CMI yakajije umurego mu kwinjiza impunzi mu mugambi wo guhungabanya u Rwanda

Yanditswe na Musangwa Arthur
Kuya 8 Kanama 2020 saa 01:06
Yasuwe :
0 0

Umwaka wa 2019 wasize Ingabo za Leta ya Repubulika Iharanira Demokarasi ya Congo, FARDC, zigabye ibitero byashegeshe imitwe yitwaje intwaro ikorera muri iki gihugu irimo uwa P5 wa Kayumba Nyamwasa usanzwe ayobora RNC.

Ibi bitero bikomeye byiswe ‘Tempête de l’Ituri’ byari bigamije kwirukana imitwe yitwaje intwaro yigaruriye uduce dutandukanye mu mashyamba ya RDC.

Abarwanyi benshi barishwe, abandi bafatwa mpiri ari bazima ndetse bamwe bari imbere y’Ubutabera bw’u Rwanda aho bakurikiranyweho ibyaha bakoze.

Kuva icyo gihe iyi mitwe yarashegeshwe bikomeye ndetse imikorere yayo igenda biguru ntege ku buryo byabasabye kongera kwisuganyiriza uwo mugambi wayo mubisha wo guhungabanya umutekano w’u Rwanda.

Virunga Post yanditse ko kuri ubu Urwego rushinzwe Iperereza mu Gisirikare cya Uganda (CMI) rwinjiye mu mugambi mushya wo gushaka abarwanyi bazifashishwa mu mitwe igamije guhungabanya umutekano w’u Rwanda.

CMI yohereje abakozi bayo mu nkambi zose ziri muri Uganda zirimo impunzi zivuga aho ziri gushishikarizwa kwiyunga n’imitwe irwanya u Rwanda.

Ubutegetsi bwa Uganda bumaze igihe bukorana n’Umutwe w’Iterabwoba wa RNC uyoborwa na Kayumba Nyamwasa ndetse n’indi mitwe y’iterabwoba irimo FDLR ibarizwamo abasize bakoze Jenoside mu Rwanda na RUD-Urunana.

Nyuma y’uko abayobozi bakuru muri RNC n’indi mitwe yitwaje intwaro bakijweho umuriro ndetse abasirikare bakuru benshi bakicwa, byatumye abarwanyi benshi bava mu birindiro barimo.

Kuri ubu Uganda yatangiye urugendo rwo kongera gufasha iyo mitwe kwiyubaka.

Uwo mugambi usa n’aho wubakiye ku gushaka amaboko mashya binyuze mu nkambi zibarizwamo impunzi zivuga Ikinyarwanda.

Amakuru yizewe agaragaza ko muri izo nkambi, CMI iri kugenda yegera impunzi ariko by’umwihariko abakozi bayo bakaba bari gushaka abahoze mu ngabo mu Rwanda bakaza kuvamo ku mpamvu zitandukanye cyangwa abari muri FDLR.

Inkambi ziri gushakwamo impunzi zirimo Nakivale, Kyaka2, Kyangwari, Kiryandongo, Rhino Camp, Rwamwanja na Oruchinga.

Umwe mu basesenguzi bakurikiranira hafi ibya politiki yo mu Karere yagaragaje ko iki gikorwa gihonyora amasezerano ya Luanda, yasinywe hagati y’u Rwanda na Uganda.

Amasezerano ya Luanda yasinywe tariki 21 Kanama 2019, yari agamije gukuraho ikintu icyo aricyo cyose kigamije guhungabanya umutekano w’igihugu kimwe, bigizwemo uruhare na kimwe muri ibi bibiri, u Rwanda na Uganda.
Uganda yakomeje kugenda itandukira ku gukemura amakimbirane ndetse CMI igakomeza ibikorwa byayo byereka amahanga ko idashaka kuyashyira mu bikorwa.

Iki gihugu cyabaye igicumbi cyo kwakira no kugira uruhare mu bikorwa n’ibiganiro by’imitwe igamije guhungabanya umutekano w’u Rwanda irimo nka RNC, RUD-Urunana, FDLR n’indi, mu gihe yari ifite inshingano zo gukora ibishoboka byose iyi mitwe igahagarika ibikorwa byayo.

Kuri ubu Uganda yaciye undi muvuno wo kunyura mu nkambi ishaka abarwanyi bashya baziyunga ku mitwe y’iterabwoba mu mugambi wayo wo guhungabanya u Rwanda.

Amakuru yizewe avuga ko CMI yashyizeho uburyo bwo gutanga amahugurwa ku barwanyi bagombwa kwinjizwa muri RNC.

Umwe mu bayobozi bari mu Mujyi wa Kigali yagize ati “Ibi byose birerekana ko Kampala aho gushaka amahoro, ntiyigeze ihindura imikorere yayo igamije guhembera urwango.’’

Uyu muyobozi utifuje ko amazina ye atangazwa yakomeje ati “Ibikorwa byo gushaka abarwanyi CMI iri gukora ni urundi rugero ko kuri Museveni, amasezerano yashyizweho umukono ari ibipapuro gusa.’’

“Ibikorwa bya CMI mu nkambi birashimangira neza umugambi wo guhungabanya u Rwanda hagamijwe kuburizamo imbaraga zashyizwe mu masezerano nk’aya Angola agamije kuzahura umubano.’’

Uganda imaze igihe ari nk’indiri idasubirwaho y’ibikorwa byo gutoza abashaka guhungabanya u Rwanda ndetse abarwanyi ba Kayumba Nyamwasa bahanyura bagana mu birindiro byabo biri mu Minembwe mu Burasirazuba bwa RDC.

CMI kandi ntiyakunze kwihishira mu kugaragaza imikoranire ya hafi n’abarwanashyaka ba RNC mu guta muri yombi no gukorera iyicarubozo ibihumbi by’Abanyarwanda bashaka kwinjiza mu barwanyi ba RNC ku ngufu cyangwa ngo batange inkunga yo gushyigikira uwo mutwe.

Abanyarwanda bafatirwa muri Uganda bashinjwa kuba ‘intasi’ z’u Rwanda ariko abenshi ntibakorerwa dosiye ngo bakurikiranwe n’inkiko ku byaha baregwa.

Inshuro nyinshi, Kampala yakunze gutanga ubufasha kugeza no kugenera pasiporo zigenezwa abadipolomate ku bayobozi bakuru ba RNC, FDLR n’indi mitwe igamije guhungabanya umutekano w’u Rwanda.

Umusesenguzi ku bibazo by’umutekano yagize ati “Ibi ndetse n’ibindi bikorwa bigamije guhungabanya umutekano wa Kigali, ni yo mpamvu nta gitunguranye ku byo CMI iri gukora mu nkambi z’impunzi.’’

Kuva mu myaka ishize, Abanyarwanda barimo abagore bafite abana bato bakurwa mu modoka bakajya gufungwa bashinjwa kuba intasi, bagakorerwa iyicarubozo ndetse bagafungirwa mu nzu zitazwi.

Umwaka urashize abarwanyi bibumbiye mu mitwe y'Iterabwoba ya P5 biciwe mu mashyamba ya RDC, mu gihe abandi bafashwe mpiri. Uganda yatangiye umugambi wo kongera kubyutsa imikorere y'uyu mutwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .