantu 11 barenze ku mabwiriza yo kwirinda icyorezo cya COVID-19, barimo abafashwe bigisha gutwara imodoka n’abatubahirije amasaha ntarengwa yo kugera mu rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .